თითქოს ბანალურად ჟღერს, მაგრამ გულწრფელად გეუბნებით: მოხარული ვარ, წარმოგიდგინოთ OK! Doctors-ის მეორე ნომერი.
„მოხარული“, ალბათ, ზუსტი შესატყვისი არ არის იმ ემოციებისა, რასაც ასეთ დროს განიცდის ყველა ჩემი თანამშრომელი და მათ შორის მეც. ნამდვილად განსაკუთრებული პასუხისმგებლობაა, შექმნა ცალკე ჟურნალი ექიმებზე, რომელთათვისაც კანის ფერს, რელიგიასა თუ პოლიტიკურ შეხედულებებს მნიშვნელობა არა აქვს, როდესაც საქმე ადამიანის ჯანმრთელობას ეხება. ისინი სწავლობენ, ფიქრობენ, მუდმივად ვითარდებიან, იღებენ რთულ გადაწყვეტილებებს და ყოველდღიურად ცდილობენ, სხვებს დაეხმარონ.
ჩვენ ვცხოვრობთ ეპოქაში, როდესაც მედიცინა წარმოუდგენელი სისწრაფით ვითარდება. დიაგნოსტიკის ახალი მეთოდები, ინოვაციური თერაპიები, ხელოვნური ინტელექტი და ტექნოლოგიური მიღწევები ყოველდღიურად აფართოებს მკურნალობის შესაძლებლობებს. ამ პროგრესის ცენტრში ადამიანი დგას.
ტექნოლოგია ექიმს შეიძლება დაეხმაროს ინფორმაციის დამუშავებაში, დიაგნოზის დაზუსტებასა და მკურნალობის დაგეგმვაში, თუმცა პასუხისმგებლობის, პროფესიული ეთიკისა და პაციენტთან ნდობაზე დაფუძნებული ურთიერთობის მნიშვნელობას ვერ ჩაანაცვლებს.
ექიმობა მუდმივი სწავლისა და საკუთარი ცოდნის გადახედვის პროცესია. მათი ყოველდღიურობა რთული გადაწყვეტილებებისა და პასუხისმგებლობებისგან შედგება. მათ არა აქვთ უფლება, შეცდომა დაუშვან, ან დაიღალონ, მათ უნდა მოიძიონ პასუხები ყველაზე რთულ კითხვებზე.
მე არ მეგულება სხვა უფრო რთული და საპასუხისმგებლო პროფესია. ყველა შემთხვევას მარტივი პასუხი არ აქვს, ყველა მკურნალობას ერთნაირი შედეგი არ მოაქვს და ყველა პაციენტის გზა გამოჯანმრთელებისკენ ერთნაირი არ არის.

OK! Doctors-ის ეს გამოცემაც სწორედ ამ საოცარ ადამიანებს ეძღვნებათ. მათ ადამიანურ მხარეს. ეს ჟურნალი მხოლოდ სამედიცინო მიღწევების ჩამონათვალი არ არის, ამისთვის სხვა პლატფორმებია. აქ ადამიანურ ისტორიებს ვყვებით მათზე, ვინც ჩვენი ჯანმრთელობისთვის და ხშირად გადარჩენისთვისაც კი თავდაუზოგავად მუშაობს.
OK! Doctors ჩვენი პატივისცემისა და მადლიერების გამოხატვაა იმ ადამიანების მიმართ, ვის ცოდნასა და პროფესიონალიზმსაც ხშირად ყველაზე ძვირფასს – საკუთარ ჯანმრთელობასა და სიცოცხლეს ვანდობთ.
გისურვებთ საინტერესო კითხვებს, მნიშვნელოვან აღმოჩენებს და სასარგებლო კითხვით გამოცდილებას.
სიყვარულით
მაიკო წერეთელი












