თითქმის 15 წელი გავიდა მას შემდეგ, რაც დენიელ კრეიგმა კინოისტორიის ერთ-ერთი ყველაზე
საკულტო პერსონაჟის, აგენტი 007-ის როლი პირველად განასახიერა. მიუხედავად იმისა, რომ
კრიტიკოსების უმეტესობა სკეპტიკურად იყო განწყობილი ინგლისელი მსახიობის შესრულების
მიმართ, დენიელმა მოახერხა და მისი განსახიერებულ ჯეიმს ბონდს მსოფლიო კინოს ისტორიაში
მნიშვნელოვანი ადგილი დაუმკვიდრა.
“ვიმედოვნებ, ჯეიმს ბონდმა ბევრი რამ შეცვალა, მას შემდეგ რაც მისი როლის შესრულება მე
მხვდა წილად. მიუხედავად ადამიანების განსხვავებული დამოკიდებულებისა, საკუთარ
პერსონაჟს არასდროს ვაკრიტიკებდი, აგენტი 007 იყო ყველასგან განსხვავებული პიროვნება,
ვიცი, რომ მას ბევრი ნაკლი ჰქონდა, მისი დამოკიდებულება მსოფლიოსა და ქალებისადმი საეჭვო
იყო და ბევრ კითხვას ბადებდა, თუმცა მისი თითოეული ნაბიჯი ყოველთვის ეგზომ საინტერესო
იყო. ამიტომაც, აგენტი 007-ის პერსონაჟს მე ვერ გავაკრიტიკებ, ეს საქმე საზოგადოებისთვის
მიმინდია.”
დენიელ კრეიგს ხშირად როგორც “პირველ ქერა აგენტს” ისე მოიხსენიებენ. იქიდან გამომდინარე,
რომ ჯეიმს ბონდის საკულტო როლის შემსრულებლები შავგვრემნები იყვნენ, უმეტესწილად
მაყურებლები დენიელის გარეგნობასა და ქარიზმატულობას მათთან შედარებით
სტერეოტიპულად განიხილავდნენ.
“მახსოვს, პროდიუსერებს ვეუბნებოდი, რომ მე კონერის მსგავსი ვერ ვიქნებოდი, პირს
ბროსნანის მსგავსად ვერ ვითამაშებდი. ეს ეხებოდა როგორც შესრულებას, ასევე სხვა
მახასიათებლებსაც. მე არ მსურდა მათთვის მიმებაძა, მათგან რადიკალურად განსხვავებული
პერსონაჟის ჩამოყალიბება მსურდა.”
მიუხედავად იმისა, რომ ეკრანზე დენიელის შექმნილი პერსონაჟი თავდაჯერებული,
ქარიზმატული და მიზანმიმართულია, ის გადასაღებ მოედანზე სრულიად განსხვავებულია.
როგორც აგენტი 007-ის შემსრულებელი აღნიშნავს, No Time To Die-ის გადაღებების დროს
ყოველგვარი მიზეზების გარშე ხშირად სტრესი და დაძაბულობა იპყრობდა.
“იყო მომენტები, როდესაც ფიქრს ვიწყებდი და ვეღარ ვჩერდებოდი, მერე მახსენდებოდა რას
ვაკეთებდი და საკუთარ თავს ვეუბნებოდი: “შეწყვიტე სულელურად ფიქრი და ითამაშე.” ეს
თითქმის სულ ასეა, იმდენი რამ ხდება ჩვენს თავში და იმდენ რამეზე ვფიქრობთ, რაღაც თუ არ
დავივიწყეთ და სხვა რამეზე არ გადავერთეთ, საქმეს კარგად უბრალოდ ვერ გავაკეთებთ.”
“მოვლენებს ყოველთვის სერიოზულად ვუყურებ. სამწუხაროდ, თუ საბედნიეროდ, ჩემთვის
ყველანაირი დეტალი ღირებულია. ძალიან მზრუნველი ადამიანი ვარ, მადარდებს ის რასაც
ვაკეთებ და ვაკეთებ იმას, რაც მიყვარს.”
“ყოველთვის ვეკითხები საკუთარ თავს გავაკეთე თუ არა იმის მაქსიმუმი რაც შემეძლო და
გამოვიდა თუ არა ფილმი ისეთი კარგი, როგორსაც ვგეგმავდით, რომ ყოფილიყო. თუ რაიმე
დეტალი არ მომწონს მაშინათვე უკეთეს ვარიანტზე ვფიქრობ, ყველანაირ წვრილმანს ვამოწმებ და სხვებსაც იმავეს ვთავაზობ. მგონია, რომ ზოგი ადამიანისთვის გარკვეულწილად აუტანელიც ვარ, მაგრამ ეს ასეა.”
