დღეს, როცა ციფრული სამყარო ყოველდღიურად იცვლება, პროფესიული წარმატებისთვის ცოდნასთან ერთად აუცილებელია მუდმივი განვითარება, სიახლის მიმღებლობა, საკუთარ თავზე მუშაობა, სხვანაირად ახალი შესაძლებლობების დანახვა არ იქნება მარტივი. საბოლოოდ, ამ გზაზე მნიშვნელოვანია საკუთარი გამოცდილების სხვებისთვის გაზიარება. მარიამ მითაიშვილის პროფესიული გზაც სწორედ ამ იდეას აერთიანებს. ციფრული მარკეტინგი, კონტენტის შექმნა და სწავლება მისი საქმიანობის სამი მიმართულებაა, რომლებიც ერთმანეთთან ბუნებრივად არის დაკავშირებული.
ბიზნესთან მუშაობისას მარიამი იდეებს სტრატეგიად აქცევს, კონტენტით ბრენდებს საკუთარი ღირებულების წარმოჩენაში ეხმარება, ხოლო Mitaishvili academy-ის საშუალებით მიღებულ გამოცდილებას მათ უზიარებს, ვინც ციფრულ სფეროში საკუთარი პროფესიული გზის დაწყებას ან განვითარებას ცდილობს.
მარიამ მითაიშვილი: ამ სფეროში ყველაზე მეტად შემოქმედებითობისა და სტრატეგიის კავშირი მიზიდავს. მიყვარს პროცესი, როდესაც იდეას ავითარებ, კონკრეტულ ფორმას აძლევ და შემდეგ ხედავ, რა შედეგი მოაქვს შენს ნამუშევარს ბიზნესისთვის. სწავლების დამატებამ კი ჩემს საქმიანობას კიდევ ერთი მნიშვნელოვანი მიზანი შესძინა — დავეხმარო ადამიანებს პროფესიის შესწავლასა და საკუთარი შესაძლებლობების აღმოჩენაში.
რა იყო ყველაზე დიდი გამოწვევა თქვენს პროფესიულ გზაზე და რა გასწავლათ ამ გამოცდილებამ?
ჩემს პროფესიულ გზაზე ერთ-ერთი ყველაზე მნიშვნელოვანი ნაბიჯი რუტინული სამსახურიდან წამოსვლა და საკუთარი აკადემიის შექმნა იყო. ერთ მომენტში მივხვდი, რომ დრო, ენერგია და ცოდნა, რომელსაც სხვა კომპანიის განვითარებას ვახმარდი, მინდოდა საკუთარი კომპანიის შენებაში ჩამედო. ამ გადაწყვეტილებას მეტი პასუხისმგებლობა და გაურკვევლობაც ახლდა, რადგან უკვე თავად უნდა განმესაზღვრა მიმართულება, მიმეღო გადაწყვეტილებები და შედეგებზეც მეპასუხა. მიუხედავად ამისა, დღეს ამას ჩემს ყველაზე სწორ პროფესიულ გადაწყვეტილებად ვთვლი.
ამ გამოცდილებამ მასწავლა, რომ საკუთარი საქმის დასაწყებად იდეალური მომენტის ლოდინი შეიძლება ძალიან გაიწელოს. მნიშვნელოვანია, გააზრებულად გადადგა პირველი ნაბიჯი და მზად იყო, გზადაგზა ისწავლო, შეცვალო მიდგომა და განვითარდე.
როდის მიხვდით, რომ თქვენი პროფესიული ცოდნა მხოლოდ პირადი წარმატებისთვის კი არა, სხვა ადამიანების მომავლის შესაცვლელადაც შეგეძლოთ გამოგეყენებინათ?
სწავლების პროცესში განსაკუთრებით კარგად ჩანს, როგორ იცვლება ადამიანის დამოკიდებულება საკუთარი შესაძლებლობების მიმართ. თავიდან შეიძლება ფიქრობდეს, რომ ვერ შეძლებს, ტექნიკურ ნაწილს ვერ გაუმკლავდება ან საინტერესო იდეები არ ექნება. შემდეგ კი იწყებს მუშაობას, ქმნის პირველ ნამუშევარს და უფრო თამამი ხდება.
