მართვის მოწმობის აღება ბევრისთვის ინსტრუქტორის ძებნით, ფასების შედარებითა და თეორიული მასალების მოძიებით იწყება. სწორედ ამ პროცესის გასამარტივებლად შეიქმნა iDrive – ქართული ტექნოლოგიური პლატფორმა, რომელიც მართვის მოწმობის მისაღებად საჭირო სერვისებს ერთ სივრცეში აერთიანებს.
მომხმარებელს შეუძლია, შეარჩიოს სასურველი ინსტრუქტორი ან ავტოსკოლა, გაეცნოს თეორიულ მასალებსა და საგამოცდო ბილეთებს, სამომავლოდ კი პრაქტიკული გამოცდის სიმულატორითაც ისარგებლოს.
პლატფორმის მიზანი მხოლოდ ინფორმაციის ხელმისაწვდომობა არ არის – iDrive ცდილობს, მართვის მოწმობის მიღების პროცესი უფრო ორგანიზებული, გამჭვირვალე და ნაკლებად სტრესული გახადოს როგორც მოსწავლეებისთვის, ისე ინსტრუქტორებისა და ავტოსკოლებისთვის.
როგორ გაჩნდა iDrive-ის შექმნის იდეა, რა შესაძლებლობებს სთავაზობს ის მომხმარებლებს და როგორია პლატფორმის განვითარების სამომავლო ხედვა – ამ თემებზე OK! Magazine-ს iDrive-ის დამფუძნებელსა და აღმასრულებელ დირექტორს, თამარ გაგნიაშვილს ესაუბრა.
პირველ რიგში, რა არის iDrive და რა იდეა დგას ამ პლატფორმის შექმნის უკან?
iDrive არის ქართული ტექნოლოგიური პლატფორმა, რომელიც მართვის მოწმობის მიღებისთვის საჭირო სერვისებს ერთ სივრცეში აერთიანებს. ჩვენი მიზანია, ეს პროცესი ადამიანებისთვის უფრო მარტივი, ხელმისაწვდომი და გამჭვირვალე გავხადოთ.
იდეა პირადი გამოცდილებიდან გაჩნდა. როდესაც მართვის მოწმობის აღება გადავწყვიტე, აღმოვაჩინე, რომ სწორი ინსტრუქტორის პოვნა არც ისე მარტივი იყო. ინფორმაცია სხვადასხვა სოციალურ ქსელსა და ჯგუფში იყო გაფანტული, რთული იყო ფასების, პირობებისა და გამოცდილების შედარება. მოგვიანებით კი დავინახე, რომ პრობლემები მხოლოდ მოსწავლეებს არ ჰქონდათ – ინსტრუქტორებიც ყოველდღიურად აწყდებოდნენ ორგანიზაციულ სირთულეებს, გაუქმებულ გაკვეთილებსა და დროის არაეფექტურ მართვას.
როგორც დეველოპერმა, ამ პრობლემის ტექნოლოგიური გადაწყვეტის შექმნა გადავწყვიტე. ასე გაჩნდა iDrive – პლატფორმა, რომელიც მხოლოდ ინსტრუქტორის მოძებნას არ ემსახურება. ჩვენი ხედვაა, ადამიანს მართვის მოწმობის აღების მთელი გზა, თეორიული მომზადებიდან პრაქტიკულ გამოცდამდე, ერთ სივრცეში გავუმარტივოთ.
როდესაც ადამიანი მართვის მოწმობის აღებას იწყებს, ხშირად პირველი სირთულე სწორედ კარგი ინსტრუქტორის პოვნაა. როგორ ეხმარება ამაში iDrive მომხმარებელს?