მიუხედავად იმისა, რომ დენიელ კრეიგი ცდილობს სხვა მსახიობების მიერ განსახიერებულ ჯეიმს
ბონდს საკუთარი არ შეადაროს, მაინც აღნიშნავს, რომ მისი პერსონაჟი საკმარისად არ ხუმრობდა
და მაყურებელსაც შედარებით ნაკლებად ახალისებდა.
“ზოგადად, ჩვენ გადასაღებ მოედანზე არანაირი შეზღუდვა არ გვქონია. ვერ ვიტყვი, რომ
მინდოდა რაიმე კონკრეტულის გაკეთება და ამის შესაძლებლობა არ მქონდა. უბრალოდ, ხშირი
იყო შემთხვევები, როდესაც მაყურებელი საუბრობდა ფილმში არსებულ ხუმრობებზე.
ყოველთვის ვამბოვდი, რომ დიდი სიამოვნებით ვიტყოდი ხუმრობებს, თუმცა რომ ვფიქრდები,
ვხვდები, რომ ეს ჩემი სტილი არაა, ამასთან ერთად, მგონია, რომ ხალხის რეაქციაც უარყოფითი
იქნებოდა.”
ფილმ Spectre-ის გამოსვლის შემდეგ ყველას ეგონა, რომ დენიელ კრეიგი მაყურებელმა ჯეიმს
ბონდის როლში საბოლოოდ იხილა. ყველასგან მოულოდნელად, მსახიობმა გადაწყვეტილება
შეცვალა და პროდიუსერებთან ერთად ახალი გეგმა შეიმუშავა.
“ამ ფილმის გადაღებები ფეხის მოტეხილობით დავასრულე. არ ვწუწუნებ, უბრალოდ ასე მოხდა.
ინცინდენტის შემდეგ საკუთარ თავს შეკითხვა დავუსვი: “შემეძლო თუ არა ფსიქოლოგიურად და
ფიზიკურად აგენტი 007-ის როლი კიდევ ერთხელ მომერგო.” როდესაც ჩემს მეუღლეს დავურეკე
და ჩემი ჯანმრთელობის მდგომარეობის შესახებ ვაცნობე, ბედნიერი ნამდვილად არ იყო. ცოტა
ხანი შევისვენე და პაუზა ავიღე… მქონდა იდეები, რომლებიც Casino Royale-ის გადაღებების
დროს გამიჩნდა. საბოლოოდ, პროდიუსერ ბარბარა ბროკოლის დავურეკე, ჩვენი იდეები
განვავრცეთ, ჩამოვაყალიბეთ და მიხარია, რომ ყველაფერი შესანიშნავად გამოგვივიდა.”
დენიელ კრეიგის ცხოვრება ჯეიმს ბონდის სერიებმა რადიკალურად შეცვალა, თუმცა, როგორც
ჩანს ყველაზე ემოციური ბრიტანელი მსახიობისთვის შემოქმედებით გუნდთან გამომშვიდობება
აღმოჩნდა.
“აგენტმა 007-მა ჩემი ცხოვრება წარმოუდგენლად შეცვალა. კარიერის დასაწყისში, ვიცოდი, რომ
ასე მოხდებოდა, მაგრამ ბოლომდე მაინც ვერ წარმოვიდგენდი ხოლმე მომავალში რა მელოდა.
მადლობა ჯეიმს ბონდს, რომ მომცა ასეთ შესანიშნავ ადამიანებთან თანამშრომლობის საშუალება.
პირველ რიგში, მადლობა მინდა გადავუხადო ფილმის პროდიუსერ ბარბარა ბროკოლის და
სცენარისტ მაიკლ ჯი ვილსონს, რომლებთან მუშაობა ჩემთვის ყველაზე დიდი პატივი იყო. ეს
სამსახური ჩემთვის იყო საქმე, რომლისთვის დილით ადრე ადგომა და გადასაღებ მოედანზე
წასვლა არასდროს მეზარებოდა.”
“ყველაფერი მომენატრება, თუმცა ყველაზე მეტად მაინც ადამიანებთან ურთიერთობა. ვიცი, ვიცი,
რომ სხვა ფილმებშიც მივიღებ მონაწილეობას, თუმცა ჯეიმს ბონდის გუნდთან სხვანაირი
ურთიერთობა მქონდა. ეს იყო პრივილეგია, რომლისთვისაც მადლობელი ვარ.”
