15 ივნისს, თბილისში კონგოური წარმოშობის ცნობილი ფრანგი რეპერი GIMS (Gandhi Alimasi Djuna) კონცერტს გამართავს. შოუ კუს ტბაზე გაიმართება, სადაც ფრანგი რეპერი ქართველი მსმენელის წინაშე პირველად წარსდგება.
კარიერის დაწყებიდან დღემდე 38 წლის რეპერმა 5 მლნ-ზე მეტი ჩანაწერი გაყიდა, თუმცა საქართველოში პოპულარული სიმღერით „ნინაო“ გახდა. ამბავი 2025 წლის თებერვალში დაიწყო, როცა გიმსმა სოციალურ ქსელ TikTok-ზე ვიდეო გამოაქვეყნა, სადაც აჭარულ „განდაგანას“ ფრანგულად მღერის. ვიდეო სოციალურ ქსელში ვირუსულად გავრცელდა და მილიონობით ნახვა დააგროვა. ასეთი გამოხმაურების შემდეგ რეპერმა კლიპის გადაღება გადაწყვიტა.
აღსანიშნავია, რომ გიმსის სიმღერის კლიპში მონაწილეობას საფრანგეთში მოღვაწე ქართული ცეკვის ანსამბლის „ლაზი”-ს მოცეკვავეები იღებენ.
