ენდრიუ მაუნტბეტენ–უინძორს, რომელსაც ძმამ, მეფე ჩარლზ III-მ სამეფო ტიტულები ჩამოართვა, კიდევ ერთი უფლება შეეზღუდა – ამის შესახებ Daily Mirror იუწყება.
გამოცემის ინფორმაციით, ყოფილი პრინცი პოლიციელებმა მოინახულეს და აიძულეს, ცეცხლსასროლი იარაღის შენახვის ლიცენზიაზე უარი ეთქვა. ეს გადაწყვეტილება 65 წლის არისტოკრატისთვის ჯეფრი ეპშტეინის საქმესთან დაკავშირებული სკანდალების შემდეგ კიდევ ერთი დაკარგული პრივილეგია გახდა. Daily Mirror -ის წყაროს თქმით, ენდრიუ ბრიტანელი არისტოკრატების მიერ ორგანიზებული, ტრადიციული ნადირობის ხშირი მონაწილე იყო, ახლა კი მან მსგავს შეკრებებზე დასწრების შესაძლებლობა დაკარგა.
ამიერიდან ენდრიუ მაუნტბეტენ–უინძორს იარაღით სარგებლობა მხოლოდ ლიცენზიის მქონე პირების თანხლებითა და მკაცრი პირობების დაცვით შეეძლება.
ჯეფრი ეპშტეინის საქმის ახალი საბუთები 19 დეკემბერს გამოქვეყნდა. მათ შორის ათასობით ფოტოა, რომლებიც სექსუალური ექსპლუატაციის მიზნით არასრულწლოვნებით ვაჭრობასა და სექსუალურ ძალადობაში ბრალდებულ ფინანსისტთან ცნობილი ადამიანების, მათ შორის, ენდრიუ მაუნტბეტენ–უინძორის ურთიერთობებს ააშკარავებს.
ყოფილ პრინცს არასრულწლოვან გოგონებზე სექსუალურ ძალადობაში ბრალდებები მრავალი წლის განმავლობაში სდევდა. 2021 წელს ამერიკელმა ადამიანის უფლებების დამცველმა, 41 წლის ვირჯინია ჯუფრემ ბრიტანეთის პრინცის ენდრიუს წინააღმდეგ სასამართლოში სარჩელი შეიტანა. ჯუფრე ამტკიცებდა, რომ 17 წლის ასაკში ის ჯეფრი ეპშტეინის ვილაზე პრინცი ენდრიუს მხრიდან სექსუალური ძალადობის მსხვერპლი არა ერთხელ გახდა. ვირჯინია ჯუფრე 2025 წლის აპრილში გარდაიცვალა. გავრცელებული ინფორმაციით, მან თავი მოიკლა, ოქტომბერში კი გამოვიდა მისი მემუარები, სადაც ენდრიუსთან დაკავშირებულ ორგიებზე ისაუბრა.
ბრალდებების შემდეგ 65 წლის ენდრიუმ იორკის ჰერცოგის ტიტული დაკარგა. წლის დასაწყისში მეფე ჩარლს III-მ ის უინძორში მდებარე რეზიდენციიდან – როიალ ლოჯიდან გაასახლა. მომავალ წელს ენდრიუს სანდრინგემის მამულში, უფრო მოკრძალებულ კოტეჯში მოუწევს გადასვლა.
Royal Lodge-ს დატოვებს ენდრიუს ყოფილი ცოლი სარა ფერგიუსონიც, რომელიც 1996 წელს განქორწინების შემდეგაც ამ რეზიდენციაში ცხოვრობდა. მამისთვის პრინცის ტიტულის ჩამორთმევის მიუხედავად პრინცესის ტიტული შეინარჩუნეს ენდრიუს ქალიშვილებმა ბეატრისმა და ევგენიამ.
ასევე დაგაინტერესებთ
#OK! მეფე ჩარლზ მესამემ უმცროს ძმას პრინცის ტიტული ჩამოართვა და სასახლიდან გააძევა
