კრისტოფ ლერიბო ლუვრის ახალ დირექტორად დაინიშნა. მანამდე ის ვერსალის სასახლეს ხელმძღვანელობდა. ამის შესახებ ინფორმაციას BBC ავრცელებს.
„ვერსალის სასახლის დირექტორი კრისტოფ ლერიბო ლუვრის მუზეუმის პრეზიდენტ-დირექტორად დაინიშნა, სადაც მან ლორენს დე კარი შეცვალა. მას დაევალება მნიშვნელოვანი პროექტების ხელმძღვანელობა, რომლებიც ინსტიტუციის მომავლისთვის გადამწყვეტია – პირველ რიგში, ლუვრის უსაფრთხოებისა და მოდერნიზაციის უზრუნველყოფა და მეორე, „ლუვრის ახალი რენესანსის“ პროექტის გაგრძელება“, – განაცხადა საფრანგეთის მთავრობის პრესსპიკერმა მოდ ბრეჟომ.
საფრანგეთის კულტურის სამინისტროს განცხადებით, ლერიბოს პრიორიტეტი შენობის, კოლექციებისა და დამთვალიერებლების უსაფრთხოების განმტკიცება და ძარცვის შემდეგ ნდობის აღდგენა იქნება.
ლერიბოს წინამორბედი, ლორენს დე კარი თანამდებობიდან 24 თებერვალს გადადგა. ამის მიზეზი ოქტომბერში მომხდარი ინციდენტი გახდა, როდესაც ლუვრის მუზეუმიდან სამეფო სამკაულები მოიპარეს. მუზეუმის ძარცვის შემდეგ დე კარმა აღიარა, რომ შენობის პერიმეტრზე არსებული ვიდეომეთვალყურეობის სისტემა მოძველებული და არასაკმარისი იყო. ერთადერთი კამერა, რომელიც აპოლონის გალერეის სიახლოვეს, გარე კედელს აკონტროლებდა, სხვა მხარეს იყო მიმართული. მიუხედავად იმისა, რომ მუზეუმს ყოველწლიურად 8.7 მილიონი დამთვალიერებელი ჰყავს, ბიუჯეტის შეზღუდვების გამო, უსაფრთხოებაში ინვესტიციების ჩადება ნელი ტემპით მიმდინარეობდა.
„19 ოქტომბრის ქურდობის შემთხვევაზე სრულ პასუხისმგებლობას ვიღებ. ეს არის უზარმაზარი ჭრილობა. ამას ძალიან მძაფრად განვიცდი, როგორც ლუვრის პრეზიდენტი და დირექტორი, როგორც მემკვიდრეობის მთავარი კურატორი და როგორც უბრალოდ მოქალაქე. მინდა დაგარწმუნოთ, რომ მომხდარის მნიშვნელობას სრულად ვაცნობიერებ“, – აღიშნა ლორენს დე კარმა.
პრეზიდენტმა ემანუელ მაკრონმა დე კარის გადადგომის გადაწყვეტილება დადებითად შეაფასა და განაცხადა, რომ ეს ნაბიჯი იყო „პასუხისმგებლობის აქტი იმ დროს, როდესაც მსოფლიოს ყველაზე დიდ მუზეუმს სიმშვიდე და ძლიერი ახალი იმპულსი სჭირდება მნიშვნელოვანი პროექტების განსახორციელებლად.“
ასევე დაგაინტერესებთ
#OK! საფრანგეთში, ლუვრის ძარცვაში ეჭვმიტანილი ხუთი პირი დააკავეს
