ქართველი ჩოგბურთელი მარიამ ბოლქვაძე უიმბლდონის 2026 წლის გათამაშებაზე ქართული ჩოგბურთის ისტორიაში კიდევ ერთი მნიშვნელოვანი შედეგის ავტორი გახდა. 28 წლის სპორტსმენმა კარიერაში პირველად იასპარეზა Wimbledon Championships-ის ძირითადი ბადის მეორე წრეში. ამ წარმატებას მან პირველ ეტაპზე მსოფლიოს 94-ე ჩოგნის, ავსტრალიელი აილა ტომლიანოვიჩის (Ajla Tomljanović) დამარცხებით მიაღწია. სამსეტიან შეხვედრაში ბოლქვაძემ მეტოქე ანგარიშით 6:2, 2:6, 6:4 დაამარცხა და კარიერის ერთ-ერთი ყველაზე მნიშვნელოვანი გამარჯვება მოიპოვა.
მიუხედავად იმისა, რომ ქართველი ჩოგბურთელი ტურნირს მეორე წრიდან გამოეთიშა, მისი გამოსვლა უიმბლდონზე ისტორიული აღმოჩნდა. ბოლქვაძე გახდა ერთ-ერთი იმ ქართველი ჩოგბურთელთაგანი, რომელმაც მსოფლიოს ყველაზე პრესტიჟულ ტურნირზე მეორე წრემდე მიაღწია.
მარიამი ბათუმში დაიბადა. ჩოგბურთის თამაში 9 წლის ასაკში დაიწყო, ხოლო 13 წლისა კარიერის განვითარების მიზნით დიდ ბრიტანეთში გადავიდა, სადაც პროფესიონალურ გარემოში განაგრძო ვარჯიში. ახალგაზრდულ წლებში არაერთ საერთაშორისო ტურნირზე წარმატებით იასპარეზა. 2013 წელს ლონდონში გამართული Aegon Junior International-ის გამარჯვებული გახდა, ხოლო 2016 წელს უიმბლდონის გოგონათა წყვილების ტურნირზე ამერიკელ ქეითი მაკნალისთან ერთად ფინალში ითამაშა. ამასთან 2021 წელს მარიამი ,,ნურ სულთანის” ტურნირის ჩემპიონი გახდა, სადაც რუსი მეტოქე ვალერია სავინიხი სამ სეტში 2:1 დაამარცხა.
პირველი მნიშვნელოვანი მოგება, რომელიც არასდროს დაგავიწყდებათ…
პირველი მნიშვნელოვანი მოგება, ალბათ, ჩემი პირველი პროფესიული ტურნირის ფინალის ტიტულია. ნახევარფინალში ხშირად გავდიოდი, მაგრამ რამდენიმეჯერ წავაგე, როცა მოვიგე, მივხვდი, რომ შეუძლებელი არაფერია, რომ ადრე თუ გვიან აუცილებლად დაგიფასდება ის შრომა და ძალისხმევა, რისთვისაც იბრძვი.
„ნურ სულთანის“ ტურნირის გამარჯვებული გახდით, რუსი მეტოქე დაამარცხეთ, რას ნიშნავს ეს გამარჯვება თქვენთვის?
„ნურ სულთანის“ ტურნირის მოგება კიდევ ერთი დიდი საფეხური იყო ჩემთვის, რადგან ისევ დავუმტკიცე ჩემს თავს, რომ შემიძლია. ისედაც მჯეროდა საკუთარი შესაძლებლობების, მაგრამ აღნიშნულმა მოგებამ უფრო განმიმტკიცა ეს განცდა.
#OK! მარიამ ბოლქვაძე ჩოგბურთზე, საყვარელ ქალაქსა და მისწრაფებებზე
პროფესიონალურ კარიერაში გარდამტეხი 2019 წელი აღმოჩნდა. მან წარმატებით გაიარა US Open-ის საკვალიფიკაციო ეტაპი, პირველად მოხვდა დიდი სლემის ძირითად ბადეში და გახდა მეოთხე ქართველი ქალი ჩოგბურთელი, რომელმაც ამ დონის ტურნირზე კვალიფიკაცია გაიარა. ტურნირზე პირველი შეხვედრაც მოიგო, რის შემდეგაც მსოფლიო რეიტინგში რეკორდულ, 152-ე პოზიციამდე დაწინაურდა.
2024 წელს ბოლქვაძე WTA 125-ის სერიის ტურნირებზე სტაბილურად ასპარეზობდა. პოლონეთისა და კოლუმბიის ტურნირებზე მეოთხედფინალში გასვლით კიდევ ერთხელ დაადასტურა, რომ საქართველოს ერთ-ერთი ყველაზე წარმატებული მოქმედი ქალი ჩოგბურთელია.
რომ მიაღწიო წარმატებას…
ვფიქრობ, წარმატების მისაღწევად ყველაზე მნიშვნელოვანია გიყვარდეს ის, რასაც აკეთებ, მნიშვნელობა არ აქვს ეს სპორტი იქნება თუ ნებისმიერი სხვა პროფესია. თუ შენი საქმე გიყვარს და სიამოვნებით აკეთებ, ამავდროულად, შრომაც თუ არ გეზარება, აუცილებლად მიაღწევ წარმატებას. მთავარია, არასდროს დანებდე, გჯეროდეს საკუთარი შესაძლებლობების და ნაბიჯ-ნაბიჯ მიჰყვე მიზნისკენ მიმავალ გზას.
ასევე დაგაინტერესებთ
