27 სექტემბერს მთაწმინდის პარკში წლის მთავარი ადგილობრივი გამოფენა – ქართული ექსპო „მეწარმეთა დღე“ გაიმართება. მასშტაბური ღონისძიება „ბიზნეს ჰაბ ჯორჯიასა“ და „რითეილ ასოციაციის“ ორგანიზებით, ასევე მთაწმინდის პარკის მხარდაჭერით ეწყობაა. ექსპოს მთავარი მიზანი ქართული წარმოების მხარდაჭერა და განვითარებაა, პროექტის ოფიციალური მედია პარტნიორი კი OK! Magazine Georgia გახლავთ.
საგამოფენო სივრცეში საკუთარი პროდუქციის წარდგენა სულ 60 ადგილობრივ მწარმოებელს შეეძლება, რომლებსაც სპეციალური ჟიური შეარჩევს. ექსპოში მონაწილეობის მიღება შეუძლიათ სხვადასხვა სექტორის წარმომადგენლებს: კვების პროდუქტების, ღვინისა და სხვა სასმელების, აგროპროდუქციის, ბუნებრივი კოსმეტიკის, ხელნაკეთი ნივთების, სუვენირების, ასევე ტანსაცმლისა და აქსესუარების ქართულ ბრენდებს.
ორგანიზატორების თქმით, ექსპო უნიკალური პლატფორმაა ბიზნესის განვითარებისთვის, რადგან ადგილობრივ მწარმოებლებს საშუალებას აძლევს პროდუქცია ათასობით ვიზიტორს გააცნონ და ადგილზევე მოახდინონ მისი რეალიზაცია. გარდა ამისა, ღონისძიებას დაესწრებიან რითეილის, სახელმწიფო უწყებებისა და მედიის წარმომადგენლები, რაც მეწარმეებს სადისტრიბუციო ქსელებსა და მსხვილ მარკეტებში მოხვედრის შანსს აძლევს.
ღონისძიების ფარგლებში ჟიური მონაწილე კომპანიებს 3 განსხვავებულ ნომინაციაში გამოავლენს:
ყველაზე ორიგინალურად გაფორმებული დახლი – შეფასდება საგამოფენო სივრცის ესთეტიკა და შემოქმედებითი დიზაინი;
წლის აღმოჩენა (ინოვაციური პროდუქტი) – დაჯილდოვდება ბრენდი, რომელიც გამოირჩევა ორიგინალური იდეით, შეფუთვით, გემოთი ან დამზადების ტექნოლოგიით;
ყველაზე გამორჩეული სოციალური მედია – გამოვლინდება კომპანია, რომელიც აქტიურად და ეფექტურად გააშუქებს ექსპოსთვის მზადების პროცესს ონლაინ სივრცეში.
ქართული პროდუქციის გამოფენა-გაყიდვის პარალელურად, მთაწმინდის პარკში მოსულ სტუმრებს მთელი დღის განმავლობაში ელოდებათ გასართობი პროგრამა მთელი ოჯახისთვის, საჩუქრები და წამახალისებელი გათამაშებები.
ვიზიტორებისთვის დასწრება თავისუფალია. მეწარმეებისთვის კი სარეგისტრაციო ფორმის შევსების ბოლო ვადა 1 სექტემბერია. შერჩეული მონაწილეებისთვის მონაწილეობის საფასური 100 ლარს შეადგენს, ხოლო „ბიზნეს ჰაბის“ წევრებისთვის გამოფენაში მონაწილეობა უფასოა.
