შეგახსენებთ, რომ მარტში ჯონათან ანდერსონმა Loewe – ს კრეატიული დირექტორის პოზიცია დატოვა, რომელსაც 11 წლის განმავლობაში ხელმძღვანელობდა. 2025 წლის აპრილში ფრანგული მოდის სახლის Dior ახალი კრეატიული დირექტორი გახდა. ჟუნრალი OK! უფრო ახლოს გაგაცნობთ დიზაინერს.
,,როდესაც სადმე მივდივარ, ვცდილობ თავს მოვაჩვენო, რომ მოდის სფეროში არ ვმუშაობ“ – ამბობს interview magazine – თან ინტერვიუში.
ბავშვობა და კარიერის დასაწყისი
ჯონათან ანდერსონი 1984 წელს, ჩრდილოეთ ირლანდიაში, მაგერფელტში დაიბადა. მამა ირლანდიის რაგბის ნაკრების კაპიტანი იყო, დედა ინგლისურის მასწავლებელია, ხოლო ძმა – ტომასი დღეს JW Anderson – ის ბრენდში მუშაობს.
ბავშვობაში დისლექსია (კითხვის უნარის დაქვეითება) ჰქონდა, რამაც მნიშვნელოვანი გავლენა მოახდინა მის განვითარებაზე, თუმცა ეს დაავადება ჯონათანის განსხვავებული ხედვის და სამყაროს აღქმის წინაპირობა აღმოჩნდა, რაც შემოქმედებაში გამოიხატა.
„წაკითხვის ნაცვლად, ვიზუალურად აღვიქვამდი სამყაროს,“ – იხსენებს ანდერსონი.
ანდერსონი თავიდან მსახიობობაზე ოცნებობდა. სწავლობდა თეატრალურ ხელოვნებას აშშ-ში, თუმცა საკუთარი იდეების გამოხატვის უფრო საინტერესო გზა მოდის ინდუსტრიაში იპოვა. ვაშინგტონში ცხოვრების პერიოდში გააცნობიერა და ისაუბრა საკუთარ სექსუალურ იდენტობაზე. დიზაინერის თქმით, ეს დრო ყველაზე გარდამტეხი იყო მის ცხოვრებაში.
შემდეგ სწავლობდა London College of Fashion-ში, ხოლო პარალელურად მუშაობდა Prada-ში ვიზუალური მერჩენდაიზერის პოზიციაზე.
ბრენდი – JW Anderson 2008 წელს დაარსდა. 2013 წლიდან Loewe – ს კრეატიული ხელმძღვანელია და მისი წარმატებული ტრანსფორმაცია ხშირად არის საზოგადოების განხილვის თემა.
პირადი ცხოვრება
„პირადის ცხოვრების დაცვა არის ის, რაც შემოქმედებით ენერგიას მინარჩუნებს“ – ამბობს ანდერსონი.
აღნიშნავს, რომ ყველაზე მშვიდად მაშინ გრძნობს თავს, როცა მარტო რჩება – ველოსიპედით სეირნობს, კერამიკაზე მუშაობს და მუსიკას უსმენს. არ ესწრება ხმაურიან წვეულებებს, წითელი ხალიჩა მისთვის დამღლელი რიტუალია. ბევრისთვის შესაძლოა უცნაურად ჟღერს, მაგრამ სწორედ ეს დისტანცია აძლევს შესაძლებლობას დაიცვას საკუთარი შემოქმედებითი სამყარო. მისი ყოველდღიურობა სავსეა მარტივი რიტუალებით, სიჩუმითა და ფიქრით.
ანდერსონისთვის პირადი ცხოვრება სივრცეა, რომელსაც ძალიან უფრთხილდება, რაზეც მედიასთან არასდროს საუბრობს. როგორც ცნობილია, იგი ურთიერთობაშია კატალონელ არტისტ და Loewe ბრენდის წამყვან დიზაინერ პოლ ანგლადასთან, რომელსაც ჯონათანი თავის ინსპირაციას უწოდებს.
