2 ოქტომბერს, პარიზის ცნობილ Théâtre du Châtelet-ში ქრისტიან ლაბუტინის გრანდიოზული შოუ „ETERNAL YOUTH“ გაიმართა, რომლის ფინალიც ქართველმა მოცეკვავეებმა სპეციალურად ამ საღამოსთვის მომზადებული ქორეოგრაფიული ნომრით დახურეს.
ლეგენდარული ფრანგი დიზაინერის 2027 წლის გაზაფხული/ზაფხულის კოლექციის ჩვენებისთვის ნომერი რამდენიმე თვის განმავლობაში მზადდებოდა. ქართველი ქორეოგრაფი ბაჩანა ჭანტურია ლაბუტინის მოდის სახლის წარმომადგენლებმა სპეციალურად ამ პროექტისთვის მიიწვიეს – იგი აფხაზეთის სიმღერისა და ცეკვის სახელმწიფო აკადემიური ანსამბლ „აფხაზეთის“ ხელმძღვანელი და BDC-ის დამფუძნებელია.
ქორეოგრაფის მთავარი ამოცანა იყო, შეექმნა მოკლე, ეფექტური ნომერი, რომელიც გრანდიოზულ შოუს დახურავდა. შედეგად, პარიზის ერთ-ერთ ცნობილ თეატრში ქართული ქორეოგრაფია თანამედროვე მოდის ერთ-ერთი ყველაზე მნიშვნელოვანი ღონისძიების ნაწილი გახდა.
აღსანიშნავია, რომ ნომრისთვის მოცეკვავეები ტრადიციულ ქართულ მუსიკაზე არ გამოსულან – ქორეოგრაფია ცოცხალი ორკესტრის თანხლებით შესრულდა.
გამოსვლის კიდევ ერთი გამორჩეული დეტალი მოცეკვავეების ფეხსაცმელი იყო. მათ ტრადიციული ქართული საცეკვაო ფეხსაცმელი – ე.წ. „აზიურები“ ეცვათ, თუმცა ამჯერად ფეხსაცმელს ქრისტიან ლაბუტინის ბრენდისთვის დამახასიათებელი წითელი ძირი ჰქონდა.
იდეა კოსტიუმების დიზაინერ ეკა ჯავახიშვილს ეკუთვნის. მან ლაბუტინს შესთავაზა, ფეხსაცმელში მისი ბრენდის მთავარი ვიზუალური სიმბოლო გამოეყენებინათ.
შოუს დასრულების შემდეგ ქრისტიან ლაბუტინმა ქართველ მოცეკვავეებს პირადად დაუტოვა ხელმოწერა მათ „აზიურებზე“ – მომენტის ამსახველი ვიდეო სოციალურ ქსელებშიც გავრცელდა და დიდი მოწონება დაიმსახურა.
ასევე დაგაინტერესებთ:
#OK! ბაჩანა ჭანტურიას გზა – სცენიდან მრავალფუნქციური კულტურული ჰაბის შექმნამდე
