უელსის პრინცესა დაიანა ყოველთვის ლამაზი აღნაგობით გამოირჩეოდა, მაგრამ ამისთვის გარკვეულ მსხვერპლზე წასვლა უწევდა. ბრიტანეთის სამეფო ოჯახის ყოფილი შეფ-მზარეული დარენ მაკგრეიდი იხსენებს, რომ დიანა სახლში ტკბილეულს არ ინახავდა.. იმ დღეების გარდა, როდესაც პრინცები – უილიამი და ჰარი ინტერნატიდან ბრუნდებოდნენ.
დარენ მაკგრეიდი პრინცესასთან ოთხი წლის განმავლობაში, მის გარდაცვალებამდე მუშაობდა, მანამდე კი 11 წლის განმავლობაში დედოფალ ელისაბედ II-ს ბაკინგემის სასახლეში ემსახურებოდა.
„დაიანა ჯანსაღი კვების მიმდევარი იყო, ამიტომ თუ პრინცები სახლში არ იყვნენ, ჩვენს მენიუში ძროხის ხორცი არ შედიოდა. დიანა ღორის ხორცს საერთოდ არ მიირთმევდა. ზოგჯერ სტუმრებისთვის ცხვრის ხორცს ამზადებდა, მაგრამ მის სუფრაზე ძირითადად ქათამი, თევზი და ვეგეტარიანული კერძები იყო.
დიანასთან მუშაობის დროს ჩემი კულინარიული სტილის შეცვლა მომიწია. უარი ვთქვი მძიმე სოუსებზე, რომლებსაც დედოფლისთვის ვამზადებდი და მსუბუქი კერძების მზადება დავიწყე ცხიმებისა და ნახშირწყლების გარეშე. პრინცესას ძალიან უყვარდა ტომატის მუსი და მთხოვდა მისი უცხიმო ვერსია მომემზადებინა. ის ხშირად მეხუმრებოდა – „შენ ცხიმებზე იზრუნე, ნახშირწყლებს კი მე სპორტდარბაზში მივხედავ“- იხსენებს მაკგრეიდი.
მიუხედავად იმისა, რომ დაიანა საკუთარ კვებას ყურადღებით ეკიდებოდა, სასწავლებლიდან დაბრუნებულ შვილებს ყოველთვის ანებივრებდა.
„პრინცესას შვილების განებივრება უყვარდა, ამიტომ ბიჭებს შოკოლადის და ტკბილეულის ჭამა შეეძლოთ. მათთვის სპეციალურად ვამზადებდი, როცა სახლში ბრუნდებოდნენ.
პრინცებს სახლში მომზადებული კერძები უყვარდათ, განსაკუთრებით ბანანის ფლანი, ბანანის ნაყინი და ყველაფერი რაც ბანანს შეიცავდა. ბიჭებს ძალიან მოსწონდათ გრილის ასორტი, ბურგერები, პიცა, სპაგეტი „ფრიკადელკებით“, ქათამი ნაღების სოუსში და ა.შ. ისინი სამეფო ოჯახის შვილები იყვნენ, მაგრამ გემოვნება მაინც ბავშვური ჰქონდათ“ – ამბობს მაკგრეიდი.
დიდი ხანია საიდუმლოს არ წარმოადგენს, რომ უელსის პრინცესა შვილებს „არასამეფო საკვების“ დაგემოვნების უფლებას აძლევდა. როგორც ბავშვების უმეტესობას, უილიამსა და ჰარის ძალიან უყვარდათ სწრაფი კვების პროდუქტები, განსაკუთრებით კარტოფილი ფრი და შემწვარი ქათამი. ზოგჯერ დიანა შვილებს KFC-ში სადილობის უფლებასაც აძლევდა.
პრინცესას კომფორტული ურთიერთობისთვის შექმნილი მყუდრო სივრცეები უყვარდა. მას მრგვალი მაგიდა, სადაც ერთმანეთთან საუბრის შესაძლებლობა ყველას ჰქონდა, სამზარეულოს ინტერიერის აუცილებელ ელემენტად მიაჩნდა. დარენ მაკგრედის თქმით, როდესაც დიანა სამზარეულოში მარტო იყო, სადილობის დროს მზარეულთან და მიმტანებთან საუბრობდა, რაც კიდევ ერთხელ ადასტურებს რომ დიანას კომუნიკაბელურობა არ აკლდა.
ცნობისთვის, ბრიტანეთის სამეფო ოჯახის ყოფილი შეფ-მზარეული დარენ მაკგრეიდი წიგნების „Eating Royally“ და „The Royal Chef at Home“-ს ავტორია, სადაც მკითხველებს სამეფო ოჯახისათვის მომზადებული კერძების რეცეპტებს უზიარებს.
ასევე, დაგაინტერესებთ:
#OK! ერთი რჩევა სიყვარულზე, რომელიც პრინცესა დაიანამ სიკვდილამდე პრინც უილიამს დაუტოვა
