ხვიჩა კვარაცხელია adidas-ის ახალი კამპანიის მთავარი სახეა. „პარი სენ-ჟერმენისა“ და საქართველოს ეროვნული ნაკრების ფეხბურთელი ბრენდის SPZL F.C.-ის 2026 წლის შემოდგომა-ზამთრის კოლექციას წარადგენს. ეს პროექტის მესამე კოლექციაა და ამჯერად კამპანიისთვის სწორედ ქართველი ფეხბურთელი შეირჩა.
SPZL F.C. adidas-ის ახალი მიმართულებაა, რომელიც ფეხბურთის კულტურას ყოველდღიურ სტილთან აერთიანებს. პროექტს გარი ასპდენი ხელმძღვანელობს – კოლექცია ფეხბურთის გარშემო არსებულ კულტურას, გულშემატკივრებს, მოგზაურობასა და იმ სტილს ეძღვნება, რომელიც სპორტის გავლენით ყოველდღიურ ცხოვრებაში დამკვიდრდა.
კოლექციაში შედის შავი სპორტული ქურთუკი და შესაბამისი შარვალი, გრძელმკლავიანი საფეხბურთო მაისური, მაისურები, ასევე შარფი, კეპი და სპეციალურად შექმნილი საფეხბურთო ბურთი. ფეხსაცმლის ხაზში კი ორი მოდელია – შავი ზამშის Gazelle SPZL F.C. და მწვანე-ყავისფერ ტონებში შესრულებული Winterhill SPZL F.C.
კვარაცხელიას adidas-თან თანამშრომლობა 2024 წელს დაიწყო. მაშინ ბრენდმა ფეხბურთელისთვის სპეციალურად შექმნილი Predator 24-ის მოდელი წარადგინა. ახლა კი მათი პარტნიორობა ყოველდღიური სამოსის მიმართულებითაც გრძელდება.
adidas SPZL F.C.-ის ახალი კოლექცია 25 სექტემბრიდან გამოვა. მისი შეძენა შეზღუდული რაოდენობით იქნება შესაძლებელი adidas CONFIRMED-ის პლატფორმაზე, adidas Originals-ის მაღაზიებსა და შერჩეულ სავაჭრო ობიექტებში.
