ალ პაჩინოსა და რობერტ დე ნიროს ურთიერთობა 1960-იანი წლების მიწურულს დაიწყო, როდესაც კინოში პირველ ნაბიჯებს დგამდნენ და სტელა ადლერის სამსახიობო მასტერკლასებს ესწრებოდნენ. ამ დროს ჯერ კიდევ არ იცოდნენ რამდენი საერთო ჰქონდათ – ორივე დედისერთა იყო და მანჰეტენზე გაიზარდა, ორივეს განქორწინებული მშობლები და იტალიური წარმოშობის მამა ჰყავდა.
2019 წელს ჟურნალ GQ-სთან ინტერვიუში ალ პაჩინომ დე ნიროსთან შეხვედრა ასე გაიხსენა:
„ძალიან კარგად მახსოვს ის დღე, როცა შევხვდით. მას განსაკუთრებული ქარიზმა ჰქონდა, თუნდაც უბრალო სიარულის დროს. იმ მომენტში გავიფიქრეეს – ბიჭი შესანიშნავი იქნება“.
ალ პაჩინომ და რობერტ დე ნირომ კინოკარიერა 1960-იანი წლების ბოლოს და 1970-იანი წლების დასაწყისში დაიწყეს. მიუხედავად იმისა, რომ ხშირად მსახიობებს ერთნაირ როლებს სთავაზობდნენ, მათ შორის კონკურენცია არასოდეს ყოფილა. 50-წლიანი მეგობრობისა და თანამშრომლობისა მანძილზე უამრავი ჯილდო დააგროვეს, საკულტო ფილმებში მონაწილეობა მიიღეს და XX საუკუნის გენიალურ რეჟისორებთან იმუშავეს, თუმცა გადასაღებ მოედანზე ერთმანეთს სულ რაღაც ოთხჯერ შეხვდნენ.
ახალგაზრდა მსახიობებს პოპულარობა 1974 წელს გადაღებულმა ფილმმა „ნათლია II“ მოუტანათ, სადაც დე ნირომ ახალგაზრდა ვიტო კორლეონე განასახიერა, ალ პაჩინომ კი მისი ვაჟი, მაიკლი, რომელიც კორლეონეების კრიმინალური ოჯახის მეთაურის პოსტზე მამას ცვლის. აღსანიშნავია, რომ მსახიობები არც ერთ კადრში ერთად არ ჩნდებიან, თუმცა ფილმმა ორივეს შესაძლებლობების მაქსიმალურად გამოვლენის საშუალება მისცა – დე ნირომ საუკეთესო მეორეხარისხოვანი მსახიობისთვის“ „ოსკარი“ დაიმსახურა, ალ პაჩინომ კი – BAFTA და „ოსკარის“ ნომინაცია.
ფოტო: ალ პაჩინო და რობერტ დე ნირო „ნათლიას“ გადაღებებზე
„ნათლიას“ შედეგ მსახიობებმა ერთად მხოლოდ 21 წლის შემდეგ, ფილმ „შერკინებაში“ (Heat) იმუშავეს. მთელი ფილმის განმავლობაში ისინი ერთმანეთს მხოლოდ ერთხელ ხვდებიან, თუმცა სიტუაციის სიღრმისა და სირთულის შესაფასებლად ესეც საკმარისია.
შემდეგ იყო მკვლელობის უფლება (Righteous Kill) და ირლანდიელი (The Irishman).
როგორც დე ნირომ განაცხადა, ფილმი „ირლანდიელი“ შეიძლება მისი ბოლო თანამშრომლობა იყოს ალ პაჩინოსთან, მარტინ სკორსეზესთან და ჯო პეშთან.
The Guardian-თან ინტერვიუში მსახიობმა აღნიშნა, რომ პეშის დარწმუნება მოუწია, რომ დასვენება შეეწყვიტა და ამ ფილმისთვის კინოს დაბრუნებოდა.
ფოტო: ალ პაჩინო, ჯო პეში და რობერტ დე ნირო
„მე ვუთხარი – მოდი, გავაკეთოთ. ამის საშუალება აღარ გვექნება“. რა თქმა უნდა, თანხის შეგროვება და დანარჩენი საკმაოდ რთული იყო“ – აღნიშნა მსახიობმა.
კიდევ ერთი რამ, რაც სამოცდაათ წელს გადაცილებულ ვარსკვლავებს აერთიანებს, ახალი სიყვარული და პატარა შვილებია. 2023 წელს 79 წლის დე ნირო, რომელსაც ექვსი ზრდასრული შვილი ჰყავს მეშვიდე შვილის მამა გახდა. მსახიობს ტიფანი ჩანისგან გოგონა ეყოლა, რომელსაც ჯია დაარქვეს.
იმავე წელს 83 წლის ალ პაჩინოს 29 წლის ნურ ალფალასგან მეოთხე შვილი შეეძინა. ბედნიერმა მშობლებმა ბიჭუნას რომანი დაარქვეს. ალ პაჩინოს სხვა პარტნიორებთან 33 წლის ქალიშვილი ჯულია მარი და და 22 წლის ტყუპები ანტონი და ოლივია ჰყავს.
2025 წელს ალ პაჩინო და რობერტ დე ნირო Moncler-ის სარეკლამო კამპანიაში – ‘’Warmer Together’’ გადაიღეს.
კამპანია, რომელიც შავ-თეთრი სურათების სერიაშია ასახული, სიმბოლურად მეგობრობას, ადამიანურ სითბოს და იმ კავშირს გამოხატავს, რომელიც ათობით წლის მანძილზე გრძელდება.
ვიდეოში რობერტ დე ნირო ამბობს:
„სითბო არასდროს ყოფილა გარეგნული. ის ყოველთვის იმაზეა, რაც შიგნით ხდება“.
ალ პაჩინო დასძენს: „მეგობრობა ყველაზე დიდი რამ არის, რაც ადამიანს შეიძლება ჰქონდეს. ადამიანები, რომლებთანაც სამყაროს იზიარებ, ეს ნდობა და ცხოვრების გაგებაა“.
ასევე დაგაინტერესებთ
