პრინცესა დიანას გარდაცვალებიდან თითქმის 30 წლის შემდეგ მისი ძმა, ჩარლზ სპენსერი, პირად მემუარებს აქვეყნებს.
წიგნს, სახელწოდებით “Swan Song: Diana, My Sister“, მკითხველი 22 სექტემბრიდან იხილავს. სპენსერი მასში დიანას ცხოვრების, ოჯახური ურთიერთობებისა და მისი გარდაცვალების შემდეგ განვითარებული მოვლენების საკუთარ ვერსიას გვიყვება.
გამოცემის ოფიციალური აღწერის თანახმად, ავტორი დიანას ბავშვობის პერიოდზე, მშობლების განქორწინების გავლენასა და იმ ცვლილებებზე წერს, რომლებიც მის ცხოვრებაში ქორწინების შემდეგ დაიწყო.
სპენსერი ასევე იხსენებს დიანას გარდაცვალების დღეებს და იმ მოვლენებს, რომლებიც მისი დაკრძალვის წინ განვითარდა. სწორედ წიგნის ამ ნაწილმა მიიქცია საზოგადოების განსაკუთრებული ყურადღება.
ავტორის თქმით, დიანას დაკრძალვის პროცესში პრინც უილიამისა და პრინცი ჰარის მონაწილეობას ეწინააღმდეგებოდა. იმ დროს უილიამი 15 წლის იყო, ჰარი კი – 12-ის.
მისი აზრით, ბიჭებისთვის დედის კუბოს უკან საჯაროდ სიარული ძალიან მძიმე იქნებოდა და ამას თავად დიანაც არ ისურვებდა. საბოლოოდ, უილიამმა და ჰარიმ დაკრძალვის მსვლელობაში მონაწილეობა მაინც მიიღეს.
სპენსერი ამ საკითხზე პრინც ჩარლზთან დაძაბულ სატელეფონო საუბარსაც იხსენებს. მისი თქმით, სწორედ ამ საუბრის დროს უთხრა მას ჩარლზმა:
“დარწმუნებული იყავი, მას მალე დავივიწყებთ“ – ავტორის თქმით, მისთვის ეს სიტყვები იმდენად მოულოდნელი იყო, რომ საუბრის დასრულების შემდეგ გაოგნებული დარჩა.
წიგნში გამოთქმულ ამ მტკიცებას ბუკინგემის სასახლემ უჩვეულოდ სწრაფად და საჯაროდ უპასუხა.
სამეფო ოჯახი, როგორც წესი, მსგავს განცხადებებს არ ეხმაურება, თუმცა ამ შემთხვევაში სასახლის წარმომადგენელმა აღნიშნა, რომ მძიმე გლოვამ შესაძლოა ადამიანის მეხსიერებასა და განსჯის უნარზე გავლენა მოახდინოს.
“მიუხედავად იმისა, რომ ჩვენ, როგორც წესი, მსგავს შემთხვევებზე არ ვსაუბრობთ, მისი უდიდებულესობა აცნობიერებს, რომ ძმისა და დის დაკარგვით გამოწვეულმა ტკივილმა შეიძლება გავლენა მოახდინოს ადამიანის განსჯაზე, გადაწყვეტილების მიღებასა და მეხსიერებაზე“ – ნათქვამია სასახლის განცხადებაში.
სპენსერი კი აცხადებს, რომ მისი მიზანი დიანას შესახებ საკუთარი ხედვის გაზიარებაა და არა ახალი დაპირისპირების შექმნა.
“Swan Song: Diana, My Sister“ 2026 წლის 22 სექტემბერს გამოვა. გამოცემა 384 გვერდს მოიცავს და ხელმისაწვდომი იქნება როგორც ბეჭდური, ისე ელექტრონული და აუდიოვერსიის სახით.
მისმა რამდენიმე ეგზემპლარმა უკვე მიიპყრო ყურადღება. გავრცელებული ინფორმაციით, ნიდერლანდებში გამომცემლობისკენ მიმავალი სატვირთოდან წიგნის ჰოლანდიური გამოცემის ოთხი ასლი მოიპარეს.
ასევე დაგაინტერესებთ:
#OK! პრინცესა დიანა – ქალი, რომელმაც სამეფო ოჯახის ისტორია შეცვალა
#OK! ლეგენდარული პრინცესა დიანას საკულტო ფოტოები – ივლისში ის 64 წლის გახდებოდა
