ჰეილი ბიბერი ლონდონში, Harry’s Bar-ში გამართულ ღონისძიებაზე კეროლაინ ბესეტ-კენედის ცნობილი კაბით გამოჩნდა – ეს კაბა, კეროლაინმა 1996 წელს, ჯონ ფ. კენედი უმცროსთან ქორწილის წინ გამართულ ვახშამზე მოირგო.
სადა და სხეულზე მორგებული სამოსის დიზაინი ნარცისო როდრიგესს ეკუთვნის. ის Cerruti-ს 1997 წლის გაზაფხული-ზაფხულის კოლექციისთვის შეიქმნა და კეროლაინის გარდერობის ერთ-ერთ გამორჩეულ ლუქად იქცა. ბიბერმა კაბას მინიმალისტური აქსესუარები და მაღალქუსლიანი ფეხსაცმელი შეუხამა.
ნარცისო როდრიგესი კეროლაინის ახლო მეგობარი და კოლეგა იყო – მათ ერთმანეთი Calvin Klein-ში მუშაობის პერიოდში გაიცნეს. სწორედ როდრიგესმა შექმნა კეროლაინის საქორწინო კაბაც, რომელმაც მოგვიანებით მოდის ისტორიაში ერთ-ერთი ყველაზე ცნობადი მინიმალისტური საქორწინო ლუქის სტატუსი შეიძინა.
ჰეილის არჩევანს თავად როდრიგესიც გამოეხმაურა და სოციალურ ქსელში ბიბერის ფოტო გააზიარა.
ჰეილი ბიბერის მინიმალისტური, 1990-იანი წლების ესთეტიკით შთაგონებული ჩაცმულობა არაერთხელ გამხდარა ყურადღების საგანი, თუმცა ამჯერად მან თავად კეროლაინის მიერ ჩაცმული ორიგინალი სამოსი მოირგო.
კეროლაინ ბესეტ-კენედი და ჯონ ფ. კენედი უმცროსი 1996 წელს დაქორწინდნენ. წყვილი 1999 წელს ავიაკატასტროფას ემსხვერპლა. კეროლაინი კი გარდაცვალებიდან ათწლეულების შემდეგაც კი მოდის ერთ-ერთ ყველაზე გავლენიან ფიგურად რჩება.
ასევე დაგაინტერესებთ:
#OK! როგორ გაცოცხლდა „Love Story“-ში კაროლინ ბესეტ-კენედის გამორჩეული სტილი
