15 სექტემბერს თბილისში Trump Tower-ის პროექტის ოფიციალური პრეზენტაცია გაიმართა. ღონისძიებას საქართველოს მთავრობისა და ხელისუფლების წარმომადგენლები, ასევე პროექტში ჩართული კომპანიების ხელმძღვანელები ესწრებოდნენ.
პრეზენტაციას The Trump Organization-ის აღმასრულებელი ვიცე-პრეზიდენტი ერიკ ტრამპიც შეუერთდა. დონალდ ტრამპის ვაჟმა ღონისძიებაზე ვიდეომიმართვისას აღნიშნა, რომ საქართველოში პროექტის განხორციელება ორგანიზაციისთვის მნიშვნელოვანი ნაბიჯია.
„პროექტებს როცა ვახორციელებთ, ჩვენთვის მნიშვნელოვანია მთლიანად კლიმატი. ჩვენ საუკეთესო შენობებს ვაშენებთ ქვეყნებში, სადაც არის ძალიან დიდი სტუმართმოყვარეობა. გვინდა, რომ გამორჩეული შენობები გვქონდეს მსოფლიოს სხვადასხვა ქვეყანაში. ამას მხარს უჭერს მამაჩემი“ – განაცხადა ერიკ ტრამპმა.
რა ვიცით Trump Tower-ის შესახებ?
Trump Tower ყოფილი იპოდრომის ტერიტორიაზე, თბილისის ცენტრალური პარკის მიმდებარედ აშენდება. ცათამბჯენი Downtown Tbilisi-ის სახელით დაგეგმილი დიდი პროექტის ნაწილია, რომელიც ჯამში ექვს შენობას გააერთიანებს. პროექტის საერთო საინვესტიციო ღირებულება 2 მილიარდი დოლარია, მისი საერთო ფართობი კი დაახლოებით 600 ათას კვადრატულ მეტრს შეადგენს.
ამჟამინდელი მონაცემებით, Trump Tower 62-სართულიანი იქნება. მისი არქიტექტურული კონცეფცია საერთაშორისო კომპანია Gensler-ს ეკუთვნის. მთავარი პარტნიორები და დეველოპერები კი Archi Group და Invia არიან.
ცათამბჯენში პრემიუმ კლასის საცხოვრებელი ბინები განთავსდება. პროექტი ასევე მოიცავს სასტუმროს, საოფისე და კომერციულ სივრცეებს, რესტორნებსა და სხვადასხვა მომსახურებას.
მთლიანად Downtown Tbilisi-ში დაახლოებით 45 ათასი კვადრატული მეტრის სავაჭრო სივრცისა და 3 600-ზე მეტი საპარკინგე ადგილის განთავსებაა დაგეგმილი.
ბინების ფასი კვადრატულ მეტრზე 7 000 დოლარიდან დაიწყება. უფრო მაღალ სართულებზე კი საცხოვრებელი ფართის ღირებულებამ შესაძლოა 15 000 დოლარს მიაღწიოს.
რა ღირს პროექტი
Downtown Tbilisi-ის განვითარებისთვის დაგეგმილი ინვესტიცია 2 მილიარდ დოლარს შეადგენს. ეს თანხა მხოლოდ Trump Tower-ის მშენებლობას არ მოხმარდება – პროექტი ჯამში ექვს კოშკსა და მათ გარშემო სხვადასხვა ინფრასტრუქტურის შექმნას აერთიანებს.
ამასთან, The Wall Street Journal-ის მიერ გავრცელებული ინფორმაციის თანახმად, ტერიტორია, სადაც პროექტი უნდა აშენდეს, დეველოპერებმა ბიძინა ივანიშვილის ოჯახის მიერ კონტროლირებადი ფონდისგან შეიძინეს. გარიგების ღირებულებამ დაახლოებით 85 მილიონი დოლარი შეადგინა.
პროექტის მიხედვით, Trump Tower-ის მშენებლობა 2031 წელს უნდა დასრულდეს, ხოლო Downtown Tbilisi-ის სრულად განვითარება – 2033 წლისთვის იგეგმება.
აღსანიშნავია, რომ Trump-ის ბრენდის სახელით საქართველოში ცათამბჯენის აშენების პირველი იდეა ჯერ კიდევ 2012 წელს, ბათუმში, გაჩნდა, თუმცა მაშინ პროექტი არ განხორციელებულა.
