ნეფე-პატარძალი ქორწილის მთავარი გმირები არიან, ამიტომ სტუმრების მზერა მთელი დღის განმავლობაში მათკენაა მიპყრობილი. ეს რიგითი ადამიანისთვისაც კი დიდი გამოცდაა, ხოლო თუ ვარსკვლავი ხარ, მზად უნდა იყო იმისთვის, რომ შენს საქორწილო ფოტოებს მთელი მსოფლიო მიკროსკოპით დაათვალიერებს. ამას ვერ გაექცევი, რადგან მოდის ტენდენციებს სწორედ ცნობილი ადამიანები ამკვიდრებენ. წარმოგიდგენთ ვარსკვლავების საოცრად ლამაზ და წარმოუდგენლად ძვირადღირებულ საქორწილო კაბებს.
ოდრი ჰეპბერნი
ჰოლივუდის ლეგენდამ მელ ფერერთან ქორწილში Balmain-ის მაღალსაყელოიანი კაბა, ხელთათმანები და ყვავილების გვირგვინი ისე შეახამა, რომ ზღაპრულ ფერიას დაემსგავსა. ამ ქორწინებამდე მსახიობს ყოფილ საქმროსთან, ჯეიმს ჰენსონთან ქორწილისთვის სხვა კაბა ჰქონდა გამზადებული. ვინაიდან ჰენსონთან ქორწინება არ შედგა, ოდრიმ კაბა ნაცნობს აჩუქა, რომელმაც ის მოგვიანებით 20,700 ევროდ გაყიდა.
ქეთი ჰოლმსი
ქეთი ჰოლმსისა და ტომ კრუზის ქორწილი იტალიაში გაიმართა. პატარძლის მომხიბვლელი სამოსი იტალიელი დიზაინერის, ჯორჯო არმანის შემოქმედება იყო და 50,000 ევრო ღირდა.
ნიკი ჰილტონი
Valentino-ს კაბა XXL ზომის შლეიფით ნამდვილი ოცნების განსახიერება აღმოჩნდა. ამ ფუფუნებისთვის ჰილტონების ოჯახმა 65,000 ევრო გადაიხადა.
პრინცესა დიანა
პრინცესა დაიანასა და პრინცი ჩარლზის ქორწილი საუკუნის უდიდეს მოვლენად იქცა. ელიზაბეთ და დევიდ ემანუელების მიერ შექმნილი კაბა იმ დროისთვის დაახლოებით 80,202 ევროდ შეფასდა. ასეთი მაღალი ღირებულება, სავარაუდოდ, 8-მეტრიანმა შლეიფმა და 10,000-მა მარგალიტმა განაპირობა.
ელიზაბეთ ტეილორი
ჰოლივუდის ვარსკვლავმა ცხრაჯერ იქორწინა. მისი პირველი საქორწილო კაბა, რომელიც კონრად ჰილტონთან ჯვრისწერისას ეცვა, მოგვიანებით აუქციონზე 143,569 ევროდ გაიყიდა, რითაც ის მსოფლიოში ერთ-ერთ ყველაზე ძვირადღირებულ საქორწილო სამოსად იქცა.
მეგან მარკლი
მეგან მარკლისა და პრინცი ჰარის ქორწილში მთელი ყურადღება დიზაინერ კლერ უეიტ კელერის მშვენიერ კაბაზე იყო გადატანილი. “მინიმალისტური ფუფუნების“ შედევრი Givenchy-ს სამხატვრო ხელმძღვანელმა კლერ უეიტ კელერმა შექმნა.
Givenchy-ს ამ ნამუშევარს შთამბეჭდავი ფასი ჰქონდა – ხმების თანახმად, ეს ზღაპრული კაბა დაახლოებით 150,000 ევრო დაჯდა.
მელანია ტრამპი
მელანიას Christian Dior-ის კაბა უამრავი მარგალიტითა და კრისტალით იყო მორთული, რამაც მის ღირებულებაზეც იქონია გავლენა. გავრცელებული ინფორმაციით, კაბის ფასმა 160,000 ევრო შეადგინა.
მარი–შანტალ მილერი
ფული არც საბერძნეთის სამეფო ოჯახმა დაიშურა და Valentino-ს კაბაში, რომელიც მარი–შანტალ მილერს 1995 წელს, პრინც პავლოსზე ქორწინებისას ეცვა, 327,159 ევრო გადაიხადა.
ჰერცოგინია ქეითი
ქეითის კაბა თანამედროვე კლასიკის ეტალონია. Alexander McQueen-ის მოდის სახლის დიზაინერის, სარა ბარტონის მიერ შექმნილი ულამაზესი კაბა სპეციალურად ქეით მიდლტონისთვის შეიქმნა. სარა ბარტონმა მოახერხა გაეერთიანებინა ვიქტორიანული ეპოქის ტრადიციები და თანამედროვე დახვეწილობა. ვარაუდობენ, რომ კაბის ღირებულება 427,325 ევროს აღწევს.
კაბის მაქმანები “Carrickmacross” ტექნიკით, ხელით იყო ნაქარგი. თითოეული ყვავილი (ვარდი, ნარგიზი, სამყურა და ნარი) გაერთიანებული სამეფოს სხვადასხვა ნაწილის სიმბოლოა.
მკერავებს, რომლებიც მაქმანებზე მუშაობდნენ, ყოველ 30 წუთში ხელების დაბანა ევალებოდათ, რათა ქსოვილი იდეალურად თეთრი ყოფილიყო, ნემსებს კი ყოველ სამ საათში ცვლიდნენ.
გრეის კელი
ეს იმ დროის ზღაპარი იყო – ჰოლივუდის ვარსკვლავი პრინცზე დაქორწინდა! ასეთი მოვლენისთვის განსაკუთრებული საქორწილო კაბა უბრალოდ აუცილებელი იყო. ჰოლივუდის კოსტიუმების მხატვრის, ჰელენ როუზის მიერ შექმნილი საოცრება, როგორც ამბობენ, 488,565 ევრო დაჯდა, რაც 1956 წლისთვის უზარმაზარი თანხა იყო.
კაბა, რომელშიც გამოყენებული იყო 125 წლის ბრიუსელური მაქმანი ქეით მიდლტონისთვისაც კი შთაგონების წყარო გახდა.
კაბა 10 სხვადასხვა ნაწილისგან შედგებოდა, რომლებიც ისე იყო გადაბმული, რომ ერთ მთლიანობად ჩანდა. მასზე მუშაობა 6 კვირას გაგრძელდა.
გრეის კელის კაბა დღემდე მსოფლიოში ერთ-ერთ ყველაზე ძვირადღირებულ საქორწილო სამოსად ითვლება.
ვიქტორია სვაროვსკი
ვიქტორია სვაროვსკის საქორწილო კაბა როგორც “კრისტალების იმპერიის” მემკვიდრეს შეეფერება, 500,000 კრისტალით იყო მორთული და 46 კილოგრამს იწონიდა, 6-მეტრიანი შლეიფი კი კაბას ნამდვილ სამეფო იერს სძენდა. მაიკლ სინკოს მიერ შექმნილი შედევრის ფასი 900,000 ევრო იყო.
ცნობისთვის, მაიკლ სინკო დუბაიში მოღვაწე ფილიპინელი დიზაინერია, რომელიც თავისი “ულტრა-ლუქს” სტილით ცნობილია.
ასევე დაგაინტერესებთ
#OK! ცნობილი ადამიანების 10 ყველაზე ძვირადღირებული ნიშნობის ბეჭედი