ჩემთვის სწორედ ეს ცვლილებაა ძალიან ღირებული. როდესაც ხედავ, რომ შენი ახსნა და მხარდაჭერა ადამიანს დამოუკიდებელი ნაბიჯის გადადგმაში ეხმარება, ცოდნის გაზიარებას სხვა მნიშვნელობა ეძლევა. მინდა, სტუდენტმა ჩემგან მიიღოს პროფესიული საფუძველი და საკუთარი თავის რწმენაც, რომელსაც შემდეგ თავისი შრომით გაამყარებს.
როგორ გაჩნდა Mitaishvili academy-ის შექმნის იდეა და რას სთავაზობთ საზოგადოებას?
აკადემიის შექმნის იდეა პრაქტიკულმა საქმიანობამ და სწავლების გამოცდილებამ მომიტანა. ბიზნესებთან მუშაობისას კარგად ხედავ, რა ცოდნა სჭირდება სპეციალისტს რეალურად, რა სირთულეებს აწყდება და რისთვის უნდა იყოს მზად. მინდოდა, ეს გამოცდილება თანმიმდევრულ სასწავლო პროცესად მექცია.
ასე შეიქმნა Mitaishvili academy – სივრცე მათთვის, ვისაც სოციალური მედიის მართვისა და კონტენტის შექმნის შესწავლა, არსებული ცოდნის გაღრმავება ან საკუთარი ბიზნესისთვის ამ უნარების გამოყენება სურს.
ჩვენი მიმართულებები მოიცავს სოციალური მედიის მართვას, კონტენტის შექმნას, ვიდეომონტაჟს, გრაფიკულ დიზაინსა და ხელოვნური ინტელექტის ინსტრუმენტების გამოყენებას. ყურადღებას ვუთმობთ პორტფოლიოს მომზადებას, დამკვეთთან კომუნიკაციასა და საკუთარი მომსახურების წარდგენასაც. ჩემთვის მნიშვნელოვანია, ადამიანმა დაინახოს, როგორ გადაიტანოს ნასწავლი რეალურ საქმიანობაში.
თქვენი აკადემიის მთავარი უპირატესობები
ჩვენი მიდგომის მთავარ ღირებულებებს გამოვყოფდი: პრაქტიკასთან კავშირი, უშუალო კომუნიკაცია და სტუდენტის განვითარებაში ჩართულობა.
თავად ყოველდღიურად ვმუშაობ კონტენტზე, ბიზნესებთან ურთიერთობასა და მარკეტინგულ ამოცანებზე. შესაბამისად, სტუდენტებს ვუზიარებ გამოცდილებას, რომელიც რეალურ სამუშაო პროცესში გროვდება, მათ შორის სირთულეებსა და შეცდომებსაც.
ჩემთვის მნიშვნელოვანია, სტუდენტმა გაიაზროს საკუთარი გადაწყვეტილებები: რატომ ქმნის კონკრეტულ ვიდეოს, ვის მიმართავს, რას ეუბნება და რა შედეგს ელოდება. მინდა, დამოუკიდებლად აზროვნება შეძლოს და სხვადასხვა ბიზნესის საჭიროებას საკუთარი ცოდნა მოარგოს.
რამდენად რთულია თეორიული ცოდნის პრაქტიკულ უნარებად გარდაქმნა და როგორ ეხმარებით სტუდენტებს სწავლის დასრულების შემდეგ რეალურ პროფესიულ გარემოში თავის დამკვიდრებაში?
ეს სწავლის ერთ-ერთი ყველაზე მნიშვნელოვანი ეტაპია. ახსნილი მასალა შეიძლება გასაგები იყოს, მაგრამ დამოუკიდებლად მუშაობის დაწყებისას სრულიად ახალი კითხვები გაჩნდეს. სწორედ ამიტომ პრაქტიკა სასწავლო პროცესის ნაწილია.
ვმუშაობთ იდეების ჩამოყალიბებაზე, კონტენტის დაგეგმვასა და შექმნაზე, განვიხილავთ ნამუშევრებს და ვსაუბრობთ იმაზე, როგორ შეიძლება მათი გაუმჯობესება. ყურადღებას ვუთმობთ პორტფოლიოს, პირველი დამკვეთის მოძიებას, მომსახურების შეთავაზებასა და პროფესიულ კომუნიკაციას.
ჩემი მიზანია, კურსის დასრულებისას სტუდენტმა იცოდეს, საიდან დაიწყოს და რაზე გააგრძელოს მუშაობა. პროფესიულ განვითარებას დრო და პირადი ძალისხმევა სჭირდება, ჩვენ კი ვცდილობთ, ამ გზისთვის მყარი საფუძველი მივცეთ.
