საფრანგეთის ყოფილი პრეზიდენტი, ნიკოლა სარკოზი თავისი 20 დღიანი პატიმრობის შესახებ წიგნის გამოცემას გეგმავს – ამის შესახებ მან სოციალურ ქსელ X -ში დაწერა.
„ციხეში არაფერია სანახავი და გასაკეთებელი. დამავიწყდა როგორია სიჩუმე, რომელიც ლა სანტეს ციხეში არ არის. აქ გამუდმებული ხმაურია, მაგრამ, როგორც უდაბნოში, ციხეშიც შინაგანი ცხოვრება ძლიერდება“ – გამომცემლობა Fayard-ი წიგნიდან ამონარიდს აქვეყნებს.
წიგნის სახელწოდებაა „ნიკოლა სარკოზი: პატიმრის დღიური“. საფრანგეთის ყოფილი პრეზიდენტის თქმით, მისი 216 გვერდიანი წიგნი მაღაზიის დახლებზე 10 დეკემბერს გამოჩნდება.
ნიკოლა სარკოზის სექტემბრის ბოლოს ხუთი წლით თავისუფლების აღკვეთა მიესაჯა. საფრანგეთის ყოფილი პრეზიდენტი დამნაშავედ ცნეს შეთქმულებაში, რომელიც ლიბიის მთავრობის მიერ მისი 2007 წლის საარჩევნო კამპანიის უკანონო დაფინანსებას უკავშირდებოდა. მასვე დაეკისრა 100 000 ევროს ოდენობის ჯარიმის გადახდა.
თავად სარკოზის განაჩენი შეცდომად და „საფრანგეთის დამცირებად“ მიაჩნია და ამტკიცებს, რომ უდანაშაულოა.
საფრანგეთის ყოფილი პრეზიდენტი პარიზში, ლა სანტეს ციხეში 21 ოქტომბერს გამოცხადდა. მას თან ახლდა მეუღლე, მოდელი კარლა ბრუნი და ერთ-ერთი ადვოკატი, კრისტოფ ანგრინი.
ყოფილმა პრეზიდენტმა ვადაზე ადრე გათავისუფლება დაუყოვნებლივ მოითხოვა. საბოლოოდ, 70 წლის პოლიტიკოსმა ციხეში მხოლოდ 20 დღე გაატარა – პარიზის სააპელაციო სასამართლომ გადაწყვიტა, რომ ქვეყნის ყოფილი ლიდერი სასჯელის მოხდას სახლში, სამართალდამცველების ზედამხედველობის ქვეშ გააგრძელებს. მას ელექტრონული სამაჯურის ტარება მოუწევს და თავისი საქმის ბრალდებულებთან და მოწმეებთან შეხვედრა ეკრძალება.
ასევე დაგაინტერესებთ
#OK! კარლა ბრუნი და ნიკოლა სარკოზი იბიცაზე ისვენებენ (ფოტოები)
