2 ნოემბერს ლიტერატურული პრემია „ლიტერას“ 2026 წლის დაჯილდოების ცერემონია გაიმართა. გამარჯვებულები ხუთ ძირითად ნომინაციაში გამოვლინდნენ, ასევე, დასახელდნენ სპეციალური პრიზების მფლობელებიც.
წლის საუკეთესო დებიუტი – თაკო წულაია, კრებულისთვის „არაფერი არ გვემართება“ (გამომცემლობა „პალიტრა L“).
წლის საუკეთესო პოეტური კრებული – მინდია არაბული, კრებულისთვის „საუკუნო უკუნი“ (გამომცემლობა „მატარებელი კომიქს“).
წლის საუკეთესო პროზაული კრებული – დავით ქართველიშვილი, წიგნისთვის „ცვილის ფიგურები“ (გამომცემლობა „პალიტრა L“).
წლის საუკეთესო დოკუმენტური პროზა – გიორგი კაკაბაძე, წიგნისთვის „მიზეზთა ბუნება“ (გამომცემლობა „ინტელექტი“).
წლის საუკეთესო რომანი – გოგა ქობალია, წიგნისთვის „სიკვდილი პაპანაქება მზეში“ (გამომცემლობა „ინტელექტი“).
წლევანდელ დაჯილდოებაზე სპეციალური ჯილდოებიც გაიცა. პოეზიისთვის, საგანმანათლებლო და სამოქალაქო საქმიანობაში შეტანილი წვლილისთვის ჯილდო ნატო ინგოროყვას გადაეცა. განსაკუთრებული პრიზი მიიღო მიხეილ ჩარკვიანმაც წიგნისთვის „როგორ გადავურჩეთ დიქტატურას“, რომელიც პოეტ ზვიად რატიანს ეძღვნება. წიგნიერებისა და განათლების გავრცელებისთვის დააჯილდოვეს მწერალი და მასწავლებელი დათია ბადალაშვილი, ხოლო პენ საქართველოს სპეციალური პრიზი მწერალსა და მთარგმნელს, ირაკლი ლომოურს გადაეცა – შემოქმედებითი საქმიანობითა და სამოქალაქო პოზიციით გამოვლენილი გამბედაობისთვის.
დაჯილდოების ცერემონიაზე სოლიდარობა გამოუცხადეს პატიმრობაში მყოფ პოეტ ზვიად რატიანსაც, რომელსაც გასულ წელს „ლიტერას“ სპეციალური ჯილდო გადაეცა.
რა არის ლიტერატურული პრემია „ლიტერა“?
„ლიტერა“ ყოველწლიური ლიტერატურული კონკურსია, რომელიც 2015 წელს მწერალთა სახლმა და კულტურისა და ძეგლთა დაცვის სამინისტრომ დააარსეს. მისი მიზანი თანამედროვე ქართულ ლიტერატურაში წლის განმავლობაში გამოცემული გამორჩეული წიგნებისა და მათი ავტორების გამოვლენა და წახალისებაა. პრემია რამდენიმე ნომინაციას აერთიანებს, მათ შორის საუკეთესო დებიუტს, პოეტურ და პროზაულ კრებულებს, დოკუმენტურ პროზასა და რომანს.
