ხშირად მოდის სახლები ჩვენს ცნობიერებაში კონკრეტულ ფერებთან ასოცირდება. მაგალითად, Bottega Veneta – მწვანესთან, Hermès – ნარინჯისფერთან, Schiaparelli – ვარდისფერთან, Tiffany & Co – ცისფერთან და Valentino რა თქმა უნდა, წითელთან.
ზოგადად, წითელი ფერი ადამიანებში წინააღმდეგობრივ გრძნობებს იწვევს. ზოგისთვის ის სითბოსთან ასოცირდება, ზოგისთვის მრისხანებასა და შფოთვასთან, ბევრისთვის წითელი ვნების, სიყვარულისა და სექსუალობის სიმბოლოა.
ფსიქოლოგიური თვალსაზრისით, წითელი ძალაუფლებისა ლიდერობის ფერია. ამ ფერის მოყვარულები ხშირად თავდაჯერებითა და მტკიცე ხასიათით გამოირჩევიან. ჩვენ გიამბობთ რატომ არის წითელი ასე მჭიდროდ დაკავშირებული Valentino-ს მოდის სახლის დნმ-თან და რატომ უყვარდა ის ვალენტინო გარავანის გამორჩეულად.
ოპერა „კარმენი“ და საბედისწერო შთაგონება
ვალენტინო გარავანის სიყვარული წითელი ფერის მიმართ ბარსელონაში ჩაისახა. სტუდენტობისას ის ესპანეთის დედაქალაქში, არდადეგებზე გაემგზავრა და ოპერა „კარმენს“ დაესწრო. მაყურებელთა სამოსი, მსახიობების კოსტიუმები, თეატრის სავარძლები თუ ფარდები – ყველაფერი ალისფერი იყო. მომავალი დიზაინერი ნანახმა აღაფრთოვანა.
იმ წუთიდან წითელი ფერი მისი შთაგონების წყაროდ და Valentino-ს კოლექციების განუყოფელ ნაწილად იქცა.
„ვფიქრობ, ქალი წითელში ყოველთვის გამორჩეული და შესანიშნავია,“ – აღნიშნა დიზაინერმა ერთ-ერთ ინტერვიუში. გარავანიმ საკუთარი, იდეალური წითელიც კი შექმნა, რომელიც მეწამული, ყვითელი და შავი ფერების გარკვეული რაოდენობის შეზავებით მიიღება. დიზაინერმა ეს უნიკალური ელფერი დააპატენტა და ამ ფერს Rosso Valentino ქვია. აღსანიშნავია, რომ Valentino-ს მსგავსად, Tiffany & Co-საც საკუთარ ფერზე პატენტი აქვს – ბრენდის ცისფერს ოფიციალურად Pantone 1837 ჰქვია.
ვალენტინოს აზრით, წითელი უნიკალური ფერია, რომელიც ერთდროულად სიცოცხლეს, ვნებას, სიყვარულს და სიკვდილს განასახიერებს და ამავე დროს, სევდის საუკეთესო წამალია. მიუხედავად სიმკვეთრისა, ის ისეთივე ნეიტრალური ფერია, როგორც შავი ან თეთრი, თუმცა მათგან განსხვავებით უსაზღვრო ენერგიას ატარებს.
წითელი ყველა ქალისთვის
ბევრი ქალი წითელი კაბის ჩაცმას იმის შიშით ერიდება, რომ არ მოუხდება, თუმცა გარავანი დარწმუნებული იყო, რომ არ არსებობს ქალი, რომელსაც ეს ფერი არ დაამშვენებს. მთავარი საიდუმლო საკუთარი ელფერის პოვნაშია, რომლის არჩევანი უსასრულოა. ამბობენ, რომ მოდის სახლის საარქივო კოლექციებში წითელის 550-მდე სხვადასხვა ელფერი ინახება. თავად ვალენტინო კი თვალის ერთი შევლებით 30-ზე მეტ ელფერს ასხვავებდა.
2008 წელს, როდესაც დიზაინერმა თავისი გამოსამშვიდობებელი ჩვენება გამართა, შოუ 30 მოდელის გამოსვლით დასრულდა, რომლებსაც უნაკლო წითელი ფერის კაბები ეცვათ. ეს კიდევ ერთხელ ადასტურებდა თუ რამდენად მნიშვნელოვანია ეს ფერი ბრენდისთვის.
2022 წელს მოდის სახლმა გამოსცა წიგნი, რომელიც წითელი ფერის განვითარების ისტორიას მოგვითხრობს და მასში 180-მდე ლუქი შევიდა.
Valentino-ს წითელ კაბაში გამოწყობილი ქალისთვის თვალის მოწყვეტა შეუძლებელია ის- მყისიერად ყურადღების ცენტრში ხვდება და გარშემო მყოფებს მაგნიტივით იზიდავს.
ასევე დაგაინტერესებთ
#OK! იტალიური მოდის უკანასკნელი იმპერატორი – ვალენტინო გარავანი 10 ფოტოში
