სიმონ პორტ ჟაკმუსი იმ მცირერიცხვოვან ფრანგ დიზაინერებს მიეკუთვნება, რომლებიც შემოქმედებას არა პარიზის გლამური ცხოვრების სტილითა და რიტმით, არამედ საკუთარი წარმომავლობის, მშობლიური ადგილების ინსპირაციითა და თანამედროვე დეტალების ნაზავით ქმნიან.
ახალგაზრდა შემოქმედს პროვანსული სტილი პოდიუმზე გადმოაქვს. ჟაკმუსის “კრეატიულობის ელექტროსადგური” კონცეპტუალიზმსა და კომერციულობას შორის შესანიშნავად დაცული ბალანსით ყოველწლიურად აოცებს საზოგადოებას. მისი კოლექციები როგორც წესი „ავტობიოგრაფიულია“, თუმცა არასდროს კარგავს რელევანტურობას.
ფრანგმა დიზაინერმა ჩვეული სტილს არც ახლა უღალატა და საზოგადოებას 2021/22 წლის შემოდგომა/ზამთრის კოლექცია წარუდგინა.
ჟაკმუსის სამოსი წლების განმავლობაში უფრო ფემინური და ელეგანტური ხდება, თუმცა საფრანგეთის სამხრეთ ნაწილისადმი სიყვარული, ადგილობრივი კულტურა, სასოფლო-სამეურნეო სავარგულების დამახასიათებელი დეტალები და ფერები კვლავ უცვლელი რჩება.
