1947 წლის 21 სექტემბერს საშინელებათა ჟანრის ერთ-ერთი გამორჩეული მწერალი, სტივენ კინგი დაიბადა – ავტორი, რომელმაც მკითხველებს არაერთი დაუვიწყარი პერსონაჟი და ისტორია აჩუქა.
კინგის წიგნებში საშინელება მხოლოდ ზებუნებრივ მოვლენებში არ იმალება. მისი ისტორიები ხშირად ადამიანურ შიშებზე, მარტოობაზე, დანაკარგზე, მეგობრობაზე, სიყვარულსა და იმ არჩევანებზე გვიყვება, რომლებიც პერსონაჟების ცხოვრებას სამუდამოდ ცვლის.
მწერლის ვრცელ ბიბლიოგრაფიაში არჩევანის გაკეთება მარტივი ნამდვილად არ არის, თუმცა არსებობს რამდენიმე ნაწარმოები, რომლებიც კინგის შემოქმედების გაცნობის მსურველმა აუცილებლად უნდა წაიკითხოს.
Carrie
„Carrie“ სტივენ კინგის პირველი რომანია. სწორედ ამ ნაწარმოებმა დაუდო საფუძველი მის დიდ ლიტერატურულ კარიერას. წიგნის მთავარი პერსონაჟი კერი უაიტი სკოლაში გარიყული და თანატოლების მხრიდან ბულინგის მსხვერპლი გოგოა, რომელსაც ზებუნებრივი ნიჭი აქვს.
საინტერესოა, რომ კინგმა თავდაპირველად ნაწარმოების ხელნაწერი გადააგდო, თუმცა მეუღლემ, ტაბითა კინგმა, მის დასრულებაში დაარწმუნა. მოგვიანებით „Carrie“ ბესტსელერად იქცა და კინგს საშუალება მისცა, მასწავლებლის სამსახური დაეტოვებინა და თავი მწერლობისთვის მიეძღვნა.
The Shining
1977 წელს გამოცემული „The Shining“ სტივენ კინგის ერთ-ერთი ყველაზე ცნობილი რომანია. მისი მთავარი გმირი, მწერალი ჯეკ ტორანსი, ოჯახთან ერთად ზამთრის გასატარებლად იზოლირებულ სასტუმრო „Overlook“-ში მიდის, თუმცა სასტუმროს განმარტოებული მდებარეობა და უცნაური, ბნელი წარსული ოჯახისთვის მალე ნამდვილ კოშმარად იქცევა.
მის მიხედვით სტენლი კუბრიკმა 1980 წელს ამავე სახელწოდების ფილმი გადაიღო. თუმცა წიგნსა და ფილმს შორის მნიშვნელოვანი განსხვავებებია, ამიტომ კინგის რომანის წაკითხვა მათთვისაც საინტერესო იქნება, ვისაც ეკრანიზაცია უკვე ნანახი აქვს.
IT
პატარა ქალაქ დერიში ბავშვების ჯგუფს ერთი საერთო მტერი ჰყავს – იდუმალი არსება, რომელიც ადამიანებს მათი ყველაზე დიდი შიშების სახით ევლინება.
„IT“ 1986 წელს გამოქვეყნდა და კინგის ერთ-ერთ ყველაზე ცნობილ რომანად ითვლება. თუმცა წიგნის მასშტაბი მხოლოდ საშინელ ისტორიას არ მოიცავს. მისი მნიშვნელოვანი ნაწილი ბავშვობას, მეგობრობას, შიშსა და იმ მოვლენებს ეხება, რომლებიც ადამიანებს წლების შემდეგაც თან მიჰყვებათ.
Pet Sematary
ლუის კრიდი მეუღლესა და შვილებთან ერთად ახალ სახლში გადადის. სახლის მახლობლად ბავშვების მიერ შექმნილი პატარა სასაფლაოა, სადაც ისინი საყვარელ შინაურ ცხოველებს მარხავენ. თუმცა ამ ადგილის მიღმა კიდევ ერთი, ბევრად უფრო საშიში საიდუმლო იმალება.
ლუისი მალე აღმოაჩენს, რომ არსებობს ადგილი, რომელსაც დაკარგული სიცოცხლის დაბრუნება შეუძლია. მაგრამ ის, რაც სიკვდილის დამარცხების შესაძლებლობას ჰგავს, ოჯახისთვის კოშმარის დასაწყისი ხდება.
The Green Mile
სიკვდილმისჯილთა საკანში დრო სხვაგვარად გადის – პატიმრებმა იციან, რომ მათი ცხოვრების ბოლო დღეები დგება.
სწორედ ასეთ გარემოში ვითარდება წიგნის სიუჟეტი – მთავარი პერსონაჟის, პოლ ეჯკომბის ცხოვრებას განსაკუთრებულად ცვლის ჯონ კოფის გამოჩენა – გოლიათი პატიმარი, რომელსაც ორი ბავშვის მკვლელობაში ადანაშაულებენ. მიუხედავად მისი გარეგნობისა, კოფი მშვიდი და კეთილი ადამიანია, რომელსაც უცნაური ზებუნებრივი უნარი აქვს.
1996 წელს გამოცემული „The Green Mile“ კინგის სხვა ნაწარმოებებისგან განსხვავებული გამოცდილებაა. ეს არის ისტორია სიკეთეზე, დანაშაულზე, უსამართლობაზე, სინდისსა და ადამიანურ თანაგრძნობაზე.
ასევე დაგაინტერესებთ:
#OK! სტივენ კინგი და მისი იდუმალებით მოცული ლიტერატურული სამყარო
