26 წლის ქართველმა სპორტსმენმა, ტატო გრიგალაშვილმა, ბაქოში მიმდინარე მსოფლიო ჩემპიონატზე ოქროს მედალი მოიპოვა და კარიერაში უკვე მეოთხედ მსოფლიოს ჩემპიონი გახდა.
გრიგალაშვილმა ფინალში აზერბაიჯანელი ზელიმ ცკაევი დაამარცხა. დაპირისპირება თითქმის 10 წუთს გაგრძელდა და გამარჯვებულის გამოსავლენად დამატებითი დრო გახდა საჭირო. საბოლოოდ ქართველმა ძიუდოისტმა გადამწყვეტი ილეთი შეასრულა და მსოფლიოს ჩემპიონობა მეოთხედ იზეიმა.
ტატოს გამარჯვებას მეუღლემაც ემოციური სიტყვებით მიულოცა და სოციალურ ქსელში პოსტი გამოაქვეყნა:
“ვიცი, რა დაგიჯდა აქამდე მოსვლა. ამიტომ ამ კოცნაში მხოლოდ დღევანდელი გამარჯვების სიხარული არ არის – ყველა ის დღეა, ის ტკივილია შენთან ერთად რომ გამოვიარე. მაინც გადავრჩი, მაინც ხელახლა დავიბადე შენი გამარჯვებით” – წერს თაკო გოგოლაძე.
ტატო გრიგალაშვილი
გრიგალაშვილის წარმატებული კარიერა გაცილებით ადრე დაიწყო. 2017 წელს მან ახალგაზრდულ ევროპის ჩემპიონატსა და მსოფლიო ჩემპიონატზე ბრინჯაოს მედლები მოიპოვა. 2018 წელს ევროპის ახალგაზრდულ ჩემპიონატზე ვერცხლის მედალოსანი გახდა, ხოლო 2019 წელს ახალგაზრდული ჩემპიონატიც მოიგო.
2020 წელი მის კარიერაში განსაკუთრებით მნიშვნელოვანი აღმოჩნდა. გრიგალაშვილმა დიუსელდორფის გრანდ სლემი მოიგო, შემდეგ კი ევროპის ჩემპიონატზეც გაიმარჯვა. ორი წლის შემდეგ, 2022-ში, იგი მსოფლიოს ჩემპიონის ტიტულის მფლობელი პირველად გახდა.
თუმცა ცხოვრების მნიშვნელოვანი ნაწილი მხოლოდ სპორტში მიღწეულ წარმატებებს არ უკავშირდება. მის უკან ოჯახი დგას, რომელსაც თავად ხშირად „საკუთარი ძალისა და მოტივაციის ერთ-ერთ მთავარ წყაროდ“ მოიხსენიებს.
“შეჯიბრზე, რომ გავდივარ, უფრო ძლიერი ვარ, ალბათ ძალას ჩემს უკან მდგომი ოჯახი მაძლევს. როცა ვიღაცისთვის ან რაღაცისთვის ბრძოლობ, მაშინ ბევრად ძლიერი ხარ, აი ამაშიც მეხმარება ჩემი მეუღლე. ჩემი მეუღლე არის ყველაფრის წყარო. ის არის დასაწყისიც და დასასრულიც. მინდა ჩემი პატარა რომ გაიზრდება ამაყი იყოს მამამისით” .
ტატო გრიგალაშვილის მეუღლე თაკო გოგოლაძეა. წყვილმა ჯვარი 2020 წელს დაიწერა. თაკომ მაშინ სოციალურ ქსელში ჯვრისწერის შესახებ იუმორით დაწერა: „გიჟური ისტორიის მთავარი გიჟობა, უცებ დავიწერე ჯვარი ადიდასის სპორტულებში. 11:08:2020. ჩვენს შორის ღმერთმა გაიარა.“
დღეს ტატოსა და თაკოს ორი შვილი, ემანუელი და ალექსანდრა, ჰყავთ. სპორტსმენის მეუღლე წლების განმავლობაში მის ყველაზე მნიშვნელოვან გულშემატკივრად რჩება და ტატოს გამარჯვებებს ხშირად სოციალურ ქსელშიც ეხმაურება.
7 სექტემბრის გამარჯვების შემდეგ, La Gazzetta Georgia-მ ვიდეო გაავრცელა, სადაც ტატომ მეუღლეზე მოკლე კომენტარი გააკეთა.
„ის თაიგული ყოველთვის დაკავებულია ჩემი მეუღლისთვის“, – აღნიშნა მან და კიდევ ერთხელ აჩვენა, რომ მის ყველაზე მნიშვნელოვან გულშემატკივრებს შორის განსაკუთრებული ადგილი სწორედ მეუღლეს, თაკო გოგოლაძეს, ეკუთვნის.
