“რიყის დოქები”
მტკვრის მარცხენა სანაპიროზე მდებარე „რიყის დოქები“ (ოფიციალური სახელწოდება — რიყის მუსიკისა და დრამის თეატრი და საგამოფენო დარბაზი) თანამედროვე ქართული არქიტექტურის ერთ-ერთი ყველაზე ცნობადი და სადავო პროექტია. შენობა 2012 წელს დასრულდა და მისი ავტორები მსოფლიოში ცნობილი იტალიელი არქიტექტორები — მასიმილიანო დორიანა ფუქსასები არიან.
ნაგებობის აშენება 75 მლნ ლარი დაჯდა. აღსანიშნავია, რომ 2016 წელს designboom.com-ის რეიტინგში ე.წ. “რიყის დოქები”, მსოფლიოს 10 საუკეთესო ნაგებობას შორის მოხვდა.
თავდაპირველი იდეა – მუსიკისა და დრამის თეატრის, ასევე საგამოფენო სივრცის შექმნა — სრულად ვერ განხორციელდა და შენობა ხანგრძლივი პერიოდის განმავლობაში თითქმის უფუნქციოდ იდგა.
დღეს „რიყის დოქები“ თბილისის თანამედროვე არქიტექტურის ერთ-ერთ ყველაზე განხილვად ნიმუშად რჩება – შენობა, რომელმაც საზოგადოების მხრიდან როგორც აღფრთოვანება, ისე კრიტიკა დაიმსახურა.
Hotel Biltmore
სასტუმრო 2016 წელს გაიხსნა – შენობა რუსთაველის გამზირზე, ისტორიული იმელის შენობის ტერიტორიაზე მდებარეობს, რომელიც თავის დროზე საბჭოთა პერიოდის ერთ-ერთ მნიშვნელოვან არქიტექტურულ ნაგებობად ითვლებოდა.
პროექტის მთავარი არქიტექტურული საფუძველი ძველი შენობისა და თანამედროვე მაღალსართულიანი კონსტრუქციის გაერთიანება გახდა. ისტორიული იმელის შენობა თავდაპირველად 1934-1938 წლებში აშენდა და მისი არქიტექტორი ალექსეი შჩუსევი იყო. სასტუმროს შექმნისას შენობა განახლდა და მას ახალი, მინის ცათამბჯენის ნაწილი დაემატა.
„ბილტმორი“ 32-სართულიანი, დაახლოებით 150 მეტრის სიმაღლის შენობაა. სასტუმროში განთავსებულია 200-ზე მეტი ნომერი, რესტორნები და საკონფერენციო სივრცეები.
პროექტმა საზოგადოების ნაწილის კრიტიკა გამოიწვია – ბევრმა მიიჩნია, რომ თანამედროვე ცათამბჯენი რუსთაველის გამზირის ისტორიულ არქიტექტურულ გარემოს არ შეესაბამებოდა და ძველი იმელის შენობის იერსახეს ჩრდილავდა.
Calligraphy Towers
ბათუმის თანამედროვე არქიტექტურის ერთ-ერთი გამორჩეული მაგალითია Calligraphy Towers — მრავალფუნქციური კომპლექსი, რომელიც ქალაქის ახალ ბულვარში მდებარეობს.
პროექტი 2020-იანი წლების დასაწყისში დასრულდა და მოიცავს საცხოვრებელ, სასტუმრო და კომერციულ სივრცეებს. კომპლექსის დეველოპერია კომპანია Grand Maison.
Paragraph Freedom Square
თბილისის ისტორიულ ცენტრში, თავისუფლების მოედანზე მდებარე Paragraph Freedom Square ბოლო წლების ერთ-ერთი ყველაზე მასშტაბური სასტუმრო პროექტია. მრავალფუნქციური კომპლექსი 2024 წელს გაიხსნა და საერთაშორისო სასტუმრო ბრენდის The Luxury Collection Hotels & Resorts (Marriott International) ქსელის ნაწილია.
პროექტის არქიტექტურული კონცეფცია საერთაშორისო არქიტექტურულმა კომპანია WATG-მა (Wimberly Allison Tong & Goo) შექმნა.
Paragraph Freedom Square 200-ზე მეტ ნომერსა და ლუქსს, რესტორნებს, საკონფერენციო სივრცეებს, სპა-ცენტრსა და სხვა პრემიუმ კლასის სერვისებს აერთიანებს. სასტუმროს ერთ-ერთი მთავარი გამორჩეული ნაწილი სახურავზე განთავსებული სივრცეებია, საიდანაც სტუმრებს თბილისის ისტორიული ნაწილის პანორამული ხედები ეშლებათ.
პროექტმა საზოგადოების ყურადღება ჯერ კიდევ მშენებლობის პროცესში მიიპყრო – როგორც ერთ-ერთმა ყველაზე ძვირადღირებულმა და მასშტაბურმა სასტუმრო ინვესტიციამ თბილისში. ამასთან, მისმა არქიტექტურულმა იერსახემ განსხვავებული შეფასებებიც გამოიწვია: ნაწილი მას თბილისის ცენტრის თანამედროვე განვითარების მაგალითად აფასებს, ნაწილი კი ისტორიულ გარემოში ასეთი მასშტაბის ახალი შენობის ინტეგრაციას აკრიტიკებს.
