OK! Gastro Book-ი გამორჩეული სივრცის, „შოკმანჟეს“ შესახებ გიამბობთ, რომელიც რამდენიმე თვეა, რაც გაიხსნა და ძალიან მალე მოახერხა საზოგადოების ყურადღების მიქცევა თავისი მრავალფეროვანი მენიუთი და მიმზიდველი ინტერიერით. შეუძლებელია აქ მისულ სტუმარს ესთეტიკური გარემო და საუკეთესო მომსახურება შეუმჩნეველი დარჩეს. სივრცე იმითაც გამორჩეულია, რომ გარდა უგემრიელესი კერძებისა, აქ მზადდება ჰაეროვანი, ნატურალური და უმაღლესი ხარისხის შოკოლადი, რომელიც სტუმრობისას აუცილებლად უნდა დააგემოვნოთ.
„შოკმანჟეს“ ინტერიერის დიზაინი მთლიანად გუგა კოტეტიშვილს ეკუთვნის, რომელმაც თბილისს კიდევ ერთი გამორჩეული და მყუდრო სივრცე აჩუქა, სივრცე, სადაც შეგიძლიათ მეგობრებსა და საყვარელ ადამიანებთან ერთად ძალიან სასიამოვნო დრო გაატაროთ. რის მიხედვით შეარჩია დიზაინი, ფერები, რა იყო მისი ინსპირაციის წყარო, თავად გვიამბობს.
გუგა, გაგვაცანით რესტორნის ძირითადი კონცეფცია. რის მიხედვით შეარჩიეთ ინტერიერის დიზაინი? რა გახდა თქვენი ინსპირაციის წყარო მასზე მუშაობისას?
დიზაინი განაპირობა იმ გარემოებამ, რომ რესტორნამდე ეს ჩემი სახელოსნო და ნახატების გალერეა იყო.
თავდაპირველად რესტორნის სახელწოდება „გალერეა“ უნდა ყოფილიყო, ამიტომაც ჩარჩოებში ჩასმული სარკეები და ზედ ფაიფურის თეფშები გადავწყვიტე. მნიშვნელოვანია ძველი ჭერის მოხატულობა, რასთან შეხამებითაც გადაწყდა ფანჯრების მომწვანო-მოლურჯო ზღვისფერი.
იმის გამო, რომ შოკოლადის თემა გაჩნდა, თავის ატრიბუტიკით, რის დანახვასაც სტუმარი შეძლებდა, ვგულისხმობ გელა კუპრაშვილის უგემრიელეს შოკოლადის დესერტებს, გადავწყვიტე ოქრო შემომეტანა ინტერიერში, რაც განსხვავებული იქნებოდა ჩემი სხვა კაფეებისა და რესტორნებისგან, – ცოტა უფრო გაპრანჭული, მაგრამ მყუდრო, რაც შოკოლადის აღმატებულებას გაუსვამდა ხაზს, რასაც ნამდვილად იმსახურებს.
რა სახის მასალებია გამოყენებული ინტერიერში? გვესაუბრეთ იმ ფერთა გამაზე, რომელიც რესტორანზე მუშაობისას გამოიყენეთ.
თეთრი ფერის კედლები და ზღვისფერი ფანჯრები, დეკორად შპალერი და ძველი მოხატულობა, რაც მნიშვნელოვანია.
როგორ ფიქრობთ, რა ნიშას დაიმკვიდრებს რესტორანი ბაზარზე?
ყველა ჩემი კაფე თუ რესტორანი წარმატებულია, რატომ უნდა იყოს ეს გამონაკლისი? ყველაფერი ხელს უწყობს, ადგილიდან დაწყებული, დიზაინით დამთავრებული და, რაც მთავარია, გამოცდილი, თავაზიანი პერსონალი.
