„ვამპირის დღიურების“ ვარსკვლავი ნინა დობრევი ვენეციის 83-ე საერთაშორისო კინოფესტივალზე გამოჩნდა, თუმცა მისი წითელ ხალიჩაზე გამოსვლა მოულოდნელი და საკმაოდ უხერხული ინციდენტით დასრულდა.
37 წლის მსახიობი დენი ბოილის ახალი ფილმის, „Ink“-ის მსოფლიო პრემიერას დაესწრო. ნინა ფოტოგრაფების წინაშე პოზირებდა, როდესაც მასთან უსაფრთხოების თანამშრომელი მივიდა და ხელის მოძრაობით მიანიშნა, რომ დრო იყო, წითელი ხალიჩა დაეტოვებინა.
ვიდეოში ჩანს, რომ დობრევი თავდაპირველად დაბნეულია და, როგორც ჩანს, ვერ ხვდება, რას სთხოვენ. მიუხედავად ამისა, ის კიდევ რამდენიმე წამს აგრძელებს ფოტოგრაფებისთვის პოზირებას. მალევე მასთან მეორე ოფიციალური პირიც მიდის და მსახიობს წითელი ხალიჩის დატოვებისკენ მოუწოდებს.
ნინა საბოლოოდ თხოვნას დაემორჩილა, თუმცა სახეზე გაკვირვება და უხერხულობა აშკარად ეტყობოდა. ეს მომენტი კამერებმა დააფიქსირა და სოციალურ ქსელებში მალევე გავრცელდა.
შემთხვევამ ინტერნეტში არაერთგვაროვანი რეაქცია გამოიწვია. მომხმარებლების ნაწილი დობრევს თანაუგრძნობდა და უსაფრთხოების თანამშრომლების ქცევას ზედმეტად უხეშად აფასებდა. სხვები კი ვარაუდობდნენ, რომ მსახიობს უბრალოდ წითელ ხალიჩაზე გამოყოფილი დრო ამოეწურა.
ინციდენტთან დაკავშირებით კომენტარი არც მსახიობს და არც ვენეციის კინოფესტივალის წარმომადგენლებს გაუკეთებიათ.
მიუხედავად უხერხული მომენტისა, დობრევის გამოჩენამ დიდი ყურადღება მაინც მიიქცია. მსახიობს Armani Privé-ს ვინტაჟური კაბა ეცვა, რომელიც დახვეწილი სილუეტითა და გლამურული დეტალებით გამოირჩეოდა. ლუქი კი გადაწეული თმითა და მკვეთრი მაკიაჟით დაასრულა.
ვენეციის კინოფესტივალზე ნინა დობრევი მხოლოდ პრემიერაზე არ გამოჩენილა. ის Armani Beauty-ის მიერ ორგანიზებულ სადილსაც დაესწრო, სადაც სხვა ცნობილი სტუმრებიც იმყოფებოდნენ, მათ შორის სიდნი სვინი და იტალიელი მოდელი ვიტორია ჩერეტი.
ასევე დაგაინტერესებთ:
