ზრუნავდე ადამიანების უსაფრთხოებაზე, მოითხოვს პასუხისმგებლობას, ყურადღებასა და სიზუსტეს. როდესაც შენი საქმიანობა მოიცავს საფრთხის პრევენციასა და სიცოცხლის გადარჩენას, მცირე დეტალსაც კი მნიშვნელობა აქვს. სწორედ ამიტომ ეფუძნება საავტომობილო ინდუსტრია ნდობას. ადამიანს უნდა სჯეროდეს, რომ ის დაცულია ისეთ მომენტებში, რომელთა პროგნოზირებაც თავად არ შეუძლია. Airbag.ge ის კომპანიაა, რომელიც საქართველოში ავტომობილის უსაფრთხოების სისტემაზე დიდი ხანია ზრუნავს და რომლის მთავარი ღირებულებაც მგზავრთა დაცულობაა. ინტერვიუში Airbag.ge-ს დამფუძნებელი, გვანცა ჯოხარიძე, გვესაუბრება კომპანიის წარმატების მიზეზზე, განვლილ გზასა და მათ შორის იმაზეც, თუ როგორია იყო ქალი ლიდერი სივრცეში, სადაც კაცები დომინირებენ.
გვანცა, პლატფორმა Airbag.ge 2015 წელს დაარსდა და დღეს ერთ-ერთი წამყვანი ბრენდია საქართველოში უსაფრთხოების სისტემის აღდგენის მიმართულებით. თქვენი აზრით, რამ განაპირობა თქვენი ასეთი წარმატება?
ჩვენი წარმატება ერთ რამეზეა დაფუძნებული – პასუხისმგებლობაზე. Airbag.ge შევქმენით როგორც სერვისი, რომელიც ავტომობილის უსაფრთხოების ყველაზე კრიტიკულ ნაწილზე ზრუნავს. აქ შეცდომის ფასი ძალიან მაღალია, ამიტომ თავიდანვე ავირჩიეთ ხარისხი, ტექნოლოგია და სრული გამჭვირვალობა. ჩვენ მივყვებით სტანდარტს, რომლის მიხედვითაც თითოეული მომსახურება სრულდება ორიგინალი დეტალებით, თანამედროვე მოწყობილობებითა და ინჟინრული სიზუსტით. ამას დაემატა სწრაფი მომსახურება, პროფესიონალიზმი და მომხმარებელთან გულწრფელი დამოკიდებულება. შედეგიც ისეთი გამოვიდა, რომ დღეს Airbag.ge არა უბრალოდ სერვისი, არამედ საიმედო პარტნიორია.
ადამიანის უსაფრთხოება თქვენი ბრენდის მთავარი ღირებულებაა. როგორ/რაში გამოიხატება ეს თქვენს ყოველდღიურ საქმიანობაში?
უსაფრთხოება ჩვენთვის გრძელვადიანი პასუხისმგებლობაა და არა უბრალოდ ლოზუნგი. ყოველდღე ვმუშაობთ ავტომობილების ისეთ კრიტიკულ ნაწილებთან, როგორებიცაა უსაფრთხოების ბალიშები, სენსორები, მოდულები და ღვედები. თითოეულის შეკეთება პირდაპირ გულისხმობს ადამიანის სიცოცხლეზე ზრუნვას. პრაქტიკულ სამუშაოსთან ერთად დიდ ყურადღებას ვუთმობთ უსაფრთხოების შესახებ ცნობიერების ამაღლებას. მომხმარებლებს ვუხსნით, როგორ მუშაობს მათი ავტომობილის უსაფრთხოების სისტემა, რა რისკებს ქმნის უხარისხო დეტალი და რატომ შეუძლია ერთ სწორად მიღებულ გადაწყვეტილებას სიცოცხლის გადარჩენა. ვქმნით და ვავრცელებთ საგანმანათლებლო კონტენტს, რომელიც საზოგადოებას ავტოსაგზაო შემთხვევის დროს დაიცავს.
გვანცა, თქვენ მუშაობთ ისეთ სფეროში, რომელშიც ტრადიციულად მამაკაცები დომინირებენ. რამ გიბიძგათ საავტომობილო ბიზნესში ჩართულიყავით?
