პოზიტიური ხასიათით გამორჩეული მუსიკოსი და მსახიობი, ლელა ლომთაძე, მუდმივად სიახლის ძიების პროცესშია. რას ნიშნავს მისთვის საყვარელი საქმე და რა გეგმები აქვს სამომავლოდ, ინტერვიუდან გავიგებთ.
გვიამბეთ თქვენ შესახებ, გაეცანით მკითხველს.
ქუთაისში, მუსიკალურ ოჯახში დავიბადე, სადაც მამა (გიორგი ლომთაძე – ვარსკვლავი, პროფესორი) და დედა (ჯულიეტა ლომთაძე) ოპერის თეატრის მომღერლები იყვნენ. კლასიკურ მუსიკასა და ხელოვნებას მათ მაზიარეს. სასიხარულოა ის, რომ პატარაობიდანვე მე და ჩემს ძმას გვერგო პატივი, სპექტაკლებშიც მიგვეღო მონაწილეობა.
რამდენიმე საყვარელი საქმე გაქვთ, პროფესიაზეც გვიამბეთ.
რადგან ხელოვანთა ოჯახში დავიბადე, გარდაუვალი იყო, მეც არ მიმართულებას არ გავყოლოდი. ამჯერადაც ვსაქმიანობ, როგორც მევიოლინე, მომღერალი და ასევე მესხიშვილის დრამატულ თეატრში ვარ მსახიობი.
ქუთაისი რას ნიშნავს თქვენთვის?
ჩემი ქუთაისი, ლამაზი და კოპწია, თავისი ღირსშესანიშნავი ადგილებითა და ისტორიებით მიყვარს, რადგან მეც მისი ნაწილი ვარ. ვცდილობ ჩემი მუსიკალური საქმიანობით საზღვრებს გარეთაც ვასახელო და იამაყოს ჩემით. მინდა ჩემი ქალაქი განსაკუთრებული, ლაღი და მრავალფეროვანი იყოს…
როგორც ვიცი, საინტერესო ჰობით ხართ დაკავებული.
რადგან ხელოვნების ირგვლივ ვტრიალებ, ჩემი ჰობიც ხელოვნებას უკავშირდება. კიდევ ერთ დარგი ხელნაკეთი სამკაულების თუ ნივთების შექმნაა, რაც საოცარ სულიერ სიმშვიდეს და პოზიტიურ განწყობას მმატებს. ეს კი საწინდარია, კიდევ უფრო ხალისიანი და დადებითი ვიყო.
წარმატების მთავარი ფორმულა რა არის?
ჩემი აზრით, წარმატების ფორმულაა საქმისადმი იყო ერთგული, უზომოდ გიყვარდეს შრომა და იღბალი, რომელიც ხელოვანს როგორც არასდროს, ისე ძალიან სჭირდება.
ამ ეტაპზე აქტიურად რას საქმიანობთ?
ამ ეტაპზე ყველგან აქტიურად ვარ. მუსიკალურ საღამოებში ვმონაწილეობ (ვუკრავ ვიოლინოზე და ვმღერი), საავტორო სიმღერებს ვწერ და ვიდეოკლიპებზე ვმუშაობ, თეატრში სპექტაკლებში ვთამაშობ და თავისუფალ დროს ხელნაკეთი ნივთების დამზადებით ვარ დაკავებული… შეიძლება ითქვას, ძალიან საინტერესო ცხოვრება მაქვს, რომელსაც ძალიან ვაფასებ და მიყვარს.
სამომავლო გეგმები გაგვიმხილეთ.
იდეების გენერატორს და მოუსვენარს მეძახიან. ძალიან მინდა მონოსპექტაკლი გავაკეთო, რომელიც ნაწილობრივ მუსიკალური იქნება და ვიმოგზაურო, რადგან მოგზაურობა კიდევ ერთ-ერთი პოზიტიური ტალღაა, რომელიც სიცოცხლეს გიმრავალფეროვნებს და გილამაზებს.
ტექსტი: ნანა კუკულავა
ფოტო: ლანა ვახტანგაძე
