სილამაზის სალონი „ეკა“ რვა წლის წინ დაარსდა და ქუთაისის ბაზარზე დღემდე წარმატებით ოპერირებს. აღნიშნულ სფეროში დიდი კონკურენციის მიუხედავად, ცენტრი აქტუალურობას წლებია არ კარგავს და მომხმარებელს მუდმივად სიახლეებს სთავაზობს. სილამაზის სალონის უპირატესობებსა და სერვისებზე მისი დამფუძნებელი ეკატერინე სარალიძე გვესაუბრა.
გვიამბეთ, როგორ გაჩნდა სილამაზის სალონის დაარსების იდეა?
21 წელია ამ სფეროში ვარ. კოსმეტოლოგობით დავიწყე და თავდაპირველად სხვასთან ვმუშაობდი. შემდეგ, გამოცდილებამ და მომხმარებლის დიდმა რაოდენობამ საკუთარი სივრცის შექმნის იდეა გამიჩინა. 8 წლის წინ ფართი შევიძინე და სალონს ნელ-ნელა ვაფართოებდი. დღესდღეობით, ცენტრში ყველაფერი მაქვს, რაზეც კი ვოცნებობდი. იმის გამო, რომ პოვნა არ გასჭირვებოდათ, ჩემივე სახელი დავარქვი, შემდეგ აღარ შევცვალე და ყოველგვარი ფიქრისა და შელამაზების გარეშე, სახელწოდება „ეკა“ დავტოვე.
გვესაუბრეთ თქვენს გამოცდილებასა და საქმიანობაზე.
მუშაობა რომ დავიწყე, ეს სფერო განვითარებული ჯერ კიდევ არ იყო. არც სპეციალური ცენტრები არსებობდა, სადაც სწავლასა და კვალიფაკაციის ამაღლებას შევძლებდი. იმ პერიოდში სასურველ პროდუქტსაც ვერ ვიძენდით. ვიზაჟის კუთხით აქტიურად ვმუშაობდი. ეს საქმე არავისგან მისწავლია, ლამაზად გამომდიოდა და ტექნიკას თანდათან ვხვეწდი. შემდეგ უკვე პროდუქტებზე წვდომა გაჩნდა, რამაც საშუალება მომცა, ჩემი გაკეთებული საქმე კიდევ უფრო ხარისხიანი გამეხადა. ახლა ესთეტიკურ მედიცინაში ორი დიდი კომპანიის წარმომადგენელი ვარ. ესენია: სახის პროფესიონალური მოვლის საშუალებები CHRISTINA და კომპანია NLC GEORGIA. სოციალურ ქსელებს აქტიურად ვიყენებ, მოდას თვალს ვადევნებ, ტენდენციებს მივყვები და მომხმარებლის მოთხოვნებს ვასრულებ.
რა სერვისს სთავაზობთ მომხმარებელს?
ამ სფეროში ჩემი შვილი, მარიამ მეგრელი საინტერესო ხედვითა და ნიჭით გამოჩნდა. ჩვენ ერთად მუშაობით კარგი გამოცდილება დავაგროვეთ, ერთ დონეზე არ ვჩერდებით და სილამაზის სალონში მოსულ მომხმარებელს მრავალფეროვნებას ვთავაზობთ.
– ვიზაჟისტის მომსახურება
– თმის მოვლა (შეჭრა, შეღებვა,
ვარცხნილობა…)
– მანიკიური/პედიკიური
– ლაზერო და კრეოთერაპია
– კოსმეტოლოგია
– სოლარიუმი
აქტიურად ვმუშაობთ პერმანენტული მაკიაჟის კუთხითაც, ორგანულ პიგმენტებს ვიყენებთ და უსაფრთხოების ზომებს მაქსიმალურად ვიცავთ. სხვადასხვა კომპანიასთან ვთანამშრომლობთ, ჩვენს სალონს თბილისიდან ექიმი-კოსმეტოლოგი და დერმატოლოგი მარინა ბოდოკია სტუმრობს. სპეციალური სივრცე გვაქვს მოწყობილი, სადაც პაციენტებს ვიღებთ და ინიექციურ მომსახურებასა და სახის მოდელირებას ვთავაზობთ.
რა გამოარჩევს „ეკას“ სილამაზის სხვა ცენტრებისგან, რა არის თქვენი ნიშა?
განსაკუთრებული ნიშა გვაქვს. მაკიაჟის ტექნიკური მხარე ჩვენი შემუშავებულია, სხვადასხვა დეტალის გაკეთებას მარტივი ხრიკებით ვახერხებთ. ვიცით, როგორ ვიმოქმედოთ იოლად და ამავდროულად, ლამაზად და სწორად. მთავარი მიზანია მომხმარებლის კმაყოფილება, წინასწარ ვსაზღვრავთ, რა მოუხდება ადამიანს და ყოველთვის აქედან ამოვდივართ. რაც აუცილებლად გასათვალისწინებელია, ესთეტიკურობა, ხარისხი და სისწორეა. ჩვენს სალონში დასაქმებულ ვიზაჟისტებს ხედვა და ფერების აღქმა კარგი აქვთ, კონტურინგს არაჩვეულებრივად აკეთებენ. გარდა ამისა, სტუმრებს ხალისიან და კომფორტულ გარემოს ვთავაზობთ. მუსიკა და იუმორი გვიყვარს, ამიტომ აქ მოსული ადამიანები თავს ყოველთვის სასიამოვნოდ გრძნობენ.
