თინათინ კლდიაშვილი GIPA-ს კურსდამთავრებულია. ამავე უნივერსიტეტში მისი ბოლო პოზიცია საზოგადოებასთან ურთიერთობის დეპარტამენტის ხელმძღვანელი იყო, ხოლო ამჟამად რადიო GIPA-ს ხელმძღვანელობს, რომელიც 2005 წელს დაარსდა, როგორც პირველი ინგლისურენოვანი სტუდენტური რადიო საქართველოში. თუმცა მას შემდეგ ბევრი რამ შეიცვალა. „რადიოს სულ სხვა სპეციფიკა აქვს, დანარჩენი საკომუნიკაციო არხებისგან განსხვავებით, თუმცა ვფიქრობ მის განსაკუთრებულობას ისიც ადასტურებს, რომ ტექნოლოგიური პროგრესის პირობებში ის კვლავ აქტუალურია არა მხოლოდ საქართველოში, არამედ მსოფლიოში, და ამას რამდენიმე მიზეზი აქვს…“
რა ისტორია აქვს რადიო GIPA-ს?
GIPA-ში სტუდენტური მედიის შექმნაზე მუშაობა 2000 წელს დაიწყო. ამის შემდეგ გაჩნდა და განვითარდა მაუწყებლობის შექმნის იდეა. GIPA-ს კურსდამთავრებულების, სტუდენტებისა და აკადემიური პერსონალის ძალისხმევის დამსახურებით, რადიო GIPA-მ მაუწყებლობა 2005 წელს დაიწყო. ის იყო პირველი ინგლისურენოვანი, სტუდენტური რადიო არა მხოლოდ საქართველოში, არამედ კავკასიის რეგიონშიც.
რადიო GIPA-ს შესაქმნელად ფინანსური გრანტი აშშ-ის საელჩომ გამოყო. ფინანსურ მხარდაჭერაში ასევე დიდი წვლილი მიუძღვით პოლონეთის საელჩოსა და BBC-ის.
რადიო GIPA-ს სარედაქციო პოლიტიკის შექმნასა და განვითარებაში ჩართულები იყვნენ ისეთი მედიასაშუალებების წარმომადგენლები, როგორებიცაა BBC, Washington Post, Wall Street Journal, Financial Times და რამდენიმე ფრანგული მედიასაშუალება. მათი წარმომადგენლები რეგულარულად უწევდნენ კონსულტაციებს ჩვენს სტუდენტებსა და კურსდამთავრებულებს, უზიარებდნენ მათ საკუთარ გამოცდილებას და ეხმარებოდნენ ინგლისურენოვანი გადაცემების მომზადებაში.
რადიო GIPA დღეს…
რადიო GIPA დამოუკიდებელ, ორენოვან რადიოპლატფორმას წარმოადგენს. FM-სიხშირისა (94.3) და მის ბაზაზე არსებული სხვა ონლაინპლატფორმების მეშვეობით, რადიო GIPA შემეცნებითი, კულტურული თუ სოციალური ინფორმაციის მაუწყებლობას ახორციელებს, როგორც ქართულ, ასევე ინგლისურ ენებზე.
მოგეხსენებათ, ჩვენ ვთანამშრომლობთ ამერიკულ ნაციონალურ რადიოსთან (NPR) და ბრიტანეთის სამაუწყებლო კორპორაციასთან (BBC). პარტნიორობის ფარგლებში, რადიო GIPA BBC-ისა და NPR-ის პროგრამებისა და გადაცემების რეტრანსლირებას ახორციელებს. ვფიქრობ, დღევანდელ დღეს, საინფორმაციო ომისა და რუსული პროპაგანდის პირობებში, განსაკუთრებით მნიშვნელოვანია დასავლურ მედიასთან პარტნიორობა.
რატომ რადიო?
უპირველესად, ჩემს დამოკიდებულებას გეტყვით: რადიო მე-19 საუკუნის ბოლოს გამოიგონეს, შესაბამისად FM-სიხშირეს ჩემთვის იმ პერიოდის განწყობა დაჰყვება, როდესაც ის ერთადერთ საკომუნიკაციო პლატფორმას წარმოადგენდა. გარდა ამისა, დღემდე, ასტრონავტები, როგორც ერთმანეთში, ასევე კოსმოსიდან დედამიწაზე, რადიოს მეშვეობით კომუნიცირებენ; კოსმოსში არსებული ვაკუუმი ახშობს ხმას, შესაბამისად მათ ერთმანეთში კომუნიკაცია რადიოტალღების მეშვეობით აქვთ. ეს ფაქტორები ჩემთვის მიმზიდველს ხდის რადიოს, როგორც საკომუნიკაციო არხის ფენომენს.
