ჯეინ ოსტინის „სიამაყე და ცრურწმენა” ეკრანებზე ბრუნდება – 6 ეპიზოდისგან შემდგარ ადაპტაციაში მთავარ როლებს ემა კორინი და ჯეკ ლოუდენი ასრულებენ – კორინი ელიზაბეთ ბენეტს განასახიერებს, ლოუდენი კი მისტერ დარსის.
ბენეტების ოჯახის წევრების როლებში ოლივია კოლმანი, რუფუს სიუელი, ფრეია მეივორი, რია ნორვუდი, ჰოუფი პერიში და ჰოლი ეივერი გამოჩნდებიან.
სერიალში ასევე მონაწილეობენ დერილ მაკკორმაკი ჩარლზ ბინგლის, ლუის პარტრიჯი ჯორჯ უიკჰემის, ჯეიმი დემეტრიუ მისტერ კოლინზის, ხოლო ფიონა შოუ ლედი კეტრინ დე ბურგის როლში.
ახალი ეკრანიზაციის სცენარზე ბრიტანელი მწერალი დოლი ალდერტონი მუშაობს, რეჟისორი კი ეუროს ლინია. პროექტის აღმასრულებელ პროდიუსერებს შორის თავად ემა კორინიცაა.
Netflix-ის ცნობით, ახალი „სიამაყე და ცრურწმენა“ ოსტინის ორიგინალური ისტორიის ერთგული დარჩება, თუმცა შემქმნელები პერსონაჟებსა და მათ ურთიერთობებს საკუთარი ხედვითაც წარმოაჩენენ. ექვსი ეპიზოდის განმავლობაში მაყურებელი კვლავ იხილავს სიყვარულის, ოჯახისა და სოციალური მოლოდინების ისტორიას, რომლის ცენტრშიც ელიზაბეთისა და დარსის რთული ურთიერთობაა.
ჯეინ ოსტინის რომანი პირველად 1813 წელს გამოიცა და მას შემდეგ მისი არაერთი კინო და სატელევიზიო ადაპტაცია შეიქმნა. მათ შორის ყველაზე ცნობილია 2005 წლის ფილმი „სიამაყე და ცრურწმენა“ კირა ნაითლისა და მეთიუ მაკფეიდენის მონაწილეობით, რომელმაც ოსტინის კლასიკური ისტორია ახალი თაობის მაყურებელს კიდევ ერთხელ გააცნო.
Netflix-ის ახალი „სიამაყე და ცრურწმენის“ პრემიერა 2026 წლის 3 დეკემბერს შედგება.
ასევე დაგაინტერესებთ:
