ქალის ცხოვრებაში ერთ-ერთი ყველაზე მნიშვნელოვანი ქორწილის დღეა, ხოლო საქორწილო კაბა, დიადემა თუ თაიგული ამ დღის აუცილებელი ატრიბუტებია. მათი შერჩევა კი არც ისე იოლია. სწორედ ამ პროცესის უფრო გამარტივებასა და ქორწილისთვის ყველა საჭირო პროდუქტის შერჩევაში „საქორწილო გამოფენა“ დაგეხმარებათ, რომელიც პირველად გასულ წელს ჩატარდა. წელს კი გამოფენა 21 აპრილს მთელი დღის მანძილზე „პულმან აქსის თაუერსში“ გაიმართება. აღნიშნული გამოფენის მიზანი ქართული ბრენდების პოპულარიზაციაა. უფრო ვრცლად Wedding Exhibition-ის შესახებ მისი ორგანიზატორები გვესაუბრნენ.
სოფია გურეშიძე (კინოპროდიუსერი და Under One Sky Production-ის დამფუძნებელი): წლებია უკვე, პროექტები ინდოეთიდან და დუბაიდან ჩამოგვაქვს, ვიღებთ მუსიკალურ კლიპებს და რეკლამებს. პარალელურად ვმოღვაწეობთ მოდის ინდუსტრიაში, ქართველი დიზაინერების კოლექციას მეზობელ ქვეყნებში ვუწევთ პოპულარიზაციას და ამასთანავე, უცხოელი დიზაინერები ჩამოგვყავს საქართველოში. აღასანიშნავია, რომ მათ მოჰყვება თავიანთი აუდიტორია – „ბაიერები“, ხდება მათი გაცნობა ადგილობრივ ბრენდებთან და ხელშეწყობა სამომავლო კოლაბორაციებში. ამ ყველაფრის პარალელურად, წელიწადში ერთხელ, მე და ჩემი ბიზნესპარტნიორები ვერთიანდებით Wedding Exhibition-ის ორგანიზებისთვის.
„საქორწილო გამოფენის“ ჩატარების იდეა პანდემიის შემდგომ გაჩნდა, რადგან ამ სფეროში არაფერი ხდებოდა და 2023 წელს „საქორწილო გამოფენის“ პირველი სეზონი შევთავაზეთ საზოგადოებას. გვყავდა 104 კომპანია და სტუმრებზე 300-ზე მეტი საჩუქარი გაიცა. გამოფენაზე მოსულ ადამიანს ხვდებოდა ყველა ის კომპანია, რომელიც საჭიროა ქორწილისა თუ წვეულების ორგანიზებისთვის, დაწყებული მოსაწვევი ბარათებით, საქორწილო თუ სადღესასწაულო კაბებით, ხელნაკეთი აქსესუარებით, ქართული ტრადიციული სამოსითა და დამთავრებული დეკორით.
თამარ წიკლაური (დიზაინერი, ბრენდ AtaBata-ს დამფუძნებელი და კრეატიული დირექტორი): AtaBata – თითქმის 10 წელია საქართველოში ოპერირებს და მომხმარებელს სთავაზობს ხელნაკეთ უნიკალურ საქორწილო დიადემებსა და აქსესუარებს. 2018 წელს კი ბრენდის პრეზენტაცია პარიზში შედგა, ბიჟორკას სამკაულის საერთაშორისო ფესტივალზე, სადაც ნამუშევრებმა დიდი მოწონება დაიმსახურა, რასაც მოჰყვა საინტერესო შეთავაზებები ახალ პარტნიორებთან. მას შემდეგ ვთანამშრომლობთ სხვადასხვა პრესტიჟულ სილამაზის კონკურსებსა და მედიასთან პარიზსა და ლუქსემბურგში. აღსანიშნავია, რომ პარიზისა და მილანის მოდის კვირეულებზე მიწვეულ ჩვენს პარტნიორებს ამშვენებდათ AtaBata-ს ვერცხლი ახალი საავტორო კოლექციიდან.
მარიამ სილაგაძე (ივენთკომპანია Grand Day Events-ის დამფუძნებელი): წლების მანძილზე ვიყავი საერთაშორისო ორგანიზაცია AIESEC-ის წევრი და ხშირად ვმონაწილეობდი ნაციონალური კონფერენციების ორგანიზებაში. მას შემდეგ, რაც პოლონეთში, კერძოდ, ვარშავაში გადავედი საცხოვრებლად, სწავლასთან ერთად გამოცდილება დავაგროვე სხვადასხვა ივენთის დაგეგმვაში, მათ შორის ქორწილების. გარკვეული ცოდნის მიღების შემდეგ, საქართველოში დაბრუნებულმა, მე და ჩემმა ბიზნესპარტნიორმა, ჟანა სილაგაძემ, საკუთარი ივენთკომპანია დავაარსეთ და დღეს უკვე წარმატებით ვპოზიციონირებთ ბაზარზე.
გვინდოდა საქორწილო სექტორის წარმომადგენლების სხვა კუთხით გაერთიანება ერთ სივრცესა და დროში. გასულ წელს თამარსა და სოფიასთან ერთად შესაძლებლობა მოგვეცა, გაგვეერთიანებინა ჩვენი ცოდნა და ძალები და დაგვეგეგმა ღონისძიება, რომელიც ამ ინდუსტრიას სრულად გამოაფხიზლებდა კოვიდის შემდეგ. პირველი სეზონის წარმატებით დასრულებისა და მოთხოვნის ზრდის შემდეგ აქტიურად ვმუშაობთ მეორე სეზონზე, რათა კიდევ უფრო მეტ ახალ ბრენდსა და კომპანიას მივცეთ საკუთარი თავის პრეზენტაციის საშუალება.
რა არის საქორწილო გამოფენის მთავარი მიზანი?
სოფია გურეშიძე: უპირველესად ის, რომ მომავალ პატარძალს გავუმარტივოთ საქორწილო დღის ორგანიზება და ამ დღის ყველა საჭირო ატრიბუტის მრავალფეროვანი არჩევანი ერთ სივრცეში დავახვედროთ. ამასთანავე, გამოფენაზე მოსულ სტუმრებს გავაცნოთ საქართველოში წარმოებული პროდუქცია. წინა წელს წარმატებით შედგა B2B. საქართველოს წამყვან ინფლუენსერებთან დავაკავშირეთ კომპანიები და წელს უკვე კოლექციები საერთაშორისო მოდის კვირეულებზე მოხვდა. სწორედ ამიტომ გადავწყვიტეთ პროექტის გაგრძელება.
თამარ წიკლაური: დიდი სურვილი გვაქვს, რომ საქართველოში საქორწილო ტურიზმი კიდევ უფრო განვავითაროთ და საქართველო გახდეს ერთ-ერთი მიმზიდველი ადგილი, სადაც უცხოელ წყვილებს ენდომებათ ამ მნიშვნელოვანი დღის აღნიშვნა.
მარიამ სილაგაძე: გარდა ბიზნესსექტორისა, ღონისძიებაზე მოწვეული იქნებიან სტილისტები, რომლებიც ძალიან მნიშვნელოვან როლს თამაშობენ ვიზუალური თუ კონცეპტუალური სტილის აგებაში, იქნება ეს დეკორაცია თუ ლუქი. ძალიან საინტერესო, ლამაზი და მრავალფეროვანი ღონისძიება გველოდება წინ.
MUA (Hair and make up) ელენე ანთაძე
სამოსი : NeNe•ნენე
ტექსტი: სოფიო მალანია
ფოტო: ალექსეი სეროვი