ეს სფერო ჩემთან ბუნებრივად მოვიდა, რადგან Airbag.ge საოჯახო ბიზნესი იყო. ორი წლის წინ გადავწყვიტე პასუხისმგებლობა სრულად ამეღო და სერვისი ახალ, მაღალ სტანდარტზე ამეყვანა. თავიდანვე მქონდა სურვილი დამენახვებინა, რომ ავტომომსახურება შეიძლება სრულიად სხვა დონეზე განხორციელდეს – თანამედროვე გარემოში, პროფესიონალურად, გამჭვირვალე პროცესებითა და მომსახურებით, რაც მომხმარებელს შენდამი ნდობას უჩენს. როცა ამ სფეროში ჩაერთვები, გესმის, რა რეალური გავლენა აქვს შენს საქმეს ადამიანების ცხოვრებაზე. სწორედ ეს იყო ჩემი მთავარი მოტივაცია – კეთება საქმის, რომელსაც აქვს კონკრეტული შედეგი – ადამიანების სიცოცხლის დაცვა.
თქვენი აზრით, რა ღირებულებებს სძენს საავტომობილო სფეროს ქალური თვისებები?
მე პირადად არ მიყვარს თვისებების ქალურ და მამაკაცურ კატეგორიებად დაყოფა, პროფესიონალიზმს სქესი არ აქვს. ქალს ბიზნესში ყოველთვის შემოაქვს ხედვა, დეტალებზე ორიენტირება და ემპათია.
საავტომობილო სფეროში, სადაც ხშირად მხოლოდ ტექნიკურ ნაწილს უყურებენ, მე დამატებით შევიტანე მომხმარებელზე ზრუნვის კულტურა: კომუნიკაცია, კომფორტი, გამჭვირვალობა, სერვისის ადამიანური მხარე. ტექნიკური ცოდნა აუცილებელია, მაგრამ როდესაც ამას ემატება ემოციური ინტელექტი, შედეგი ბევრად მაღალი ხარისხის გამოდის.
როგორ შეაჯამებდით Airbag.ge-სთვის 2025 წელს? რა იყო ყველაზე დიდი მიღწევები და სირთულეები?
2025 წელი Airbag.ge-სთვის აქტიური განვითარებისა და წინსვლის წელი იყო. ერთ-ერთი ყველაზე მნიშვნელოვანი მიღწევაა „აწარმოე საქართველოს“ მხარდაჭერა და მიღებული გრანტი, რომლის დახმარებითაც შევძელით სერვისის გაფართოება, სამუშაო სივრცის მოდერნიზება და ბიზნესპროცესების გაციფრულება. ეს ნაბიჯი მომსახურებას კიდევ უფრო სწრაფსა და გამჭვირვალეს გახდის. 2025 წლის კიდევ ერთი მნიშვნელოვანი მიღწევა იყო უსაფრთხოების შესახებ ცნობიერების ამაღლების კამპანიები. გარდა ამისა, დიდ წარმატებად მიმაჩნია მომხმარებლების ნდობის გაზრდაც. ავტომობილის უსაფრთხოების სისტემები ისეთი სფეროა, სადაც ნდობას ვერ იყიდი – ის მხოლოდ ხარისხითა და რეალური შედეგებით მოიპოვება. განვითარებას ყოველთვის თან სდევს სირთულეებიც, თუმცა ჩვენ ეს გვაძლევს მოტივაციას, რომ არასდროს გავჩერდეთ.
რა გასწავლათ განვლილმა წელმა პირადად თქვენ, როგორც ლიდერს?
ამ წელმა მასწავლა, რომ ლიდერობა მხოლოდ მართვა არ არის – ეს არის მუდმივი განვითარება. როცა ოჯახური ბიზნესიდან მოდიხარ, განსაკუთრებულად მნიშვნელოვანია შეინარჩუნო ის ღირებულებები, რომლებზეც ყველაფერი აიგო, მაგრამ ასევე, დაამატო ახალი ენერგია და ხედვა. სწორედ ამ სინთეზმა გააძლიერა ჩვენი გუნდი. და რაც მთავარია: ლიდერი მხოლოდ მაშინ იზრდება, როცა არ ეშინია ახალი გამოწვევების. ყოველი სირთულე შესაძლებლობაა სწავლისა და გაძლიერების.
ტექსტი: მარიამ მათიაშვილი
ფოტო: გვანცა ზარქუა
