ჰელოუინი ახლოვდება – დროა, საღამო მისტიკურ ისტორიებს, უცნაურ პერსონაჟებსა და ცოტაოდენ შიშს დაუთმოთ. ჯადოქრებზე, მოჩვენებებსა და იდუმალ სამყაროებზე შექმნილი ფილმები დღესასწაულის ატმოსფეროს კიდევ უფრო განსაკუთრებულს ხდის.
გთავაზობთ 5 ფილმს, რომლებიც ჰელოუინის განწყობის შექმნაში დაგეხმარებათ -საშინელებათა ჟანრის კლასიკიდან დაწყებული, ყველასთვის საყვარელი ანიმაციებით დასრულებული.
Hocus Pocus (1993)
ჰელოუინის თემაზე შექმნილ ფილმებს შორის „Hocus Pocus“ ერთ-ერთი ყველაზე ცნობილი ნამუშევარია. სიუჟეტი სამ ჯადოქარ დაზე მოგვითხრობს, რომლებიც საუკუნეების შემდეგ თანამედროვე სამყაროში ბრუნდებიან და ქალაქ სალემში ქაოსს იწვევენ. იუმორის, ჯადოსნური მოვლენებისა და მისტიკური ატმოსფეროს ერთობლიობა ფილმს ჰელოუინის საღამოსთვის შესაფერის არჩევანად აქცევს.
The Nightmare Before Christmas (1993)
ტიმ ბარტონის ანიმაცია ჰელოუინისა და შობის ატმოსფეროს აერთიანებს. ჰელოუინის ქალაქის მეფე, ჯეკ სკელინგტონი, შობის დღესასწაულით ინტერესდება, თუმცა მისი წარმოდგენა შობაზე მოსალოდნელისგან სრულიად განსხვავდება. უჩვეულო პერსონაჟები, დასამახსოვრებელი მუსიკა და ბნელი ზღაპრის ესთეტიკა „The Nightmare Before Christmas“-ს ჰელოუინის სეზონის ერთ-ერთ გამორჩეულ ფილმად აქცევს.
Coraline (2009)
ანიმაცია გოგონას, კორალაინის, შესახებ მოგვითხრობს, რომელიც ახალ სახლში საიდუმლო კარს აღმოაჩენს. კარის მიღმა არსებული სამყარო თავდაპირველად იდეალური ჩანს, თუმცა მალე ხვდება, რომ ამ ყველაფრის უკან საშიში საიდუმლო იმალება. „Coraline“ვიზუალური სტილითა და დაძაბული ატმოსფეროთი გამოირჩევა. ეს არის ისტორია მათთვის, ვისაც ზღაპრული თავგადასავლები მოსწონს, თუმცა ეკრანზე ცოტაოდენი სიბნელისა და იდუმალების ნახვაც სურს.
Beetlejuice (1988)
გარდაცვლილი წყვილი აღმოაჩენს, რომ მათ სახლში ახალი მფლობელები დასახლდნენ – საკუთარი საცხოვრებლის დასაბრუნებლად ისინი მოჩვენებას, ბითლჯუისს, მიმართავენ. თუმცა მისი დახმარება პრობლემებს უფრო ართულებს. ტიმ ბარტონის ეს ფილმი ზებუნებრივ მოვლენებს, შავ იუმორსა და გოთიკურ ესთეტიკას აერთიანებს. „Beetlejuice“ კარგი არჩევანია მათთვის, ვისაც ჰელოუინის განწყობის შექმნა საშიში, თუმცა სახალისო ისტორიით სურს.
The Addams Family (1991)
ჰელოუინის განწყობის შესაქმნელად „ადამსების ოჯახი“ (The Addams Family) კიდევ ერთი კარგი არჩევანია. პერსონაჟების მშვიდი, თუმცა თავისებური ცხოვრება მას შემდეგ იცვლება, რაც ოჯახში დიდი ხნის წინ დაკარგული ნათესავი ბრუნდება. შავი იუმორი, გოთიკური გარემო და პერსონაჟების გამორჩეული ხასიათი ფილმს ჰელოუინის თემატიკის ერთ-ერთ დასამახსოვრებელ ნამუშევრად აქცევს.
ასევე დაგაინტერესებთ:
