ვენეციის 83-ე ფესტივალის ერთ-ერთ მნიშვნელოვან სექციაში, Venice Spotlight-ში, 9 სექტემბერს რეჟისორ ლევან კოღუაშვილის ახალი ფილმის, „გურიის“ მსოფლიო პრემიერა გაიმართება. ინფორმაციას ამის შესახებ საქართველოს კულტურის სამინისტრო ავრცელებს.
„გურიის“ პირველი ჩვენება პრესისა და კინოინდუსტრიის წარმომადგენლებისთვის 14:15 საათზე, Sala Giardino-ში არის დაგეგმილი, ხოლო იმავე დარბაზში, 21:00 საათზე, ფილმს მაყურებელიც იხილავს. 10 სექტემბერს კი კიდევ ერთი საჯარო ჩვენება გაიმართება.
ფილმი ვენეციის კინოფესტივალის მთავარ საკონკურსო პროგრამაში არ მონაწილეობს და „ოქროს ლომისთვის“ არ იბრძვის, თუმცა Venice Spotlight-ში მოხვედრა ქართული კინოსთვის მნიშვნელოვანი საერთაშორისო წარმატებაა. სექციაში მსოფლიოს სხვადასხვა ქვეყნიდან შერჩეული ფილმებია წარმოდგენილი.
ლევან კოღუაშვილის „გურია“ 118-წუთიანი ქართულენოვანი ნამუშევარია, რომელიც საქართველოს, შვეიცარიის, ლუქსემბურგის, ბულგარეთის, თურქეთის, ნორვეგიისა და საუდის არაბეთის კოპროდუქციაა. მთავარ როლებს კახაბერ ჭოლაძე, ნათია ნიკოლაიშვილი, ვამეხ ჯანგიძე, დავით ნაცვლალაძე და ანამარია ქამლაძე ასრულებენ.
ფილმში მოქმედება 1990-იანი წლების დასაწყისის გურიაში ვითარდება – ქვეყანაში, სადაც სიღარიბე, უშუქობა, კრიმინალი და რთული სოციალური მდგომარეობა ყოველდღიურობის ნაწილია. მძიმე რეალობას თან ახლავს იუმორი, სიმღერა, სიყვარული, ჩხუბი, ოცნებები და ადამიანური ურთიერთობები.
ლევან კოღუაშვილი: „ფილმი არის ადამიანებზე, რომლებიც, რთულ პირობებში ცხოვრების მიუხედავად, ადამიანობას ინარჩუნებენ. ისინი შორს არიან სრულყოფილებისგან და ხშირად საკმაოდ ცუდადაც იქცევიან, მაგრამ რჩებიან ადამიანებად. მათ შეუძლიათ მეგობრობა და თანაგრძნობა. მე მინდოდა გადამეღო ფილმი ჩვეულებრივ ადამიანებზე, ყოველგვარი იდეოლოგიური კლიშეებისა თუ პოლიტიკური კონიუნქტურის გარეშე – უბრალოდ ცხოვრება, უბრალოდ კინო, უბრალოდ გურია. გურია მეტია, ვიდრე უბრალო კუთხის სახელი, ეს უფრო შინაგანი მდგომარეობაა”.
„გურიას“ საფუძვლად გიორგი კეკელიძის „გურული დღიურები“ დაედო. თუმცა ფილმი წიგნის პირდაპირი ეკრანიზაცია არ არის. კოღუაშვილმა ნაწარმოებით შთაგონების შემდეგ თავად დაიწყო გურიაში მოგზაურობა, ადგილობრივებთან შეხვედრა და მათი ისტორიების გაცნობა. რეჟისორს განსაკუთრებით 1990-იანი წლების გურიის ყოფა და იქ მცხოვრები ადამიანების ისტორიები აინტერესებდა.
სწორედ ამ მოგონებებისა და რეალური ამბების საფუძველზე ჩამოყალიბდა ფილმის სიუჟეტი. საბოლოო სცენარზე ლევან კოღუაშვილთან ერთად გიორგი კეკელიძემ და ბორის ფრუმინმა იმუშავეს.
აღსანიშნავია ისიც, რომ “გურია” საქართველოს სახელით 2027 წლის, რიგით 99-ე „ოსკარის“ დაჯილდოებაზე საერთაშორისო სრულმეტრაჟიანი ფილმის ნომინაციაში იქნება წარდგენილი.
ასევე დაგაინტერესებთ:
#OK! საქართველოს სახელით „ოსკარზე“ ლევან კოღუაშვილის ფილმი „გურია“ წარდგება
