ამერიკელი კინორეჟისორი, “ოსკარის” მფლობელი, დევიდ ლინჩი 79-ე დაბადების დღემდე რამდენიმე დღით ადრე გარდაიცვალა
2024 წლის აგვისტოში ლინჩმა ჟურნალისტებს უთხრა, რომ მას ქრონიკული დაავადება, ფილტვის ემფიზემა დაუდგინდა. რეჟისორის თქმით, დაავადებამ მას მუშაობაში ხელი შეუშალა და სახლში გამოკეტა. თუმცა ისიც უნდა აღინიშნოს, რომ ამ დაავადების შესახებ კინორეჟისორი გაცილებით ადრეც საუბრობდა. მისი თქმით ნიკოტინდამოკიდებულების შედეგად გამოწვეული ფილტვების დაავადების გამო, საკმაოდ სერიოზული ჯანმრთელობის პრობლემები შეექმნა.
ბოლო თვეებში დევიდ ლინჩი სახლიდან აღარ გადიოდა უსაფრთხოების მიზნით, რათა მის სიცოცხლეს საფრთხე არ შექმნოდა. მიუხედავად ამისა, რეჟისორი არ კარგავდა იმედს და აგრძელებდა მედიტაციებს, რაც მისი ცხოვრების განუყოფელი ნაწილი გახდა.
საბოლოოდ ლინჩის ჯანმრთელობის მდგომარეობა გაუარესდა. რეჟისორის გარდაცვალების შესახებ ინფორმაცია მისმა ოჯახის წევრებმა სოციალურ ქსელში გაავრცელეს.
„ღრმა მწუხარებით ვაცხადებთ დიდი ადამიანისა და მხატვრის, დევიდ ლინჩის გარდაცვალების შესახებ… მსოფლიოში ახლა დიდი ხვრელი გაჩნდა, როდესაც ის ჩვენთან აღარ არის“, – ნათქვამია ოჯახის განცხადებაში.
კინორეჟისორს მთავარი და პირველი აღიარება „The Elephant Man”-მა მოუტანა. შემდეგი იყო სამეცნიერო ფანტასტიკა „Dune“ და „Blue Velvet”.
1990 წელს დევიდ ლინჩმა მარკ ფროსტთან ერთად მთელი მსოფლიო ტელევიზორის ეკრანებს მიაჯაჭვა. ათწლეულების წინ ტელეკომპანია ABC-ის აღმასრულებელი პროდუსერები დევიდ ლინჩისა და მარკ ფროსტის სცენარმა მოხიბლა და ასე დაიბადა სრულიად ახალი სამყარო სახელად „Twin Peaks”.
„Twin Peaks” -ს ბევრი ტელევიზიის ოქროს ხანის დასაწყისად მიიჩნევს. წლების შემდეგაც კი მაყურებელს ხიბლავს და ატყვევებს სიუჟეტური ხაზი, პერსონაჟების სიღრმე, მონტაჟი და განწყობა, რომელიც ლინჩმა სერიალში მარკ ფროსტთან ერთად შექმნა.
აღსანიშნავია, რომ 2017 წელს დევიდ ლინჩი საქართველოსაც სტუმრობდა.
სტუმრობის მთავარი მიზანი “დევიდ ლინჩის საერთაშორისო კინემატოგრაფიული უნივერსიტეტის” დაფუძნების საკითხი იყო, რასთან დაკავშირებითაც საქართველოს მთავრობის წარმომადგენლებთან შეხვედრებიც შედგა.
ლინჩმა მიიღო კრიტიკოსების მოწონება მისი ფილმებისთვის, რომლებიც ხშირად გამოირჩევიან სიურეალისტური სტილით. წლების განმავლობაში მას მიენიჭა მრავალი საპატიო და დამსახურებული ჯილდო. ამასთან ერთად ყოველთვის ითვლებოდა თავისი ეპოქის ერთ-ერთ ყველაზე მნიშვნელოვან კინორეჟისორად.