დღეს საქართველოში ინსტრუქტორის მოძებნის ერთ-ერთი ყველაზე გავრცელებული გზა ნაცნობების რეკომენდაციები და სოციალური ქსელებია. თუმცა ის, რაც ერთი მოსწავლისთვის კარგი არჩევანია, მეორისთვის შესაძლოა სრულიად შეუსაბამო აღმოჩნდეს. გარდა ამისა, მომხმარებელს ხშირად უწევს სხვადასხვა ინსტრუქტორთან დაკავშირება, ფასების გარკვევა და თავისუფალი დროების მოძიება.
iDrive-ზე ეს ინფორმაცია ერთ სივრცეშია თავმოყრილი. მომხმარებელს შეუძლია შეარჩიოს ინსტრუქტორი ან ავტოსკოლა სასურველი მდებარეობის, ფასის, მომსახურებისა და სხვა მნიშვნელოვანი კრიტერიუმების მიხედვით, გაეცნოს მათ პროფილებს და დაუკავშირდეს სასურველ სპეციალისტს.
ჩვენთვის განსაკუთრებით მნიშვნელოვანია შეფასებების სანდოობა. სწორედ ამიტომ ვმუშაობთ სისტემაზე, სადაც შეფასებების დატოვება რეალურ მოსწავლეებს შეეძლებათ. გვინდა, ინსტრუქტორის არჩევა მხოლოდ რეკომენდაციებსა და შემთხვევით ინფორმაციაზე აღარ იყოს დამოკიდებული.
ჩვენი მიზანია, მოსწავლემ არჩევანი ინფორმირებულად გააკეთოს და სწორი ინსტრუქტორის ძებნაში ზედმეტი დრო და ენერგია აღარ დახარჯოს.
რა იყო ყველაზე მნიშვნელოვანი პრობლემა, რომლის მოგვარებაც iDrive-ის შექმნისას გინდოდათ?
ყველაზე მნიშვნელოვანი პრობლემა, რომელსაც ამ სფეროში ვხედავდი, ერთიანი, გამჭვირვალე და სანდო სისტემის არარსებობა იყო.
საქართველოში ბევრი კარგი ავტოინსტრუქტორი და ავტოსკოლაა, თუმცა მომხმარებელს არ აქვს მარტივი შესაძლებლობა, ერთ სივრცეში შეადაროს მათი მომსახურება და მიიღოს გადაწყვეტილება სრულყოფილი ინფორმაციის საფუძველზე. ამავდროულად, თავად ინსტრუქტორებსაც არ აქვთ ყოველთვის შესაბამისი ციფრული ინსტრუმენტები, რომლებიც ყოველდღიური საქმიანობის ორგანიზებაში დაეხმარებათ.
მაგალითად, მოსწავლის მიერ ბოლო წუთს გაუქმებული გაკვეთილი ინსტრუქტორისთვის დაკარგული დრო და შემოსავალია. მეორე მხრივ, ინსტრუქტორის მიერ გაუქმებული გაკვეთილი მოსწავლისთვისაც დამატებით სირთულეებს ქმნის. მსგავსი პრობლემები ორივე მხარეს აზარალებს.
ამიტომ თავიდანვე გვინდოდა ისეთი პლატფორმის შექმნა, რომელიც მხოლოდ ერთ მხარეს კი არ დაეხმარებოდა, არამედ მოსწავლეებს, ინსტრუქტორებსა და ავტოსკოლებს შორის ურთიერთობას უფრო ორგანიზებულსა და გამჭვირვალეს გახდიდა.
საბოლოოდ, ჩვენი მიზანი არ არის უბრალოდ კიდევ ერთი ვებსაიტის შექმნა – გვინდა, ამ სფეროში მომსახურების ახალი სტანდარტის ჩამოყალიბებას შევუწყოთ ხელი.
რას სთავაზობს iDrive მომხმარებელს ისეთს, რასაც დღეს ცალკე აღებული ავტოსკოლა ან ავტოინსტრუქტორი ვერ სთავაზობს? რა არის ის მთავარი შესაძლებლობა ან უპირატესობა, რომელიც iDrive-ს სხვებისგან გამოარჩევს?
iDrive-ის მთავარი უპირატესობა არჩევანის თავისუფლება და სერვისების ერთ სივრცეში გაერთიანებაა. ცალკეული ავტოსკოლა ან ინსტრუქტორი მომხმარებელს საკუთარ მომსახურებას სთავაზობს, iDrive კი საშუალებას აძლევს, სხვადასხვა შეთავაზება ერთმანეთს შეადაროს და თავად გადაწყვიტოს, რომელი მათგანია მისთვის საუკეთესო.
