ბრიტანული მედიის ინფორმაციით, პრინცი უილიამი საბოლოოდ დარწმუნდა, რომ ძმასთან, პრინც ჰარისთან ურთიერთობის აღდგენას აღარ აპირებს. როგორც გამოცემა RadarOnline წერს, ამის ერთ-ერთ მთავარ მიზეზად ჰარის მემუარში Spare ქეით მიდლტონის შესახებ აღწერილი ეპიზოდები სახელდება.
სამეფო ოჯახის საკითხებზე მომუშავე ჟურნალისტმა და People-ისა და Us Weekly-ის ყოფილმა მთავარმა რედაქტორმა, დენ უეიკფორდმა, პოდკასტ The Royals Uncensored-ში განაცხადა, რომ უილიამისთვის ყველაზე მტკივნეული არა საკუთარ თავზე გამოთქმული კრიტიკა, არამედ ქეით მიდლტონის მიმართ გაკეთებული კომენტარები აღმოჩნდა.
„იყო თუ არა რამე ისეთი, რამაც უილიამს გული განსაკუთრებით ატკინა და რის პატიებაც ვეღარ შეძლო?“ – ჰკითხეს ჟურნალისტს პოდკასტში.
უეიკფორდის თქმით, პასუხი ერთმნიშვნელოვანია:
„ოჯახის შესახებ საჯაროდ საუბარი უკვე თავისთავად აღიქმებოდა ღალატად, თუმცა განსაკუთრებით მტკივნეული იყო ის, თუ როგორ წარმოაჩინა ჰარიმ ქეითი ცივ და მიუწვდომელ ადამიანად. სწორედ ეს გახდა ის საკითხი, რომლის გადალახვაც უილიამმა ვეღარ შეძლო. მან გადაწყვიტა, რომ ამ დრამაში მონაწილეობა აღარ სურდა.“
ჟურნალისტის თქმით, უილიამს შეეძლო საკუთარ თავზე დაწერილი კრიტიკის მიღება, თუმცა მეუღლის მიმართ გამოთქმული შენიშვნები მისთვის მიუღებელი აღმოჩნდა. ჰარის ავტობიოგრაფიაში რამდენიმე ეპიზოდია აღწერილი, რომლებიც ქეით მიდლტონსა და მეგან მარკლს შორის ურთიერთობას ეხება. ერთ-ერთი ისტორიის მიხედვით, მეგანმა ქეითს მისი „დედობის შემდგომი მდგომარეობა“ და ჰორმონალური ცვლილებები ახსენა, რაც, ჰარის მტკიცებით, უელსის პრინცესამ შეურაცხმყოფლად მიიღო.
„შენ ჩემს ჰორმონებზე საუბრობ. ჩვენ საკმარისად ახლო ურთიერთობა არ გვაქვს იმისთვის, რომ ჩემს ჰორმონებზე ისაუბრო,“ – ციტირებს ჰარი ქეითის სავარაუდო პასუხს.
Spare-ში ასევე აღწერილია 2018 წლის სამეფო ქორწილისთვის მზადების პერიოდი. ჰარის მტკიცებით, ქეითი პატარძლების კაბებთან დაკავშირებით ცვლილებებს ითხოვდა, რამაც მეგან მარკლი ძალიან გაანაწყენა. კიდევ ერთი გახმაურებული ეპიზოდი ეხება შემთხვევას, როდესაც მეგანმა ქეითს ტუჩსაცხი სთხოვა. ჰარის აღწერით, ქეითმა თხოვნა უხალისოდ შეასრულა, რაც მან მათ შორის არსებულ დაძაბულ ურთიერთობას დაუკავშირა.
„მეგანმა ქეითს ტუჩსაცხის თხოვნით მიმართა. ქეითი აშკარად გაკვირვებული ჩანდა, ჩანთიდან პატარა ტუჩსაცხი ამოიღო და გადასცა. მეგანმა ის თითზე დაიტანა და შემდეგ ტუჩებზე წაისვა. ქეითმა სახე შეიჭმუხნა,“ – წერს ჰარი.
მედიის ცნობით, პრინცი უილიამი და პრინცი ჰარი ბოლოს 2022 წლის სექტემბერში, დედოფალ ელისაბედ II-ის გარდაცვალების შემდეგ გამართულ ღონისძიებებზე გამოჩნდნენ ერთად. მოგვიანებით ისინი მხოლოდ ერთხელ შეხვდნენ – 2023 წლის მაისში, მეფე ჩარლზ III-ის კორონაციაზე. მაშინ უილიამი, როგორც ტახტის მემკვიდრე, ცერემონიის ცენტრალურ ფიგურებს შორის იმყოფებოდა, ხოლო ჰარი სამეფო ოჯახის სხვა წევრებთან ერთად შედარებით უკანა რიგებში იჯდა.
დენ უეიკფორდის თქმით, ძმებს შორის კომუნიკაცია პრაქტიკულად აღარ არსებობს.
„ჰარის დღეს მისი ძმის პირდაპირი საკონტაქტო ნომერიც კი აღარ აქვს. და ახლო წყაროების თქმით, რომც ჰქონდეს, უილიამი მის ზარს, სავარაუდოდ, არ უპასუხებს,“ – განაცხადა ჟურნალისტმა.
მისივე შეფასებით, ძმებს შორის დუმილი უკვე თითქმის სამი წელია გრძელდება და მათი შერიგების პერსპექტივა სულ უფრო ბუნდოვანი ხდება.
