მეგან მარკლისა და პრინცი ჰარის სკანდალური ინტერვიუს შემდეგ უკვე რამდენიმე დღეა სამეფო ოჯახის გარშემო აჟიოტაჟი არ წყდება. საქმე უმეტესწილად მეგანისა და ჰარის იმ კომენტარს ეხება, რომელშიც ისინი სამეფო ოჯახს შვილის- არჩისადმი მიმართულ რასიზმში ადანაშაულებენ.
მეგანი არჩის კანის ფერით გამოწვეული მღელვარების შესახებ: “ჩემი ორსულობის თვეებში ჩვენ გვქონდა დიალოგები იმის შესახებ, რომ არჩი ვერ მიიღებდა სტატუსს და რთული იქნებოდა მისი დაცვა. განსაკუთრებულად დიდი მსჯელობა მოჰყვა იმას, თუ რა ფერის შეიძლებოდა ყოფილიყო მისი კანი”.
პრინცი ჰარი ამავე თემის შესახებ: “ეს საუბარი.. მე მას არასდროს გავუზიარებ ვინმეს. ეს საშინელება იყო და ჩემთვის შოკისმომგვრელი აღმოჩნდა”.
აღნიშნულ ინტერვიუს რამდენიმე საათის წინ პრინცი უილიამი გამოეხმაურა, რომელიც მეუღლესთან ერთად ოფიციალური ვიზიტით ლონდონის ერთ-ერთ სკოლაში იმყოფებოდა.
“ჩვენ საერთოდ არ ვართ რასისტები”- სწორედ ასეთი პასუხი გასცა მან რეპორტიორს, რომელმაც კვლავ ძმების ოჯახების ურთიერთობაზე ჩამოაგდო სიტყვა.
შეგახსენებთ, რომ კომენტარი რამდენიმე დღის წინ დედოფალი ელიზაბეტის ოფიციალურ გვერდზეც გაკეთდა:
“მთელი ოჯახი დამწუხრებულია იმის გაგებით, თუ რამდენად რთული იყო ბოლო რამდენიმე წელი მეგანისა და ჰარისთვის. წამოჭრილი კითხვები, რომლებიც უმეტესად რასიზმს ეხება, ჩვენ გვაშფოთებს. მიუხედავად იმისა, რომ ზოგი მოგონება შესაძლოა განსხვავებულად ინტერპრეტირდა, თუმცა ჩვენ მათ სერიოზულად ვიღებთ და მუდმივ რეჟიმში გავუწევთ ზედამხედველობას. ჰარი, მეგანი და არჩი ყოველთვის იქნებიან ჩვენი ოჯახის უსაყვარლესი წევრები.”
