თათო გოგოლაშვილის ცხოვრებაში ახალი ეტაპი 2025 წელს დაიწყო, როდესაც საკუთარი მინი-ბრენდი „Sakura“ დააარსა.
მისთვის თავის მოვლა ყოველდღიური ცხოვრების მნიშვნელოვანი ნაწილია, სიურპრიზები კი, როგორც თავად ამბობს, ყველას გვიყვარს. სწორედ აქედან დაიბადა „Sakura“-ს მინი ბოქსების იდეაც – პატარა ყუთები, რომლებშიც beauty პროდუქტები გელოდებათ: კორეული სახის მოვლის საშუალებები, ბლაშები, ჰაილაითერები, სარკეები, ბრჭყვიალა აქსესუარები და სხვა საინტერესო ნივთები.
თუმცა ეს მხოლოდ სილამაზისა და თავის მოვლის პროდუქტების ერთ ყუთში თავმოყრა არ არის. „Sakura“-ს მთავარი ხიბლი მოულოდნელობაა – მომხმარებელმა წინასწარ არ იცის, რა დახვდება შიგნით და ბოქსის გახსნაც პატარა სიურპრიზად იქცევა.
ბრენდის შექმნის იდეა კი თათო პირად „აყვავების პერიოდსაც“ უკავშირებს – ეტაპს, როცა საკუთარ თავში ახალი შესაძლებლობები აღმოაჩინა და იდეის რეალობად ქცევა გადაწყვიტა.
რა დგას „Sakura“-ს იდეის უკან, როგორ იქცა ბრენდი თათოსთვის საყვარელ საქმიანობად და რა გეგმები აქვს სამომავლოდ – ამ ყველაფერზე თათო გოგოლაშვილი OK! Magazine-ს ესაუბრა.
თათო, ბევრმა მკითხველმა ჯერ მოდელობიდან, შემდეგ კი ინფლუენსერობიდან გაგიცნოთ. როდის გაგიჩნდათ სურვილი, საკუთარი იდეა რეალურ ბრენდად გექციათ და ამ მიმართულებით პირველი ნაბიჯი გადაგედგათ?
როცა ასაკი მომემატა, გამიჩნდა სურვილი, რაღაც საკუთარი გამეკეთებინა – ბავშვობიდან მქონდა სხვადასხვა იდეა და ვფიქრობდი, რომ ოდესმე მათგან რაღაცას აუცილებლად შევქმნიდი.
მინდოდა, ეს გემოვნებიანი და ხარისხიანი ყოფილიყო. ისეთი, რაც ადამიანებს სიამოვნებას მიანიჭებდა. საბოლოოდ, სწორედ ამ სურვილმა მიმიყვანა „Sakura“-ს შექმნის იდეამდე.
„Sakura“ თქვენთვის უბრალოდ ბრენდის სახელწოდება არ არის, ის თქვენს პირად „აყვავებასთანაა“ დაკავშირებული. რას ნიშნავს თქვენთვის ეს ეტაპი და როგორ აისახა ის ბრენდის შექმნის იდეაზე?
ეს ჩემთვის ძალიან მნიშვნელოვანი პერიოდი იყო. ვგრძნობდი, რომ ცხოვრებაში ახალი ეტაპი იწყებოდა – უფრო მეტად დავფიქრდი საკუთარ შესაძლებლობებზე, სურვილებსა და იმაზე, რისი გაკეთება შემიძლია. ამ დროს ბევრი რამ სხვანაირად დავინახე და საკუთარ თავშიც ახალი შესაძლებლობები აღმოვაჩინე.
მგონია, ეს ყველაფერი ერთმანეთთან არის დაკავშირებული. სწორედ ამ ეტაპს ვეძახი „აყვავების პერიოდს“. „Sakura“-ს იდეაც ამ განცდას უკავშირდება – სურვილს, აღმოვაჩინო საკუთარი შესაძლებლობები, შევქმნა რაღაც ახალი და ეს ემოცია სხვებსაც გავუზიარო.
ამბობთ, რომ ადამიანების გახარება ყოველთვის გიყვარდათ და კარგი გემოვნება ბავშვობიდანვე გამოგარჩევდათ. ეს თვისებები რამდენად დაგეხმარათ საკუთარი ბრენდის შექმნაში?
ძალიან დამეხმარა, განსაკუთრებით იმაში, რომ შეფუთვა დახვეწილი და ორიგინალური ყოფილიყო. ჩემთვის მნიშვნელოვანია, რომ ბოქსში აღმოჩენილი პროდუქტები მხოლოდ იმ მომენტისთვის არ იყოს საინტერესო – მინდა, მომხმარებელმა მათი გამოყენება მომავალშიც შეძლოს და ხარისხით კმაყოფილი დარჩეს. ამ ყველაფერს კი, რა თქმა უნდა, ლამაზი და განსაკუთრებული შეფუთვაც ემატება.
რა ფასის დიაპაზონშია ბოქსები და რატომ იყო თქვენთვის მნიშვნელოვანი, რომ ისინი ხელმისაწვდომი ყოფილიყო?
თითოეული ბოქსის სტანდარტული ფასი 50 ლარია. ჩემთვის ამ ეტაპზე მთავარი მოგება კი არა, გამოცდილებაა – მინდა, ადამიანებს ხარისხიანი და სასიამოვნო პროდუქტი შევთავაზო და თავადაც ვისწავლო, როგორ განვავითარო ბრენდი.
თუ „Sakura“-ს ბოქსს პირველად ხსნის ადამიანი, რომელსაც თავის მოვლა და beauty პროდუქტები უყვარს – რა გინდათ, რომ იმ წამს იგრძნოს?
ის, რომ არჩევანში არ შეცდა. ჩემი აზრით, ყველაზე სასიამოვნო შეგრძნებაა, როცა რაღაცას საკუთარი შრომითა და შენით გამომუშავებული ფულით ყიდულობ. ამ დროს სიამაყისა და ბედნიერების განცდა განსაკუთრებით დიდია.
თქვენი აზრით, რით განსხვავდება „Sakura“ მსგავსი beauty box-ებისგან?
პირველ რიგში, კორეული ხარისხის პროდუქტებით, ხელმისაწვდომი ფასითა და ორიგინალური შეფუთვით.
„Sakura“ უკვე თქვენი საყვარელი საქმე და ერთგვარი ჰობი გახდა. ახლა რას ეტყოდით იმ თათოს, რომელმაც ეს იდეა პირველად მოიფიქრა და ჯერ კიდევ არ იცოდა, სადამდე მიიყვანდა ეს ყველაფერი?
ალბათ ვეტყოდი, რომ უფრო ალალი იყოს და ხარისხზე იფიქროს. არ ინერვიულოს გამომწერების ზრდაზე – მთავარია, მომხმარებელს კარგი პროდუქტი და ხარისხიანი გამოცდილება შესთავაზოს.
რა გეგმები გაქვთ სამომავლოდ? რას უნდა ელოდონ „Sakura“-ს მომხმარებლები და გაქვთ თუ არა ისეთი იდეა, რომლის განხორციელებაც განსაკუთრებით გინდათ?
ვაპირებ, გადაღება გავაკეთო, დიდი ბოქსები გამოვუშვა და ერთი პატარა, საინტერესო იდეაც მაქვს: „Sakura“-ს ბოქსი როგორც გოგოებისთვის, ისე ბიჭებისთვის იქნება. ასევე მინდა, სპეციალური გამოშვება შევქმნა ლგბტქ+ ადამიანებისთვის, სადაც ისინი თავად შეძლებენ მათთვის საინტერესო პროდუქტების არჩევას.
ვფიქრობ ადამიანის ორიენტაცია არ უნდა განსაზღვრავდეს და არ უნდა ფარავდეს მის მთავარ დადებით თვისებებს. ჩემი აზრით, ბოლო პერიოდში ეს ადამიანები საკმაოდ ხშირად იჩაგრებიან, ამიტომ მეტი მხარდაჭერა და წახალისება სჭირდებათ.
ყველაზე მნიშვნელოვანი ისაა, რომ ადამიანს საკუთარი თავის გამოხატვისა და არჩევანის თავისუფლება ჰქონდეს.
