ჰეილი ბიბერმა მშობიარობის შემდეგ განვითარებულ ჯანმრთელობის პრობლემაზე ისაუბრა. მოდელის თქმით, ვაჟის, ჯეკ ბლუზის დაბადებიდან დაახლოებით ექვსი თვის შემდეგ პრემენსტრუალური დისფორიული აშლილობის (PMDD) დიაგნოზი დაუსვეს. ეს მდგომარეობა პრემენსტრუალური სინდრომისგან განსხვავდება და მენსტრუაციის დაწყებამდე გაცილებით მძაფრი ემოციური და ფიზიკური სიმპტომებით ხასიათდება.
29 წლის ბიბერმა ამ საკითხზე გამოცემა Women’s Wear Daily-სთან ინტერვიუში ისაუბრა. მისი თქმით, დედობამ ქალთა ჯანმრთელობის მიმართ ინტერესი კიდევ უფრო გაუმძაფრა, რადგან თავადაც გამოსცადა, რამდენად რთული შეიძლება იყოს ორსულობასა და მშობიარობასთან დაკავშირებული ცვლილებები.
„ქალთა ჯანმრთელობის საკითხები ძალიან მაინტერესებს. ჩემი და PMOS-ით არის დაავადებული. ბევრი მეგობარი მყავს, რომლებსაც ენდომეტრიოზი და ქალთა ჯანმრთელობასთან დაკავშირებული სხვა, საკმაოდ სპეციფიკური პრობლემები აქვთ. როგორც ქალს, მაწუხებს კვლევების, ინფორმირებულობისა და ამ საკითხებზე საუბრის ნაკლებობა“, – განაცხადა ჰეილიმ.
მან დედობის გამოცდილებაც გაიხსენა და აღნიშნა, რომ შვილის გაჩენამ ამ საკითხების მნიშვნელობა მისთვის კიდევ უფრო ნათელი გახადა.
„განსაკუთრებით მას შემდეგ, რაც თავად გავხდი დედა. ეს მართლაც ძალიან ინტენსიური და განსაკუთრებული გამოცდილება იყო. იმდენი რამ ხდება ორსულობის დროს და მშობიარობის პროცესში. იმდენი რამ არის, რაც ბავშვის გაჩენის შემდეგ უნდა გაიარო“, – აღნიშნა მან.
„ვფიქრობდი: ეს ყველაფერი აქამდე ასე მძაფრად არასდროს მიგრძნია, საკუთარ თავს ეკითხები: რატომ მგონია, რომ მთელი ჩემი ცხოვრება დასასრულს უახლოვდება? საერთოდ ვერ ვხვდები, რა ხდება. თავში უამრავი ფიქრი და განცდა გიტრიალებს და ყველაფერი მსოფლიოში ყველაზე მნიშვნელოვან პრობლემად გეჩვენება. ამან გავლენა მოახდინა ჩემს სამსახურზე, ურთიერთობებსა და სოციალურ ცხოვრებაზე. ეს მდგომარეობა პერიოდულად მეორდება. ძალიან რთულია. ამასთან, ის სახიფათოც შეიძლება იყოს და მის მიმართ სერიოზული დამოკიდებულებაა საჭირო“.
ბიბერის თქმით, შვილის გაჩენის შემდეგ თავადაც შეექმნა PMDD-სთან დაკავშირებული სირთულეები, თუმცა ამ მდგომარეობაზე საზოგადოებაში იშვიათად საუბრობენ.
„შვილის გაჩენის შემდეგ მეც მქონდა ამასთან დაკავშირებული სირთულეები და ამ თემაზე საუბარი თუ კვლევა ძალიან ცოტაა“, – თქვა მან.
„ამაზე საუბარი მეხმარება, თავი ნაკლებად მარტოსულად ვიგრძნო. როდესაც ერთმანეთს ვუგებთ, მსგავს გამოცდილებაზე ვსაუბრობთ და ერთმანეთს ვუზიარებთ იმას, რასაც გავდივართ, ვფიქრობ, ეს განცდას ამსუბუქებს“ – აღნიშნა ბიბერმა.
PMDD, ანუ პრემენსტრუალური დისფორიული აშლილობა, პრემენსტრუალური სინდრომის უფრო მძიმე ფორმაა. ის, როგორც წესი, მენსტრუაციის დაწყებამდე ერთი ან ორი კვირით ადრე ვლინდება და შესაძლოა გამოიწვიოს ძლიერი ემოციური ცვლილებები, შფოთვა, დეპრესიული განწყობა და გაღიზიანება. სიმპტომები, ჩვეულებრივ, მენსტრუაციის დაწყების შემდეგ მცირდება.
ასევე დაგაინტერესებთ:
ჰეილი ბიბერის Rhode ქალთა ჯანმრთელობის კვლევისთვის 5 მილიონ დოლარს გამოყოფს
#OK! ჰეილი ბიბერი Time-ის ყდაზე – Rhode 2026 წლის 100 ყველაზე გავლენიან კომპანიას შორის მოხვდა
