მიუხედავად იმისა, რომ OK!-ს შექმნაში პირველივე ნომრიდან ჩართული ვარ, მთავარი რედაქტორის სვეტი განსაკუთრებულად რთული დასაწერი აღმოჩნდა.
ამ ნომერში გადავწყვიტეთ, ჩვენს მომავალ თაობაზე გვესაუბრა. Zoomer Generation – თაობა, რომელიც გააკეთებს იმას, რაც ჩვენ ვერ შევძელით.
დიახ, მათი ქცევა, აზროვნება, შეხედულებები საოცრად განსხვავებულია ჩემი, 1990-იანი წლების თინეიჯერისგან. მათი თავისუფალი და პრაქტიკული მიდგომები ხანდახან შესაძლოა, რთული გასაგებიცაა ჩემთვის.
მახსოვს, ერთხელ საოცარმა ქართველმა მსახიობმა, თამარა სხირტლაძემ მითხრა, არასდროს დაბერდები, თუ ახალგაზრდებთან იმეგობრებო.
მათი მოსმენა, მათთან საუბარი სწორედ ჩვენი, დედების თაობისთვისაა მნიშვნელოვანი. შესაძლოა, მათი პროტესტის გამოხატვის ფორმები ძალიან მიუღებელია ჩვენთვის, მაგრამ იქნებ დავფიქრდეთ – რა მაგალითს ვაძლევთ ახალგაზრდებს მაღალი ტრიბუნებიდან, რას ხედავენ ისინი – თითქოს საზოგადოებაში ნორმად იქცა ოპონენტების მისამართით უზარმაზარი აგრესია და უპატივცემულობა, საკუთარი „სიმართლის“ მუშტით დამტკიცება. სწორედ ეს ვნახეთ უნივერსიტეტში… მათ ვერ გაგვაგონეს, ვერ დაგვაჯერეს, რომ დახმარება სჭირდებოდათ… უნდა დავფიქრდეთ, როგორ ქცევას ვაკანონებთ, რა მაგალითს ვაძლევთ ახალგაზრდებს.
განათლება – უფლება და საჭიროებაა. ჩვენი პირველი საზრუნავი სწორედ განათლებული საზოგადოების მიღწევა უნდა იყოს. განათლება ის მთავარი იარაღია, რომელიც სწორ ფასეულობებს აყალიბებს და ის ფარი, რომელიც მავნე პროპაგანდის საშიშროებებს აგვარიდებს. განვითარებული ქვეყანა მხოლოდ განათლებული ადამიანების მიერ შენდება. გზა ევროპისკენ განათლებაზე გადის.
OK!-ის გუნდი ეცადა, Zoomer Generation‑ის რამდენიმე ძალიან წარმატებული წარმომადგენელი გაეცნო თქვენთვის. ვფიქრობთ, საინტერესო საკითხავი დაგიტოვეთ ამ მხრივ.
რა თქმა უნდა, გვერდი არ ავუარეთ თავის მოვლის საჭიროებებსა და მოდის ტენდენციებს, უცხოელი ვარსკვლავების ამბებს. რასაც ჟურნალში ვერ ვატევთ, ყოველდღიურად ჩვენს ონლაინმედიაზე გიზიარებთ, www.okmagazine.ge-ზე.
სიყვარულით,
მაიკო წერეთელი
ჟურნალ OK!-ის მთავარი რედაქტორი
