ქართველი ზურაბ ძიძიგური ლიხტენშტეინის პრინცესა მარია-იმაკულატაზე დაქორწინდა. ვენაში გამართული სამეფო ქორწილის შესახებ ინფორმაცია საზოგადოებას მისმა დამ, ქრისტინე ბაგრატიონმა გაუზიარა, რომელიც საქართველოს სამეფო გვარის წარმომადგენლის, პრინც იოანე (ხუან) ბაგრატიონ-მუხრანელის მეუღლეა.
სამეფო ქორწილი 31 ოქტომბერს, ვენაში, წმინდა პეტრეს ეკლესიაში გაიმართა. პრინცესა, რომელიც პრინც გუნდაკარისა და პრინცესა მარი დ’ორლეანის ქალიშვილია, რჩეულს ხუთწლიანი ურთიერთობის შემდეგ გაჰყვა ცოლად.
HELLO!-მ ქორწილის პირველი ფოტოები გაავრცელა. ცერემონია განსაკუთრებული დეტალებით გამოირჩეოდა: სტუმრებს ოთხსართულიანი საქორწილო ტორტი დახვდათ, პატარძალი კი ეკლესიაში ეტლით მივიდა.
41 წლის პრინცესას საქორწილო კაბა ქართულმა ბრენდმა, “მარიონელამ” შექმნა. მის ჩაცმულობას კი განსაკუთრებულ ელფერს ისტორიული „ფარშევანგის“ ტიარა სძენდა, რომელიც 1926 წელს შეიქმნა. თავად საქმრო ცერემონიაზე ქართული ტრადიციული სამოსით გამოჩნდა.
წყვილმა ჯვრისწერისთვის ქრისტინე ბაგრატიონ-მუხრანელისა და იოანე ბაგრატიონ-მუხრანელის ქორწილისთვის დამზადებული გვირგვინები გამოიყენა. მათი დიზაინი თამარ მეფის ფრესკით არის შთაგონებული. გვირგვინებზე უფლისა და ღვთისმშობლის მინანქრის ხატებთან ერთად 12 ჯვარია გამოსახული, რომლებიც ქრისტეს მოციქულებსა და სვეტიცხოვლის სიმბოლიკას უკავშირდება.
პრინცესა მარია-იმაკულატა საქართველოში 2021 წელს ჩამოვიდა, სწორედ აქ გაიცნო ზურაბი და მათი ნაცნობობა მალე სიყვარულში გადაიზარდა.
ქორწილის ცერემონია მართლმადიდებლური წესით ჩატარდა და ქართული და ევროპული სამეფო ტრადიციები გააერთიანა.
წყვილის ურთიერთობა და ნიშნობა აქამდე საჯაროდ ცნობილი არ ყოფილა. როგორც ქრისტინე განმარტავს, ამის მიზეზი ლიხტენშტეინის სამთავრო სახლის დინასტიური წესები იყო. ქორწინებამდე ზურაბი პირადად შეხვდა ლიხტენშტეინის მონარქ პრინც ჰანს-ადამ II-ს, რომელიც მარია-იმაკულატას ბიძაა. ფორმალური პროცედურების დასრულების შემდეგ პრინცესა საქართველოს კათოლიკოს-პატრიარქ შიო III-საც წარუდგინეს.
მარიას იმაკულატა ლიხტენშტეინის პრინც გუნდაკარისა და საფრანგეთის სამეფო დინასტიის წარმომადგენლის, პრინცესა მარი დ’ორლეანის ქალიშვილია. იგი ევროპულ არისტოკრატიულ ოჯახებსაც უნათესავდება, მათ შორის ბურბონების, ჰაბსბურგებისა და ბავარიის ვიტელსბახების საგვარეულოებს.
ასევე დაგაინტერესებთ:
