მაიკლ ჯოზეფ ჯექსონი 1958 წლის 29 აგვისტოს, ინდიანას შტატის ქალაქ გერიში, მრავალშვილიან ოჯახში დაიბადა. დღეს მისი სახელი მსოფლიო მუსიკის ისტორიაში წარუშლელია – თუმცა ჯექსონის ცხოვრება მხოლოდ რეკორდულ გაყიდვებსა და „პოპის მეფის“ სტატუსს არ უკავშირდება. მისი ისტორია ბავშვობის დაკარგვას, ოჯახურ დაძაბულობას, უდიდეს წარმატებას, ჯანმრთელობის პრობლემებს, გარეგნობის რადიკალურ ცვლილებას, მძიმე ბრალდებებსა და საბოლოოდ ტრაგიკულ სიკვდილს აერთიანებს.
ბავშვობა
მაიკლ ჯექსონი ათი შვილიდან მერვე იყო. მამამ, ჯოზეფ ჯექსონმა, შვილებისგან მუსიკალური ჯგუფი შექმნა, რომელმაც მოგვიანებით Jackson 5-ის სახელით მსოფლიო აღიარება მოიპოვა. მაიკლი ჯგუფის ყველაზე პატარა წევრი იყო, თუმცა ძალიან მალე მისი მთავარი ვარსკვლავი გახდა.
„მიყვარდა სცენაზე ყოფნა – ის ჯადოსნური შეგრძნება, რომელიც მას მოჰქონდა”, – ამბობდა ჯექსონი ერთ-ერთ ადრეულ ინტერვიუში.
მისი ბავშვობის ერთ-ერთი ყველაზე მტკივნეული მოგონება მამასთან ურთიერთობას უკავშირდებოდა. მოგვიანებით იხსენებდა, რომ ჯოზეფი რეპეტიციების დროს მკაცრი იყო და შვილებისგან მუდმივად სრულყოფილებას ითხოვდა.
მაიკლის თქმით, მამის დანახვისას ზოგჯერ იმდენად ეშინოდა, რომ ფიზიკურად ცუდად ხდებოდა.
„მამაჩემი ძალიან მკაცრი იყო და მისი ხშირად მეშინოდა. როცა სხვა ბავშვები თამაშობდნენ, მე და ჩემი ძმები საათობით ვრეპეტიციობდით. ზოგჯერ ვფიქრობდი, რომ ბავშვობა საერთოდ არ მქონდა – ვერ ვაკეთებდი იმას, რასაც ჩვეულებრივი ბავშვები აკეთებდნენ. თუმცა, ამავე დროს, სწორედ მამაჩემმა მასწავლა დისციპლინა, შრომა და პასუხისმგებლობა. დღეს, როცა ამ ყველაფერს ვიხსენებ, ვხვდები, რომ მის მიმართ ერთდროულად მქონდა შიშიც, წყენაც და მადლიერებაც. ბევრი რამ დავკარგე, მაგრამ იმ გზამ, რომელიც მან ამარჩევინა, საბოლოოდ სცენამდე მიმიყვანა.“
Jackson 5-დან სოლო კარიერამდე
1960-იანი წლების ბოლოს Jackson 5 უკვე პროფესიონალი ჯგუფი იყო. 1969 წელს ისინი Motown Records-ს შეუერთდნენ, რამაც მათი კარიერა ახალ ეტაპზე გადაიყვანა. ჯგუფის მთავარი ვოკალისტი, ახალგაზრდა მაიკლი, გამორჩეული ხმით, სცენური ენერგიითა და განსაკუთრებული ქარიზმით მალევე აუდიტორიის ფავორიტი გახდა.
სოლო კარიერის გარდამტეხ ეტაპად 1979 წელი იქცა, როდესაც მაიკლ ჯექსონმა ალბომი Off the Wall გამოუშვა. ნამუშევარმა მას საერთაშორისო აღიარება და მნიშვნელოვანი კომერციული წარმატება მოუტანა. სამი წლის შემდეგ, 1982 წელს, გამოცემულმა Thriller-მა კი ჯექსონი მსოფლიო მუსიკის ერთ-ერთ ყველაზე გავლენიან არტისტად აქცია.
„Thriller“, „Billie Jean“ და „Beat It“ მხოლოდ ჰიტები არ ყოფილა – მათ მუსიკალური კლიპის აღქმაც შეცვალა. ჯექსონი ერთდროულად გახდა მომღერალი, მოცეკვავე, სცენარისტი და ვიზუალური კონცეფციების ავტორი.
1980-იან წლებში მაიკლ ჯექსონი უკვე გლობალური კულტურის ერთ-ერთი მთავარი ფიგურა იყო. მაგრამ რაც უფრო დიდი ხდებოდა მისი პოპულარობა, მით უფრო მეტად იზრდებოდა საზოგადოების ინტერესი მისი პირადი ცხოვრების მიმართ.
რატომ შეიცვალა გარეგნობა?
მაიკლ ჯექსონის გარეგნობის ცვლილება მისი ცხოვრების ერთ-ერთი ყველაზე განხილვადი საკითხი იყო.