Tbilisi Gardens
ვაკის რაიონში მდებარე Tbilisi Gardens ბოლო ათწლეულის ერთ-ერთი ყველაზე მასშტაბური საცხოვრებელი პროექტია. კომპლექსის მშენებლობა რამდენიმე ეტაპად განხორციელდა და მისი ძირითადი ნაწილი 2016 წელს დასრულდა.
არქიტექტორი ბრიტანული საერთაშორისო კომპანია Chapman Taylor იყო, რომელიც მსოფლიოს სხვადასხვა ქვეყანაში საცხოვრებელი, კომერციული და ურბანული განვითარების პროექტებზე მუშაობს.
Tbilisi Gardens-ის მთავარი იდეა იყო შეექმნათ არა მხოლოდ მაღალსართულიანი საცხოვრებელი შენობები, არამედ სრულფასოვანი ურბანული გარემო. კომპლექსი აერთიანებს საცხოვრებელ სივრცეებს, კომერციულ ობიექტებს, გამწვანებულ ტერიტორიებსა და საერთო დასასვენებელ ზონებს.
Alliance Highline
ვაკეში, ჭავჭავაძის გამზირზე მდებარე Alliance Highline თბილისის ერთ-ერთი ყველაზე მაღალი და მასშტაბური მრავალფუნქციური საცხოვრებელი კომპლექსია. პროექტი სამი სხვადასხვა სიმაღლის მრგვალი კოშკისგან შედგება და მისი ყველაზე მაღალი შენობა 138 მეტრს აღწევს.
Alliance Highline-მა საზოგადოების ყურადღება პირველ რიგში თავისი მასშტაბითა და მდებარეობით მიიპყრო.
პროექტი მხოლოდ საცხოვრებელ სივრცეს არ მოიცავს — კომპლექსში გათვალისწინებულია ფიტნეს ცენტრი, სპა, დახურული საცურაო აუზი, რესტორნები, მაღაზიები, მრავალდონიანი ავტოსადგომი და სხვადასხვა სერვისი.
Axis Towers
Axis Towers ვაკეში, ჭავჭავაძის გამზირზე მდებარეობს. პროექტზე არქიტექტორებმა ალექსანდრე მეჟევიძემ, გეგა ასტახიშვილმა, ნინო მოსულიშვილმა და ნიკა კილასონიამ იმუშავეს. მრავალფუნქციური კომპლექსი, რომლის მშენებლობაც 2020-იანი წლების დასაწყისში დასრულდა, ორი 147-მეტრიანი კოშკისგან შედგება და საცხოვრებელ, საოფისე, სასტუმრო და კომერციულ სივრცეებს აერთიანებს. შენობის ერთ-ერთი მთავარი არქიტექტურული თავისებურება მისი დინამიკური ფორმაა — კოშკების თითოეული სართული ცენტრალური ბირთვის გარშემო ორი გრადუსით ბრუნავს, რაც შენობას მოძრაობის ეფექტს აძლევს.
Glass House
ბიძინა ივანიშვილის კერძო რეზიდენცია, რომელიც თბილისის სოლოლაკის ქედზე, ეროვნული ბოტანიკური ბაღის ზემოთ მდებარეობს.
კომპლექსის მშენებლობა 2000-იანი წლების დასაწყისში დაიწყო და 2010–2011 წლებში დასრულდა. პროექტის თავდაპირველი კონცეფცია რუს არქიტექტორს მიხაილ ხაზანოვს ეკუთვნის, ხოლო საბოლოო სახე ცნობილმა იაპონელმა არქიტექტორმა შინ ტაკამაცუმ ჩამოაყალიბა.
დაახლოებით 10 000 კვადრატულ მეტრზე გადაჭიმული კომპლექსი საცხოვრებელ და ადმინისტრაციულ ნაწილებს, ხელოვნების კოლექციის საგამოფენო სივრცეებს, ვერტმფრენის მოედანსა და მის ყველაზე ცნობილ ელემენტს — მინის სფეროს — აერთიანებს.
მიუხედავად იმისა, რომ შენობა საერთაშორისო გამოცემების ყურადღების ცენტრში მოექცა და თანამედროვე არქიტექტურის გამორჩეულ ნიმუშად შეფასდა, საქართველოში მას ხშირად აკრიტიკებდნენ როგორც მასშტაბის, ისე ქალაქის ისტორიულ ლანდშაფტთან მისი შეუსაბამობის გამო. სწორედ ამ განსხვავებული დამოკიდებულებებიდან გამომდინარე, Glass House დღემდე თბილისის ერთ-ერთ ყველაზე განხილვად და რეზონანსულ კერძო არქიტექტურულ პროექტად რჩება.
