მისი სახელი და გვარი ხარისხთან, წარმატებასთან, გემოვნებასა და, რაც ყველაზე მთავარია, მაღალ მოდასთან ასოცირდება. ყოველთვის სჯერა, რომ იმან, რაშიც მთელ ძალას და ენერგიას დებ, შეუძლებელია საზოგადოების ნდობა და სიყვარული არ დაიმსახუროს. „Ok! ბათუმის“ სტუმარი დიზაინერი თაკო მექვაბიძეა, რომლის ბრენდი წლებია არ კარგავს აქტუალობას. მეტიც, მის მიერ შეკერილი სამოსი არაერთ ცნობილ მსოფლიო ვარსკვლავს ეცვა. დიზაინერს ძალიან სასიამოვნო სიახლე აქვს მომავალი პატარძლებისთვის და თუ რა, ამას ჟურნალის ფურცლებიდან შეიტყობთ.
პირველ რიგში, როგორ შეაფასებთ მიმდინარე წელს როგორც პროფესიული, ასევე ზოგადი კუთხით. რით იყო თქვენთვის გამორჩეული?
ეს წელი მართლაც ძალიან შთამბეჭდავი იყო ჩემთვის. გამიჩნდა მესამე შვილი, რომელმაც უდიდესი სიხარული და ბედნიერება შემოიტანა ოჯახში. რაც შეეხება პროფესიული თვალსაზრისით წლის შეფასებას, ვიტყვი, რომ ძალიან რთული წელი იყო. არასოდეს ვყოფილვარც ასეთ სტრესულ გარემოში. ბევრი ვალდებულების აღებამ მომოწია ადამიანებთან და მთელი ფეხმძიმობის პერიოდი ვმუშაობდი შეუჩერებლად. ალბათ იგივე პერიოდი რომ დავაბრუნო, მთელი ცხრა თვე ვიქნებოდი სულ სხვანაირად, ანუ მეტ დროს დავუთმობდი საკუთარ თავს. მაგრამ არა უშავს, ძალიან მიყვარს ჩემი საქმე და რაც გიყვარს, მას სიამოვნებით აკეთებ ისე, რომ ხშირად ვერ ან გვიან გრძნობ დაღლას.
როგორც ვიცით, სასიამოვნო სიახლე გაქვთ მომავალი პატარძლებისთვის. აქტიურად იწყებთ საპატარძლო კაბებზე მუშაობას. რა განსაკუთრებული ნიშა გექნებათ აღნიშნული მისამართით?
დიახ, ბევრი კარგი სიახლე მაქვს. ნელა-ნელა ვიწყებ ძალების აღდგენას. ახალი ენერგიითა და კარგი განწყობით მინდა შევუდგე საქორწინო ხაზის განვითარებას. აღნიშნული მიმართულება ჩემთვის უცხო არ არის. კარგად ვინც მიცნობს იცის, რომ ჩემი სადიპლომო ნამუშევრებიც სწორედ საქორწინო კაბებს ეხებოდა. ყოველთვის განსაკუთრებული მიდგომით ვმუშაობ ხოლმე საქორწინო კაბებზე, განსაკუთრებული ხედვით იქმნება თითოეული მათგანი. ესკიზი იქმნება კონკრეტული ადამიანისთვის, შესაბამისად, ყოველი დეტალი არის გათვლილი. აქვე გეტყვით იმასაც, რომ კაბის ესკიზს, რომელსაც ვხატავ, სამახსოვროდ ვჩუქნით პატარძალს.
საპატარძლო კაბებზე მუშაობისას რაზე გაამახვილებთ ძირითადად აქცენტს, რა ტენდენციაა ამ მხრივ მოდაში?
მინიმალისტური და, ამავდროულად, ეფექტური, ღია ფერი გვაძლევს ამის საშუალებას. ვფიქრობ, საქორწინო კაბებში ტენდენცია არ არსებობს. ბავშვობიდან ალბათ ყველას თავისი ზღაპრული საპატარძლო კაბა აქვს წარმოდგენილი. შესაბამისად, ვითვალისწინებ მათ ინტერესებს.
რამ განაპირობა, მიჰბრუნებოდით საპატარძლო კაბებზე მუშაობას?
ყოველთვის ვმუშაობდი ამ ხაზზე, უბრალოდ, ახლა უფრო მასშტაბური იქნება. ცალკე გამოვყავი ეს ხაზი და გვექნება ვაით ქორნერი – Tako mekvabidze wedding line-ი, სადაც მომხმარებელი მარტო საქორწილო კოსტიუმებს შეიძენს.
ის, ვინც თაკო მექვაბიძის საპატარძლო კაბას მოირგებს…
თავს თავდაჯერებულად იგრძნობს. იგრძნობს, რომ კაბა მხოლოდ მისთვის არის შექმნილი. და, რა თქმა უნდა, ამ კაბას ექნება ჩემი ხელწერა – სადღესასწაულო განწყობა, რაც ჩემი კოლექციების მთავარი ღერძია. წინ არაერთი საინტერესო გეგმა მაქვს, დაელოდეთ სიახლეებს თაკო მექვაბიძისგან.
