ამერიკელი მსახიობი RJ Mitte 34 წლის ასაკში გარდაიცვალა – იგი მაყურებელმა პოპულარული სერიალ „Breaking Bad“-იდან გაიცნო, სადაც უოლტერ უაითის შვილის როლს ასრულებდა.
მსახიობი ტეხასის შტატის ქალაქ ბრაუნსვილში, 12 ოქტომბერს გარდაიცვალა. მისი წარმომადგენლის განცხადებით, გარდაცვალების მიზეზი თვითმკვლელობაა.
ტრაგედიას მისი კოლეგები და მეგობრები ემოციური სიტყვებით ეხმაურებიან.
„არჯეი მიტი, ჩემი საყვარელი ვაჟი სერიალ „Breaking Bad“-ში, გარდაიცვალა.
მას მხოლოდ 14 წლის ასაკში შევხვდი, როდესაც უოლტერ უაით უმცროსის როლზე აიყვანეს. ეს როლი დიდი სიხარულითა და ენთუზიაზმით შეასრულა.
ცერებრალური დამბლით დაბადებული, ის არასდროს – არასდროს – უშვებდა, რომ ეს გამოწვევა რაიმეს საბაბად ქცეულიყო.
საკმაოდ გამოუცდელი იყო, როდესაც 2007 წლის თებერვალში საპილოტე ეპიზოდის გადაღება დავიწყეთ, თუმცა ნელ-ნელა შესანიშნავ მსახიობად იქცა და მალე შეზღუდული შესაძლებლობის მქონე მსახიობების აქტიური დამცველი გახდა. ხელმძღვანელობდა საქველმოქმედო ორგანიზაციას, რომელიც შეზღუდული შესაძლებლობის მქონე ადამიანების მხარდაჭერაზე იყო ორიენტირებული.
ეს ყველაფერი – დაპირებები და პოტენციალი – ახლა ნამდვილ დანაკარგად იქცა.
განსაკუთრებით დამანგრეველია იმის გაგება, რომ მან სიცოცხლე თვითმკვლელობით დაასრულა.
რატომ?
სულ რამდენიმე კვირის წინ ერთმანეთს ვწერდით და ვცდილობდით, გაგვერკვია, როდის შევძლებდით შეხვედრას. არ ვიცი, შეცვლიდა თუ არა ეს სადილი მის მომავალს…
მაგრამ ვიცი, რომ მიყვარდა და ძალიან მსიამოვნებდა მასთან ერთად ყოფნა…
მომენატრები, შვილო.“ – წერს ბრაიან კრენსტონი.
მეგობარს ემოციური სიტყვებით ემშვიდობება აარონ პოლიც, რომელიც სერიალში ჯესი პინკმენის როლს ასრულებდა.
„გული დამწყდა ამ ამბის მოსმენისას. RJ, მიყვარხარ, მეგობარო. მომენატრები“, – წერს მსახიობი.
RJ Mitte მაყურებელმა პოპულარული სერიალ „Breaking Bad“-იდან გაიცნო, სადაც მან უოლტერ უაით უმცროსის როლი შეასრულა. მსახიობი ცერებრალური დამბლით დაიბადა – იგივე მდგომარეობა ჰქონდა მის პერსონაჟსაც.
მსახიობმა საკუთარი გამოცდილება შეზღუდული შესაძლებლობის მქონე ადამიანების მხარდაჭერასაც მიუძღვნა – აქტიურად საუბრობდა კინოინდუსტრიაში ინკლუზიისა და შეზღუდული შესაძლებლობის მქონე მსახიობებისთვის მეტი შესაძლებლობის შექმნის მნიშვნელობაზე.
ასევე დაგაინტერესებთ:
#OK! სინდი კროუფორდის ერთადერთი ვაჟი, პრესლი გერბერი, 27 წლის ასაკში გარდაიცვალა