ხელოვნური ინტელექტის განვითარება როგორ ცვლის ციფრული მარკეტინგის სფეროს? როგორ ფიქრობთ, მომავალში რა როლი ექნება ადამიანს ამ პროცესში?
ხელოვნურ ინტელექტს ვუყურებ როგორც შესაძლებლობას, რომელიც გვეხმარება იდეების განვითარებაში, სხვადასხვა ვერსიის გამოცდასა და სამუშაო პროცესის დაჩქარებაში. თუმცა მისგან მიღებული შედეგის შეფასება და კონკრეტულ ამოცანაზე მორგება ისევ ჩვენს ცოდნასა და ხედვაზეა დამოკიდებული.
ჩემი აზრით, ადამიანის როლი განსაკუთრებით მნიშვნელოვანი იქნება მიზნის განსაზღვრაში, აუდიტორიის გაგებასა და საბოლოო არჩევანის გაკეთებაში. უნდა ვიცოდეთ, რამდენად ზუსტია მიღებული ინფორმაცია, შეესაბამება თუ არა კონტენტი ბრენდს და რას იგრძნობს ადამიანი მისი ნახვისას.
ვფიქრობ, მომავალში გამორჩეული იქნება სპეციალისტი, რომელიც ტექნოლოგიის შესაძლებლობებს საკუთარ აზროვნებას, გემოვნებასა და გამოცდილებას შეუთავსებს.
თქვენი გამოცდილებით, საქართველოში ბიზნესები რამდენად სწორად იყენებენ სოციალურ მედიას და რა არის ის მთავარი შეცდომა, რომელსაც ბრენდები ყველაზე ხშირად უშვებენ?
ბიზნესებს განსხვავებული გამოცდილება და რესურსი აქვთ, ამიტომ ყველას ერთნაირად ვერ შევაფასებ. ჩემს პრაქტიკაში ვხვდები კომპანიებს, რომლებსაც კარგად ესმით სოციალური მედიის მნიშვნელობა, და ისეთებსაც, რომლებიც ჯერ კიდევ მხოლოდ პოსტების გამოქვეყნებასა და სწრაფ გაყიდვებს უკავშირებენ მას.
ერთ-ერთი ყველაზე ხშირი შეცდომა მიზნის გარეშე კონტენტის შექმნაა. სანამ გადაღებას ან რეკლამის გაშვებას დავიწყებთ, უნდა ვიცოდეთ, ვის ვესაუბრებით, რას ვთავაზობთ და რატომ უნდა დაინტერესდეს ეს ადამიანი ჩვენით.
ასევე მნიშვნელოვანია, ბიზნესი მხოლოდ საკუთარ პროდუქტზე საუბარში არ ჩაიკეტოს. მომხმარებელს აინტერესებს, როგორ დაეხმარება ეს პროდუქტი, როგორია მომსახურება და რა აძლევს კომპანიას ნდობის საფუძველს. რეკლამის შემდეგ მიღებული გამოცდილებაც გადამწყვეტია — როგორ უპასუხებენ ადამიანს და რამდენად შეასრულებენ დაპირებას.
როგორია თქვენი სამომავლო გეგმები?
ჩემი მთავარი მიზანია Mitaishvili academy-ის განვითარება, სასწავლო მიმართულებების გაძლიერება და სტუდენტებისთვის მეტი პრაქტიკული შესაძლებლობის შექმნა. მინდა, აკადემიის ზრდასთან ერთად შევინარჩუნოთ ის უშუალო ურთიერთობა და ყურადღება, რომელსაც სწავლების პროცესში დიდ მნიშვნელობას ვანიჭებ.
პარალელურად, ვაგრძელებ საკუთარ პროფესიულ განვითარებასაც. ბიზნესებთან მუშაობა მაძლევს გამოცდილებას, რომელიც შემდეგ სწავლების პროცესშიც შემაქვს. მინდა, ეს კავშირი კიდევ უფრო გავაძლიერო და სტუდენტებს პროფესიული ცხოვრების დასაწყებად უკეთესი საფუძველი შევუქმნა.
სამომავლოდ პატარა სიურპრიზსაც ვამზადებ, რომლის დეტალებსაც გზადაგზა გაგიზიარებთ. ჩემთვის ეს საინტერესო ახალი ეტაპია და მოუთმენლად ველოდები, როდის გაგაცნობთ.
