მეგან მარკლისა და პრინცი ჰარის გარშემო მსოფლიო მედიის ობიექტივი კიდევ ერთხელ მას შემდეგ მიეპყრო, რაც წყვილმა ოპრა უინფრისთან ჩაწერილ ინტერვიუში ბევრ პირად და აქამდე ტაბუდადებულ თემაზე ისაუბრა.
მეგანი არჩის კანის ფერით გამოწვეული მღელვარების შესახებ: “ჩემი ორსულობის თვეებში ჩვენ გვქონდა დიალოგები იმის შესახებ, რომ არჩი ვერ მიიღებდა სტატუსს და რთული იქნებოდა მისი დაცვა. განსაკუთრებულად დიდი მსჯელობა მოჰყვა იმას, თუ რა ფერის შეიძლებოდა ყოფილიყო მისი კანი”.
პრინცი ჰარი ამავე თემის შესახებ: “ეს საუბარი.. მე მას არასდროს გავუზიარებ ვინმეს. ეს საშინელება იყო და ჩემთვის შოკისმომგვრელი აღმოჩნდა”.
მეგან მარკლი სუიციდის შესახებ: “მე აღარ მინდოდა სიცოცხლე. ამაზე მუდმივი ფიქრი ისეთი ცხადი და შემაშინებელი იყო. მახსოვს ის (ჰარი) როგორ ცდილობდა გულში ჩაკვრით გადავერჩინე”
პრინცი ჰარი ჩარლზის უყურადღებობაზე: “სანამ სამეფო ოჯახის დატოვებას გადავწყვეტდით, ამაზე დედოფალთან სამჯერ ვისაუბრე, მამასთან ორჯერ, რის შემდეგაც მან შეწყვიტა ჩემს ზარებზე პასუხის გაცემა. ბოლოს კი მთხოვა, წერილობითი კომუნიკაციისთვის მიმემართა”.
მეგან მარკლი ატირებული ქეით მიდლტონის ცრუ ცნობების შესახებ: “ჩვენს ქორწილამდე რამდენიმე დღით ადრე, ის (ქეითი) გაღიზიანებული იყო თანმხლები გოგონების კაბების გამო, რამაც გული მართლა მატკინა. ამ დეტალებს აღარ მოვყვები, რადგან ქეითმა ბოდიში მოიხადა და მე მას ვაპატიე. ამ ყველაფერში ყველაზე ცუდი ჩემდამი მომართულ ბრალდებებთან გამკლავება იყო”.
