19 იანვარს მოდის სამყარო ცნობილი იტალიელი მოდის დიზაინერის, ვალენტინო გარავანის გარდაცვალების ცნობამ შეძრა. დიზაინერს პირდაპირი მემკვიდრეები არ დარჩენია, თუმცა გაზეთი Messaggero-ს ინფორმაციით, მის 2 მილიარდ დოლარად შეფასებულ ქონებაზე პრეტენზიას სამი ადამიანი აცხადებს.
შესაძლო მემკვიდრეებს შორის არიან ვალენტინოს და, ვანდა, ნათესავი ოსკარი და გარავანის დიდი ხნის ბიზნესპარტნიორი და თანამოაზრე, ჯანკარლო ჯამეტი. წყაროების ცნობით, დიზაინერის ახლობლებად ასევე ითვლებიან შონ და ენტონი საქსები – ძმები, რომლებიც დიზაინერის ახლო წრეში გაიზარდნენ.
Messaggero-ს ცნობით, ვალენტინოს ქონების ბედს რომში, ნოტარიუსის მიერ შენახული ანდერძი განსაზღვრავს. გარავანის ქონება მოიცავს: ვილებს რომში, ციხესიმაგრეს პარიზის მახლობლად, რეზიდენციებს ლონდონსა და ნიუ-იორკში და შალეს შვეიცარიაში, ხელოვნების ნიმუშების კოლექციას და ორ კომპანიას უძრავი ქონებისა და გადაზიდვების სფეროში. შესაძლოა, ანდერძში ასევე ნახსენები იყოს დიზაინერის მემკვიდრეობის შესანარჩუნებლად შექმნილი ფონდი Fondazione Garavani Giammetti.
ვალენტინო გარავანისთან გამოსამშვიდობებელი ცერემონია ოთხშაბათს და ხუთშაბათს მისი ფონდის საგამოფენო სივრცეში გაიმართება, ხოლო დაკრძალვა პარასკევს, დედაქალაქის ერთ-ერთ უძველეს ბაზილიკაშია დაგეგმილი.
ასევე დაგაინტერესებთ
#OK! რატომ არის წითელი ფერი Valentino-ს მოდის სახლის სიმბოლო?
