ბედნიერი ვარ, OK!-ის მკითხველს ჩემებური ქუთაისი რომ უნდა გავაცნო. ფერადი, ლაღი, კაშკაშა, გულთბილი და სალმიანი, ემოციური და ცოტა ფიცხი, გულუხვი, მაგრამ მომთხოვნი, გემოვნებიანი და კულტურული, კოპწია, მაგრამ ყველაზე დიდი გულის პატრონი და, რაც მთავარია, ევროპულ ქალაქთა შორის ერთ-ერთი უძველესი.
აქ სულ მაისია, ყველას გულში თბილა და სინათლეა.
ეს არის ქალაქი, სადაც, სულერთია, დღე არის თუ ღამე, აგვისტოს მზე გწვავს თუ დეკემბრის სუსხი, ყოველთვის ყველას ემაისება.
მაგიური ქალაქია ქუთაისი, თავისი ფრთების ქვეშ მოგაქცევს და გულში ისე ჩაგიკრავს, თითქოს სიყვარულით სურს დაგახრჩოს. ვერ გიმეტებს სხვა მიწა-წყლისთვის, სწორედ ესაა მიზეზი იმ ჯადოსნური შეგრძნებისა, რომელიც ყველა ქუთაისელს გვეუფლება, როცა ქალაქის შესასვლელთან „ქუთაისის“ ტრაფარეტს ვხედავთ. ამ დროს ამოუცნობი ჟრუანტელი დაგივლის და ზუსტად სამი წამია საკმარისი, ბავშვობის ყველა მოგონებამ უკლებლივ ერთად გაიელვოს გონებაში.
ქუთაისი ის ქალაქია, რომელსაც არასოდეს დაუკარგავს საუკუნოვანი ტრადიციები, მაგრამ, ამავდროულად, არ შეუჩერებია სვლა სიახლეების დანერგვისა და აღმოჩენისკენ.
გარდა იმისა, რომ მუდამ გვახსოვს ჩვენი ქალაქის საამაყო წარსული, ჩვენი წინაპრები, აუცილებელია სათანადო ყურადღება მივაქციოთ აწმყოს, ჩვენს არანაკლებ საამაყო მომავალ თაობას. ზუსტად ამ ფაქტის გათვალისწინებით, „OK! ქუთაისის“ ახალ ნომერში შემოგთავაზებთ ახალი და ძველი თაობის ჰარმონიას, მათ წარმატებას, განცდებსა და ცხოვრებისეულ გამოცდილებებს.
გასული წლის მოვლენებიდან ჩემთვის ერთ-ერთი ყველაზე სასიამოვნო ის ფაქტი იყო, რომ ლიტერატურული მიმართულებით ქუთაისი ღირსეულად შეუერთდა იუნესკოს შემოქმედებითი ქალაქების სიას.
ქუთაისმა მომცა შინაგანი თავისუფლება, რომელიც შეუფასებელია და ალბათ, ვერც შევძლებ ვალი დავუბრუნო, თუმცა ახლა ვცდილობ, მე მივცე ჩემივე შემოქმედებით რაღაც სასარგებლო ამ ქალაქს.
ჩემთვის ამ ქალაქში ყველა ქუჩა დიდი ისტორიისა და სიყვარულის მატარებელია, ყველა ადგილთან გარკვეული მოგონება მაკავშირებს.
„OK! ქუთაისი“ მოვამზადე დიდი სიამოვნებით, სიამაყით, სიფრთხილით, სიყვარულით და იმედს ვიტოვებ, ამას იგრძნობს ჩემი მკითხველი.
OK! ქუთაისის მოწვეული რედაქტორი თეკლა ბაბუნაშვილი
