ბუკინგემის სასახლემ პრინცი ჰარისა და მეგან მარკლის სამეფო სტატუსთან დაკავშირებით ახალი წერილი გაავრცელა, რომლის თანახმადაც, სასექსის ჰერცოგი და ჰერცოგინია ბრიტანეთის სამეფო ოჯახის მოქმედ წევრებად არ ითვლებიან და ოფიციალურ სამეფო მოვალეობებს არ ასრულებენ. წყვილის წარმომადგენლის განცხადებით, ჰარი და მეგანი წერილის გამოქვეყნების შესახებ წინასწარ ინფორმირებულები არ ყოფილან და მისი გავრცელების დრო მათთვის მოულოდნელი აღმოჩნდა.
წერილი 7 სექტემბერს, მეფე ჩარლზის სახელით, სამეფო ოჯახის მაღალი რანგის წარმომადგენელმა, ლორდ ჩემბერლენმა რიჩარდ ბენიონმა გაავრცელა. დოკუმენტი ბრიტანეთის მთავრობისა და სამხედრო უწყებების წარმომადგენლებს გაეგზავნა და მასში კიდევ ერთხელ განიმარტა ჰარისა და მეგანის ამჟამინდელი სტატუსი.
დოკუმენტში ხაზგასმულია, რომ ჰარი და მეგანი 2020 წელს სამეფო მოვალეობების შესრულებას ჩამოშორდნენ და მათი სტატუსი მას შემდეგ არ შეცვლილა. ისინი აღარ არიან სამეფო ოჯახის მოქმედი წევრები და მათი საქმიანობა სამეფო ინსტიტუტის ოფიციალურ მოვალეობებთან არ არის დაკავშირებული.
გარდა ამისა, წყვილი “კერძო მოქალაქის” სტატუსით აგრძელებს ცხოვრებას, ხოლო მათი საქველმოქმედო საქმიანობა პირად ინიციატივად განიხილება. HRH – „მისი სამეფო უდიდებულესობის“ – ტიტულების გამოყენება აკრძალულია.
ეს წესები ჯერ კიდევ 2020 წელს განისაზღვრა, როცა ჰარიმ და მეგანმა სამეფო მოვალეობებზე უარი თქვეს. თუმცა, ახლა, როდესაც წყვილი ბრიტანეთში დაბრუნდა, სასახლემ საჭიროდ მიიჩნია მათი სტატუსის კიდევ ერთხელ მკაფიოდ განმარტება.
შეგახსენებთ, რომ პრინცი ჰარი და მეგან მარკლი ექვსი წლის შემდეგ დიდ ბრიტანეთში ბრუნდებიან და ამჯერად ქვეყანაში ხანგრძლივი პერიოდით დარჩენას გეგმავენ. მათი შვილები, 7 წლის არჩი და 5 წლის ლილიბეტი სექტემბრიდან ადგილობრივ სკოლაში დაიწყებენ სწავლას.
ოჯახი კალიფორნიისა და პორტუგალიის საცხოვრებელ სახლებს შეინარჩუნებს. რაც შეეხება, ბრიტანეთის საცხოვრებელ სახლსა და ბავშვების სკოლას, მათი ადგილმდებარეობა უსაფრთხოების მიზეზების გამო არ გასაჯაროებულა.
სასექსების ბრიტანეთში დაბრუნება განსაკუთრებით მნიშვნელოვანია იმის გათვალისწინებით, რომ ქვეყნიდან წასვლის შემდეგ ჰარისთვის ერთ-ერთ მთავარ პრობლემად ოჯახის უსაფრთხოება იქცა. სამეფო მოვალეობების დატოვების შემდეგ წყვილმა სახელმწიფოს მიერ დაფინანსებული პოლიციის დაცვა დაკარგა, ჰარი კი ამ გადაწყვეტილებას სასამართლოშიც დაუპირისპირდა და არაერთხელ განაცხადა, რომ ბრიტანეთში მეუღლესა და შვილებთან ერთად დაბრუნება უსაფრთხოების გარანტიების გარეშე მისთვის რთული იყო.
ასევე დაგაინტერესებთ:
#OK! ჰარი და მეგანი ექვსი წლის შემდეგ დიდ ბრიტანეთში ბრუნდებიან