რაც შეეხება ხარისხსა და უსაფრთხოებას…
ჩვენთვის ხარისხი ყველაზე მნიშვნელოვანია. შემოწმება წარმატებით გავიარეთ. ბოლო პერიოდში ინფექციური პრობლემები მომრავლებულია. ამიტომაც, მაქსიმალურად ვცდილობთ, მომხმარებელს ჯანმრთელობის კუთხით საფრთხე არ შეექმნას. მაკიაჟმა ალერგიული ფონის გაუარესება რომ არ გამოიწვიოს, სიმყარისთვის ბაზად ისეთ პროდუქტს ვიყენებთ, რომელიც სახის კანს მაქსიმალურად დაიცავს. შერჩევისას ვარგისიანობის ვადას ვამოწმებთ. დღეს პროდუქტის პოვნა და შეძენა რთული არ არის და მასში თანხის გადახდა არ გვენანება.
რას გვეტყვით მომხმარებელზე?
მრავალფეროვნად რომ ვმუშაობთ, ეს ამ ქალაქში მცხოვრები გოგონების დამსახურებაა. ქუთაისელებს განსაკუთრებული გემოვნება აქვთ და გამორჩეულ მაკიაჟზე მოთხოვნაც დიდია. ბოლო დროს ტენდენციები შეიცვალა და გემოვნება დაიხვეწა. ვფიქრობთ, ჩვენი ბიზნესის წარმატება ამ ქალაქმა განაპირობა, რადგან განვითარების საშუალება მომხმარებელმა მოგვცა. მაკიაჟი ჩრდილების მრავალფეროვნებას მოიცავს. გრაფიკული მიმართულება ყველაზე რთულია, ეს ხაზებით მოხატულობას გულისხმობს. ქალები თვალის ჩრდილის ლამაზი ნიმუშებით მოდიან, ჩვენ კი სურვილის შესაბამისად ვმუშაობთ. თუმცა, მხოლოდ სტანდარტებით არ შემოვიფარგლებით. ურთიერთშეთანხმების შემდეგ კარგ შედეგამდე მივდივართ. ერთგული მომხმარებელი გვყავს, სხვადასხვა ქალაქიდან გვსტუმრობენ. მათთან უშუალო ურთიერთობას ვამყარებთ, გვენდობიან და კმაყოფილი რჩებიან, ჩვენი მიზანიც ეს არის.
რა სახის სირთულეები და წინააღმდეგობები გქონიათ?
ოთხი წლის წინ ცენტრში ხანძარი გაჩნდა, აბსოლუტურად ყველაფერი განადგურდა და ფერფლად იქცა. ეს სალონი საცხოვრებელი კორპუსის ქვემოთ მდებარეობს. როცა დავრწმუნდით, რომ ადამიანების სიცოცხლეს საფრთხე არ ემუქრებოდა, მაშინვე სიტუაციის გამოსწორებაზე ფიქრი დავიწყეთ. მოქალაქეებისგან დიდი მხარდაჭერა ვიგრძენით. რთულ დროსაც ძალიან ბევრი გულშემატკივარი გვყავდა. სალონი აღვადგინეთ და კიდევ უფრო მეტი მომხმარებელი დაგვემატა.
წარმატების თქვენეული ფორმულა…
მთავარი საქმის სიყვარულია. შეიძლება ბანალურად ჟღერს, მაგრამ უშრომლად სასურველ შედეგს ვერ მიაღწევ. ორიენტირებული ვართ ხარისხზე. სხვას არასდროს ვეჯიბრები და არ მიმაჩნია, რომ ვინმეს კონკურენტი უნდა ვიყო. ყოველთვის ბუნებრიობას ვანიჭებ უპირატესობას და უშუალობითა და თავმდაბლობით გამოვირჩევით, წარმატებასაც ასე მივაღწიეთ. ვთვლი, რომ პიროვნება როცა პროფესიულად ყალიბდება, ერთ დონეზე არ უნდა გაჩერდეს. ჩვენი ცენტრი მხოლოდ ამ ქალაქით არ შემოიფარგლება. შანსი მოგვეცა, რომ სალონი ქვეყნისა და საერთაშორისო მასშტაბით წარმოგვეჩინა. კონკურსებში ვმონაწილეობთ. საქართველოში მესამე ადგილი ავიღეთ. შემდეგ კიდევ გვქონდა შემოთავაზება. ევროპის ჩემპიონატი თურქეთში ჩატარდა. იქ გამართულ კონკურსზე, სტილისტებთან ერთად, ვიზაჟისტი მხოლოდ მარიამი იყო, პირველი ადგილი მოვიპოვეთ. შესაბამისი ჯილდო და სიგელები გადმოგვცეს, რამაც კიდევ უფრო დიდი სტიმული მოგვცა.
როგორც ვიცით, ცოდნასა და გამოცდილებას სხვებსაც უზიარებთ.
ჩვენს ქალაქში და ასევე სხვადასხვა რეგიონში დაინტერესებულ გოგონებს ვასწავლით, ისინი კი შემდგომში მუშაობას წარმატებით აგრძელებენ. ჩვენგან განსაკუთრებული ცოდნის მიღებას ელიან და ამიტომაც გვსტუმრობენ. მოსწავლეებს ისეთ ტექნიკას ვასწავლით, შეიძლება სხვა სალონში მუშაობისას არასდროს მოსთხოვონ. თუმცა, როგორც მასწავლებლებს, სურვილი გვაქვს, ჩვენმა მოსწავლეებმა ყველაფრის შესრულება იცოდნენ.
გაგვიმხილეთ სამომავლო გეგმები.
ამჯერად, საერთაშორისო კონკურსი პარიზში გაიმართება. სურვილი მაქვს, რომ მონაწილეობა იქაც მივიღოთ და კიდევ ერთ წარმატებას მივაღწიოთ.
ტექსტი: მარიამ ირემაძე
ფოტო: ნინი გორდაძე