ამასთან, მართვის მოწმობის მიღება მხოლოდ პრაქტიკული გაკვეთილებით არ შემოიფარგლება.
მოსწავლეს სჭირდება თეორიული ცოდნა, საგამოცდო ბილეთებზე მუშაობა, პროგრესის შეფასება და პრაქტიკული გამოცდისთვის მომზადება. სწორედ ამიტომ iDrive-ზე უკვე ხელმისაწვდომია თეორიული მასალები, საგზაო ნიშნები, საგამოცდო ბილეთები და სხვა სასარგებლო ინფორმაცია.
მომავალში კი ვგეგმავთ თეორიული კურსების დამატებასაც. ჩვენთვის მნიშვნელოვანია ხელმისაწვდომობაც. მაგალითად, ვმუშაობთ ისეთი თეორიული კურსების შექმნის იდეაზე, რომლებიც სუბტიტრებით იქნება ხელმისაწვდომი და სმენადაქვეითებულ ადამიანებს დამოუკიდებლად მომზადების მეტ შესაძლებლობას მისცემს.
iDrive არ ცდილობს ავტოსკოლებისა და ინსტრუქტორების ჩანაცვლებას. პირიქით, ჩვენი მიზანია
მათი მომსახურება უფრო მეტ ადამიანს გავაცნოთ, ხოლო მოსწავლეს მივცეთ თავისუფლება, თავად აირჩიოს მისთვის შესაფერისი სასწავლო გზა.
გაქვთ თუ არა გეგმაში ისეთი სერვისების დამატება, რომლებიც დღეს საქართველოში მართვის მოწმობის აღების პროცესში საერთოდ არ არსებობს?
დიახ, და სწორედ ეს არის iDrive-ის განვითარების ერთ-ერთი ყველაზე საინტერესო მიმართულება.
ამჟამად ვმუშაობთ პრაქტიკული გამოცდის სიმულატორის იდეაზე, რომელიც მომხმარებელს რეალურ გამოცდამდე საგამოცდო პროცესთან მაქსიმალურად მიახლოებული გამოცდილების მიღებაში დაეხმარება.
ჩვენი მიზანია, მოსწავლემ შეძლოს საგამოცდო მარშრუტების გაცნობა, ხმოვანი მითითებებით ვარჯიში და საკუთარი შეცდომების შეფასება. წარმოიდგინეთ, რომ გამოცდაზე გასვლამდე შეგიძლიათ გაიაროთ მსგავსი პროცესი, გაიგოთ, რომელ ეტაპზე უშვებთ შეცდომებს და რა მიმართულებით გჭირდებათ დამატებითი მომზადება.
ასევე ვგეგმავთ საკუთარი ონლაინ თეორიული კურსების შექმნას, უფრო პერსონალიზებული სასწავლო გამოცდილების განვითარებასა და იმ ინსტრუმენტების დამატებას, რომლებიც მოსწავლეს მომზადების პროცესის უკეთ დაგეგმვაში დაეხმარება.
გრძელვადიან პერსპექტივაში გვინდა, iDrive საქართველოში მართვის მოწმობის მიღებასთან დაკავშირებულ პირველ არჩევანად იქცეს – სივრცედ, სადაც ადამიანი სასწავლო პროცესის დაწყებიდან მართვის მოწმობის აღებამდე ყველა საჭირო რესურსს იპოვის.
ჩვენი მთავარი მიზანია, ტექნოლოგიების დახმარებით ეს პროცესი ნაკლებად სტრესული, უფრო პროგნოზირებადი და ყველასთვის ხელმისაწვდომი გავხადოთ.
ტექსტი: ანი შავიშვილი