სხვა საკომუნიკაციო არხებისგან განსხვავებით, რადიოს სულ სხვა სპეციფიკა აქვს, თუმცა ვფიქრობ მის განსაკუთრებულობას ისიც ადასტურებს, რომ ტექნოლოგიური პროგრესის პირობებში რადიო კვლავ აქტუალურია არა მხოლოდ საქართველოში, არამედ მსოფლიოში და ამას რამდენიმე მიზეზი აქვს. პირველი და ჩემი აზრით, უმთავრესი მიზეზი არის ის, რომ დანარჩენი ონლაინპლატფორმებისგან განსხვავებით, რადიო რჩება ერთადერთ უფასო პლატფორმად, სადაც შესაძლებელია მოუსმინო შენთვის სასურველ მუსიკას თუ პოდკასტს, ან თუნდაც მიიღო შენთვის საინტერესო ინფორმაცია სწრაფად და მარტივად, გადაადგილების პირობებშიც კი. ის 24/7 ხელმისაწვდომია მომხმარებლისთვის. თუმცა, ის ადაპტირებადია, მას შეგიძლია უსმინო ლეპტოპიდან, სმარტფონიდან, პლანშეტიდან და ა.შ. უამრავი კვლევა არსებობს მსოფლიოში, რომლის მიხედვით რადიო რჩება ერთ-ერთ მოწინავე მედიუმად კომუნიკაციისთვის, ამის მიზეზებად სახელდება სეგმენტირებული აუდიტორია, მომხმარებლის ფინანსური ეფექტიანობა, სანდოობა, ინტერაქტიულობა და ტელევიზიისა და ინტერნეტისგან განსხვავებით, უვიზუალო, მხოლოდ აუდიოკონტენტის გამო ტვინის წარმოსახვითი ნაწილის გამოყენება/განვითარება/გაუმჯობესება.
პროექტები…
რადიო GIPA რამდენიმე ძალიან საინტერესო პროექტს ახორციელებს. მათ შორისაა გადაცემა „ლაპარაკობს კინო“, რომელიც საერთაშორისო და ადგილობრივ კინემატოგრაფიას ფილოსოფიურ და ფსიქოანალიტიკურ ჭრილში განიხილავს. მისი ავტორი და წამყვანია კინომკვლევარი თინა ყანდიაშვილი, რომელიც ასევე კინომუსიკის მიმართულებაზე მუშაობს. TBC Concept-თან პარტნიორობის ფარგლებში, შემეცნებითი პოდკასტების სერიას ვახორციელებთ, რომლებიც განსხვავებულ თემებს აერთიანებს. პირველი ციკლი თბილისურ ისტორიებს ეხება. ცირა ელისაშვილი, ზაზა აბაშიძე, დათო ტურაშვილი − ეს იმ სპიკერების მცირე ჩამონათვალია, რომლებიც ჩვენს ქალაქში არსებული ლეგენდების, სასიყვარულო ურთიერთობებისა და საზოგადოებისთვის ნაკლებად ცნობილი ამბების შესახებ საუბრობენ. მეორე ნაწილი საქართველოს სხვა ქალაქებისა და სოფლების ისტორიებს ეხება. გარდა ამისა, რადიო GIPA-ს პლატფორმას GIPA-ს ლექტორები და პროფესორები აქტუალური თემების დასაფარად თუ დისკუსიების მოსაწყობად იყენებენ, ისევე, როგორც შემეცნებითი, ფსიქოლოგიური თუ საზოგადოებრივ-პოლიტიკური ხასიათის გადაცემებისთვის. ბუნებრივია, ახლა ჩამოთვლა რომ დავიწყო, ვერც დავამთავრებ…
მუსიკა…
ეს ყველაზე სასიამოვნო ნაწილია, თან განსაკუთრებით მაშინ, როდესაც ძალიან მოგწონს ის მუსიკა, რომელსაც მსმენელს სთავაზობ. ამისთვის დიდი მადლობა მინდა გადავუხადო მიშო ურუშაძეს, რომელიც მუსიკალურ მიმართულებას ხელმძღვანელობს და დიდი პასუხისმგებლობით აკეთებს მუსიკალური კომპოზიციების სელექციას. ჩვენს სიხშირეზე (94.3) მოისმენთ ურბანულ მუსიკას, ჯაზს, ფანკს, დისკოს თუ R&B-მიმართულებებს. გარდა ამისა, ჩვენთვის ძალიან მნიშვნელოვანია ადგილობრივი არტისტების მხარდაჭერა, თუმცა მხარდაჭერაში, რა თქმა უნდა, არ ვგულისხმობ იმას, რომ ისინი საკმარისად დაფასებული არ არიან, პირიქით − ჩვენ, რადიო GIPA-ს გუნდი, თავად ვართ ამ ხელოვანების მიერ შექმნილი მუსიკის მსმენელები და ვფიქრობთ, რომ მათი მუსიკის ჩვენი მსმენელებისთვის გაზიარება დიდი პრივილეგიაა. შესაბამისად, ჩვენს პლეილისტში შეხვდებით როგორც მაილს დევისის, პრინსისა და ჰერბი ჰენკოკის, ასევე კორძის, ბექა გოჩიაშვილისა და მიშო ურუშაძის ნაწარმოებებს, და მე მგონი ძალიან ისიამოვნებთ.
ფოტო: ანა დავითაშვილი
