ქართველი მოდელი ლიზა კობერიძე Zuhair Murad-ის ახალ საქორწილო კამპანიაში გამოჩნდა. ცნობილი დიზაინერის ახალი კოლექცია რომანტიკული განწყობით, დახვეწილი სილუეტებითა და ზღაპრული ესთეტიკით გამოირჩევა.
კამპანიის კონცეფცია მარადიულ სიყვარულს ეძღვნება, რაც კოლექციის სახელწოდებაშიც აისახება – „დუმილის სასახლე“. Zuhair Murad-ისთვის დამახასიათებელი მდიდრული სტილი საქორწილო სამოსის ელეგანტურობასა და ქალურობას უსვამს ხაზს.
რაც შეეხება ლიზა კობერიძეს, მისი კარიერა 12 წლის ასაკში დაიწყო – სამოდელო კარიერის პირველი ნაბიჯები სააგენტო „ნატალიში“ გადადგა. მისი პირველი მზადება პოდიუმისთვის ნატა ბუჩუკურის ხელმძღვანელობით შედგა, შემდეგ კი ახალგაზრდა მოდელის პროფესიული გზა ეტაპობრივად განვითარდა. თავდაპირველად საქართველოში მიიღო გამოცდილება, 13 წლის ასაკში კი იტალიაში გაემგზავრა, რასაც ტოკიოსა და კორეაში მუშაობა მოჰყვა.
ლიზას კარიერაში მნიშვნელოვანი გარდატეხა 2021 წელს მოხდა. 16 წლის ასაკში ის მილანის მოდის კვირეულზე Dolce & Gabbana-ს ჩვენებაზე გამჩნდა, სადაც 2022 წლის გაზაფხული-ზაფხულის კოლექცია წარადგინა. ამ პერიოდში ქართველი მოდელი მილანის ერთ-ერთი წამყვანი სამოდელო სააგენტოს, MG Model-ის, წევრიც გახდა.
2026 წელს ქართველი მოდელი პარიზის მოდის კვირეულზე Georges Hobeika-ს კოლექციის წარდგენაშიც მონაწილეობდა. ახლა კი მისი კარიერის ახალი ეტაპი Zuhair Murad-ის საქორწილო კოლექციას უკავშირდებ – დიზაინერის 2027 წლის ზამთრის კოლექციას „დუმილის სასახლე“ ეწოდება და მარადიული სიყვარულის იდეას ეძღვნება.
ლიზა კობერიძის გზა, რომელიც საქართველოში, სამოდელო სააგენტო „ნატალიში“ დაიწყო, დღეს საერთაშორისო მოდის სახლების პროექტებში მონაწილეობით გრძელდება.
ასევე დაგაინტერესებთ:
გამოვა თუ არა მატილდა გვარლიანი „Victoria’s Secret“-ის შოუზე? – რა მინიშნებას ავრცელებს იმან ჰამამი
#OK! მატილდა გვარლიანი და ნასტასია ლეგრან-ბაბლუანი: ორი ქართველი მოდელი მილანის მოდის კვირეულზე