განსაკუთრებით დიდი ყურადღება კანის ფერის ცვლილებამ მიიპყრო. წლების განმავლობაში ვრცელდებოდა მოსაზრება, თითქოს ჯექსონი კანს სპეციალურად იფერმკრთალებდა, თუმცა 1993 წელს ოპრა უინფრისთან ინტერვიუში მან პირველად საჯაროდ განაცხადა, რომ ვიტილიგო ჰქონდა – კანის დაავადება, რომელიც პიგმენტის დაკარგვას იწვევს.
ჯექსონმა იმავე ინტერვიუში მკაფიოდ უარყო მოსაზრება, თითქოს კანის გათეთრება იმიტომ სურდა, რომ შავკანიანი აღარ ყოფილიყო.
„მე შავკანიანი ამერიკელი ვარ. ვამაყობ ჩემი რასით. ვამაყობ იმით, ვინც ვარ“, – განაცხადა მან.
რაც შეეხება პლასტიკურ ოპერაციებს – თავად მომღერალმა აღიარა, რომ ცხვირის ოპერაცია ორჯერ გაიკეთა, ასევე ნიკაპის ფორმასთან დაკავშირებული პროცედურა ჩაიტარა. თუმცა საზოგადოებაში დიდი ხნის განმავლობაში არსებობდა ვარაუდი, რომ ჯექსონს გაცილებით მეტი ოპერაცია ჰქონდა ჩატარებული. მისი სახის ფორმის ცვლილება განსაკუთრებით შესამჩნევი გახდა 1990-იან წლებში.
ბრალდებები
მაიკლ ჯექსონის კარიერის ყველაზე მძიმე პერიოდი 1993 წელს დაიწყო.
13 წლის ჯორდან ჩენდლერმა ჯექსონი სექსუალურ ძალადობაში დაადანაშაულა. საქმეზე გამოძიება დაიწყო, თუმცა სისხლის სამართლის ბრალი ჯექსონის წინააღმდეგ არ წარდგენილა.
1994 წელს ჯექსონმა ჩენდლერის ოჯახთან სამოქალაქო დავა სასამართლოს გარეთ შეთანხმებით დაასრულა. თანხის ზუსტი ოდენობა სხვადასხვა წყაროში განსხვავებულადაა აღწერილი, თუმცა საქმე დაახლოებით 20 მილიონ დოლარიან შეთანხმებას უკავშირდება.
2003 წელს ჯექსონი კიდევ ერთხელ დაადანაშაულეს არასრულწლოვნის მიმართ სექსუალურ ძალადობაში. ამჯერად ბრალდებული 13 წლის გევინ არვიზო იყო.
საქმე სასამართლომდე მივიდა და 2005 წელს მსოფლიოში ერთ-ერთ ყველაზე გახმაურებულ პროცესად იქცა. ჯექსონი ყველა ბრალდებას უარყოფდა.
2005 წლის 13 ივნისს ნაფიცმა მსაჯულებმა ის ყველა წარდგენილ სისხლის სამართლის ბრალდებაში უდანაშაულოდ ცნეს. თუმცა ისტორია ამით არ დასრულებულა.
ჯექსონის გარდაცვალებიდან წლების შემდეგაც კი მის წინააღმდეგ ახალი ბრალდებები გაჩნდა.
2019 წელს HBO-ს დოკუმენტურ ფილმში „Leaving Neverland“ უეიდ რობსონმა და ჯეიმს საფეჩაკმა განაცხადეს, რომ ბავშვობაში მაიკლ ჯექსონმა მათზე სექსუალურად იძალადა. ორივე მათგანი ჯექსონს ჯერ კიდევ მისი სიცოცხლის პერიოდში იცნობდა და გარკვეულ ეტაპზე საჯაროდ აცხადებდა, რომ მასთან სექსუალური ძალადობის ფაქტი არ მომხდარა. მოგვიანებით კი პოზიცია შეცვალეს და განაცხადეს, რომ ბავშვობაში მომხდარის გააზრება წლების შემდეგ შეძლეს.
გარდაცვალება
2009 წლის 25 ივნისს, 50 წლის ასაკში, მაიკლ ჯექსონი გარდაიცვალა. გამოძიების მიხედვით, მისი სიკვდილის მიზეზი პროპოფოლისა და სხვა დამამშვიდებელი პრეპარატების ზემოქმედებით გამოწვეული მწვავე ინტოქსიკაცია გახდა.
ჯექსონის პირადი ექიმი, კონრად მიურეი, მოგვიანებით დააპატიმრეს. 2011 წელს ნაფიცმა მსაჯულებმა ის დამნაშავედ ცნეს არაგანზრახ მკვლელობაში და ოთხი წლით თავისუფლების აღკვეთა მიუსაჯეს.
მიურეი ამტკიცებდა, რომ ჯექსონის სიკვდილი მისი მხრიდან განზრახ ქმედებას არ უკავშირდებოდა, თუმცა სასამართლომ დაადგინა, რომ ექიმის დაუდევრობამ და პროპოფოლის გამოყენებამ მომღერლის გარდაცვალებაში გადამწყვეტი როლი ითამაშა.
ასევე დაგაინტერესებთ:
#OK! ჯაფარ ჯექსონი და მისი შთამბეჭდავი შესრულება მაიკლ ჯექსონის როლში
#OK! მაიკლ ჯექსონის ოჯახმა მომჩივრებს საიდუმლოდ, 2,5 მილიონი დოლარი გადაუხადა
